Zion linɛ an Wina'am Tempʋtita'ar la
48
1 Zugsɔb la galis ya, ka nar nɛ zun'or haliti Wina'am la tempʋʋgin la, o zuokanɛ an kasi la ni.
2 Zuor la wa'am nɛ ka vɛnl hali,
ka dunia dim wʋsa mɔr sumalisim li yɛla.
Li nwɛnɛ Zafon zuor, zin'ikanɛ wa'am hali la,
Na'atita'ar la tempʋʋg linɛ an Zion Zuor la.
3 Wina'am mɛŋ bɛɛ li kpi'euŋ zin'isin la;
o pa'al o mɛŋ ye o anɛ ba suak zin'ig.
4 Na'anam la la'as taaba,
ba la'asi ken tuon,
5 ba nyɛɛ o ka li paki ba;
ka dabiem mɔri ba ka ba zɔt.
6 Dabiem daa kpɛn' ba pamm anina ka ba kirid,
ka li zabidi ba nwɛnɛ pu'a na sa'ae ka li zabid o si'em la.
7 Fʋ san'ami ba wʋʋ Tarsis anrintitada
ka sisi'em yi ya-nya'aŋ na widigi ba.
8 Nwɛnɛ tinamɛ wʋm si'em la,
ala ka ti nyɛ
Zugsɔb onɛ an Paŋtita'ar Sɔb tempʋʋgin la,
ti Wina'am tempʋʋgin la:
Wina'am kɛ ka li an baanlimm saŋa linɛ ka' bɛnnɛ.
9 O Wina'am, fʋ Pʋ'ʋsim Yir la pʋʋgin
ka ti tɛn'ɛsidi fʋ nɔŋilim linɛ pʋ mɔr bɛn la yɛla.
10 Fʋ yʋ'ʋri an si'em la,
ala ka fʋ zun'or paae dunia la zin'ig wʋsa;
fʋ datiuŋ nu'ug la pɛ'ɛl nɛ pʋpielim.
11 Zion Zuor nidib maan sumalisim,
ka Juda teŋkpɛmis la dim sʋnf ma'ae
fʋn tu'ad sida la zug.
12 Kemi Zion Zuorin la, giligimi li,
kaalimi li mɛɛb banɛ wa'am la,
13 gɔsimi li zaŋguom kpi'ema la,
ka gɔsi ba ya' linɛ mɔr paŋ la,
ka ti yɛl zʋmaaŋ kanɛ na ti duoe na la.
14 Bɔzugɔ Wina'am kaŋa anɛ ti Wina'am saŋa linɛ ka' bɛnnɛ;
onɛ na guri ti hali ti paae li bɛn.