Wina'am pʋpielim nɛ o nɔŋilim la yɛla
52
1 Bɔ ka fʋ mɔr tʋʋmbɛ'ɛdi nwɛ'ɛd nyɔ'ɔgɔ,kpi'euŋ tita'ar sɔba?
Bɔ ka fʋ dʋ'ʋsidi fʋ mɛŋ bɛogʋn sa?
La'am nɛ wala Wina'am nɔŋilim sid bɛnɛ saŋa wʋsa!
2 Fʋ zilim pian'ad anɛ gban'abɛ'ɛd;
li nwɛnɛ sʋ'ʋg kanɛ dit hali nɛ,
fʋ gban'e faad nu'us ayi'.
3 Fʋ nɔŋ bɛ'ɛdi gat sʋm,
ka mɛ nɔŋ faadi gat sida.
4 Fʋ nɔŋ pian'ad linɛ na san'am nid sʋʋnr,
Fʋn kanɛ an faad sɔba!
5 Sida Wina'am na mɔr san'auŋ linɛ kʋ mɔr naari kɛɛn fʋ san'an na:
O na sianki fʋ yisi fʋ sʋgʋrin la bas;
o na yisif teŋ kanɛ ka vʋm dim bɛ la ni.
6 Pʋpielim dim na nyɛɛ li, ka dabiem gban'e ba;
ba na la'ad o ka yɛt ye,
7 “Dau la nwa yʋ'ʋs
onɛ pʋ nɔk Wina'am ka o aan o kpi'euŋ zin'iga,
amaa ka ti'e o kpan'am
ka mɔɔd hali san'amid o taaba la!”
8 Amaa man nwɛnɛ olif tiig nɛ
busid Wina'am Pʋ'ʋsim Yin;
M niŋnɛ Wina'am nɔŋilim linɛ pʋ mɔr bɛn la yadda
saŋa linɛ ka' bɛnnɛ.
9 M na dʋ'ʋsi fʋ yʋ'ʋr saŋa wʋsa fʋn maal si'el la zug;
fʋ yʋ'ʋrin ka m mɔr ti'ir, fʋ yʋ'ʋri an sʋm la zug.
M na dʋ'ʋsi fʋ yʋ'ʋr fʋ nidib la tuon.