Fʋ ya'a ti'e kpan'am, li anɛ gɛtim
49
1 Ya wʋsa wʋmmi;kɛlisimi nɛ', yanam banɛ bɛ dunia nwa ni la,
2 banɛ an talis nɛ kpi'emnam wʋsa,
kpan'am dim nɛ nɔŋ dim zan':
3 M nɔɔr na pian' ya'am pian'ad;
pian'ad linɛ yiti m pʋtɛn'ɛrin na la mɔr gbin.
4 M na fɛndigi m tʋbiri kɛlis siilima;
m na nwɛ' kɔn ka yɛli m bʋgʋlʋm-bʋgʋlʋm la gbin.
5 Bɔ ka m na zɔt dabiem nɛ dabisbɛ'og kenna yɛla?
Nimbɛ'ɛdnam giligim,
6 banɛ niŋi ba kpan'am yadda
ka dʋ'ʋsidi ba mɛŋ nɛ ba areza'as yɛla la.
7 Sɔ' kʋ nyaŋi faaɛn o tiraan nyɔvʋrɛ
bɛɛ o yɔ Wina'am o mɛŋ yɛla.
8 Nyɔvʋr yɔɔdi kpi'em si'em la,
sɔ' kʋ nyaŋi yɔɔ li yɛla,
9 ye o vʋe saŋa wʋsa
ka da kpii.
10 Ti ya'a gɔs, ya'am dim kpiid;
ka zɔn nɛ ya'ampɔɔdim dim mɛ kpiid
ka basidi ba kpan'am tisid sieba.
11 Ba yaad na kpɛn aan ba ya',
ba na bɛɛ li ni saŋa linɛ pʋ mɔr bɛnnɛ,
la'am nɛ ban nɔki ba mɛŋ yʋda pʋd tɛɛns la.
12 Amaa ninsaal nɛ o mɔrim wʋsa, li kʋ nyaŋi faaɛn o
o mɛ na kpi wʋʋ bʋnkɔnbidi kpiid si'em la.
13 Banɛ tisi ba mɛŋ sida la na ba'as si'em nwa,
nɛ banɛ dɔlli ba nya'aŋ ka siak ban yɛl si'el la.
14 Ba na kpi nwɛnɛ pɛ'ɛs nɛ,
ka kum dii ba.
Pʋpielim dim na sʋ'ʋgʋ ba;
ba niŋgbina na pun'oe yaʋgʋn,
ka ba na lal nɛ ba ya-vɛnla banɛ ka ba mɛ' la.
15 Amaa Wina'am na faaɛn man nyɔvʋr yaʋgʋn;
sida o na nɔk mam keŋ o san'an.
16 Sɔ' ya'a nyɛ kpan'am, fʋn da kɛ ka li paki fɔ,
hali baa o yir ya'a ti nɔbigidi ken tuonnɛ;
17 bɔzugɔ o ya'a ti kpiid o kʋ mɔr si'eli keŋɛ,
o kpan'am la kʋ dɔl o keŋɛ.
18 La'am nɛ on daa vʋe ka tɛn'ɛs ye o mɔri bareka
hali ka nidib dʋ'ʋsidif fʋn daa ken tuon zug la,
19 o na keŋ la'as nɛ o yaanam zʋmaaŋ la,
ka kʋ lɛn nyɛ nɛɛsim linɛ bɛ vʋm pʋʋgin la.
20 Amaa ninsaal nɛ o mɔrim wʋsa, li kʋ nyaŋi faaɛn o,
o mɛ na kpi wʋʋ bʋnkɔnbidi kpiid si'em la.