Wina'am pʋ'ʋsim linɛ an yɛlmɛŋir
50
1 Wina'am Paŋtita'ar Sɔb la, o anɛ Zugsɔb Wina'am,o pian'ad ka buon dunia wʋsa
lin yi winnigi tansid zin'isi'a paae on lit zin'isi'a.
2 Wina'am pipilim nyɛɛnnɛ yit Zion
linɛ an teŋ vɛnliŋ amɛŋa la na.
3 Ti Wina'am la kenna amaa o pʋ an baanlimm nɛ;
bugum gaad o tuonnɛ diti ken
ka sisi'etita'ar gilig o.
4 O buol agɔl nɛ teŋ ye ba wʋm,
ye o na kad o nidib saria, ka ye,
5 “La'asimini m mɛŋ nidib la mɔri kɛɛn m san'an na;
nimbanɛ daa maal maana maal nɔnaar nɛ man la.”
6 Saŋgbana na mɔɔl o pʋpielim la yɛla,
bɔzugɔ Wina'am mɛŋ anɛ sariakat.
7 “M nidiba, wʋmmi ka m bɔɔd ye m pian'anɛ.
Yanam Israel dima, m na di kasɛti pɔ'ɔgi ya;
manɛ an Wina'am, onɛ aan ya Wina'am la.
8 M pʋ tansi ya maana la yɛla
bɛɛ ya nyu'or maana linɛ ka ya maannɛ m tuon daar wʋsa la.
9 M pʋ bɔɔd na'araugʋ ya gariki ni
bɛɛ bʋʋsi ya bʋlʋʋdinɛ.
10 Bʋnkɔnbid banɛ bɛ mɔɔgin la wʋsa anɛ man din,
nɛ niigi banɛ bɛ zuoya tusa ni la.
11 M mi' niis banɛ bɛ zuoya ni la wʋsa,
bʋnvʋya banɛ bɛ sian'arin la anɛ m din.
12 Man kɔ'ɔm ya'a pʋn zabid, m kʋ yɛli yaa,
bɔzugɔ dunia la nɛ linɛ bɛɛ li pʋʋgin wʋsa anɛ man din.
13 Man ɔnbidnɛ na'araad ni'imɛɛ?
Bɛɛ m nuudnɛ bʋʋs ziim?
14 Maalim bareka pʋ'ʋsim maannɛ tis Wina'am,
ka kɛ ka fʋn pʋ'ʋlʋm zi'el Onɛ Gaad Si'el wʋsa la niŋ amɛŋa.
15 Buoliminimɛ ya yɛla saŋa;
ka m na yisi ya, ka ya na'asim.”
16 Amaa nimbɛ'ɛdnam la, Wina'am yɛli ba ye,
“Suobɔ ka fʋ mɔr ka na pian'adi m wada la yɛla?
Bɛɛ bɔ ka fʋ nɔki m nɔnaar la ka li bɛɛ fʋ nɔɔrinɛ?
17 Fʋ kisi m pa'alʋg
ka lɔbigi m pian'ad la bas nya'aŋ.
18 Fʋ ya'a nyɛ na'ayiig, fʋ ɛɛnti naal nɛ o nɛ;
fʋ zaŋi fʋ mɛŋi la'as nɛ banɛ bɔɔd nidib pu'ab
nɛ banɛ bɔɔd nidib sidib.
19 Fʋ mɔri fʋ nɔɔri pian'ad bɛ'ɛd
ka pʋ gban'adi fʋ zilim nɛ faadɛ.
20 Fʋ pian'adi pɔ'ɔgidi fʋ ba'abiig ka pʋ basida
ka kɛɛndi fʋ mɛŋ mabiis.
21 Fʋn maal nɛ'ɛnam wʋsa ka m sin baanlimm la;
fʋ tɛn'ɛs ye mam anɛ wʋʋ fʋ nɛ.
Amaa m na zɛrigif sʋ'ʋŋa
ka bu'osi fʋ, fʋ nini ni.
22 Kɛlisim yɛl lina nwa, fʋn kanɛ tam Wina'am yɛla la,
ya'a ka' ala m na aansif bɛna-bɛna
ka sɔ' kae na faaɛn fɔ.
23 Onɛ maal bareka pʋ'ʋsim maan wʋsa na'asidi mam,
ka maan suori digin
ye m ti pa'al o Wina'am faangir.”