Suguru sɔsib winsɔsʋg
51
1 Zɔmim nimbaanlig, O Wina'am,fʋ nɔŋilim kanɛ pʋ naad la zug;
fʋ nimbaanlzɔɔri zu'oe si'em la zug,
kɛɛsimi m tʋʋmbɛ'ɛd la bas.
2 Linɛ wʋsa ka m gɛsig la piemi li wʋsa
ka pie m tʋʋmbɛ'ɛdi bas ka m lieb nyain.
3 M baŋi m pɔ'ɔgiri an si'em,
saŋa wʋsa m mi' m taal la yɛla.
4 M tʋm bugusim tʋʋma pɔ'ɔgif,
ka tʋm linɛ an bɛ'ɛdi fʋ tuon,
alazugɔ, fʋ din dɔl suor
ka fʋ pian'ad mɔr sida fʋ sariakadib pʋʋgin.
5 Sida m anɛ tʋʋmbɛ'ɛd sɔb m biilimin sa,
m maa tʋki m pʋʋg saŋsi'a la sa ka m tʋm taal.
6 Sida, fʋ bɔɔdi linɛ an sida ninsaal bɛllim pʋʋgin;
pa'alimim ya'am linɛ na bɛɛ m sʋnfʋn!
7 Piemim nɛ sappʋ, ka kɛ ka m an nyain;
sʋʋmim ka m pɛligi gaad sakuga.
8 Kɛl ka m wʋm sumalisim labaar;
fʋn daa tisim sʋnsa'aŋ hali la,
kɛl ka sumalisim lɛb na.
9 Da gɔsidi m tʋʋmbɛ'ɛd la
ka yis linɛ wʋsa ka m tʋm ka li an bɛ'ɛd.
10 Maalimi m sʋnf la bʋmpaal, O Wina'am,
ka tɛndigim ka m na bɛ sʋ'ʋŋa tisif.
11 Da kadimi yisi fʋ san'anɛ
bɛɛ yisi fʋ Siig Kasi la ka kɛɛ ma.
12 Lɛbisim sumalisim linɛ yiti fʋ faangirin la na tisim
ka tisim siig kanɛ wʋmmi fʋ nɔɔr la
ka ala na sʋŋidim saŋa wʋsa.
13 Ala ka m na pa'ali fʋ suoya tis banɛ pɔ'ɔgidif la,
ka tʋʋmbɛ'ɛd dim na fɛndigi lɛbi fʋ san'an na.
14 Faanmim yis ninkʋʋr pʋʋgin, O Wina'am,
fʋn Wina'am onɛ faandim la,
m zilim na yʋ'ʋmmi fʋ pʋpielim la yɛla.
15 O Zugsɔba, yɔ'ɔgimi m nɔɔr,
ka m na zun'ʋf.
16 Fʋ pʋ mɔr ya'amlɛog nɛ maanaa, ka man naan mɔrin na;
fʋ ba'a kae nɛ nyu'or maanaa.
17 Maana linɛ ka Wina'am bɔɔd anɛ fʋn na tiaki fʋ sʋnf ka sie fʋ mɛŋ.
Fʋ mɛ pʋ zan'asid ninkanɛ siki o mɛŋ
ka tiak ka bas o tʋʋmbɛ'ɛdɛ.
18 Fʋ ya'am bɔɔdim pʋʋgin kɛl ka Zion zi'esim an sʋ'ʋŋa,
mɛɛm Jerusalem zaŋguoma la.
19 Ala ka ba na maal pʋpielim maana,
nɛ nyu'or maana linɛ na ma'aa fʋ sʋʋnri tisif.
Ala ka na'araad maana na maali fʋ bimbim la zug.