Wina'am bɛ nɛ ti
46
1 Wina'am bɛ nɛ tika aan ti paŋ nɛ ti suak zin'ig,
ka na sʋŋi ti mugusʋg saŋa.
2 Dinzugɔ ti pʋ zɔt dabiem, hali baa teŋ la ya'a dammid
ka zuoya kɔɔdi lit atɛuk la pʋʋginɛ,
3 hali baa atɛuk la ya'a dammidi dʋ'ʋsid pumpuum
ka li dammʋg la kɛ ka zuoya kirida.
4 Kɔldaug yinne bɛɛ mɔr sumalisim ken Wina'am tempʋʋgin la na,
zin'ikanɛ an kasi ka Wina'am Onɛ Gaad Si'el wʋsa bɛ la.
5 Wina'am bɛɛ ani, ka teŋ la kʋ li bɛɛ san'am;
Wina'am na sʋŋ teŋ la bɛkɛung wʋsa.
6 Dabiem na bɛ tɛɛnsin la, ka sʋ'ʋlim wʋsa dammid;
o na dʋ'ʋsi o kʋkɔri pian' ka teŋgbauŋ bɔdig.
7 Zugsɔb Onɛ an Paŋtita'ar Sɔb la bɛ nɛ ti;
Jakob Wina'am la an ti suak zin'ig.
8 Kem na gɔs Zugsɔb la tʋʋma,
nyalima linɛ ka o mɔr teŋgbauŋʋn la na.
9 O kɛya ka dunia la wʋsa pʋ lɛn mɔr zabaa;
o kɔ' tiraad ka widig kpana la,
o nyu'oe gbanti'edʋg la nɛ bugum.
10 “An baanlimm, ka baŋ ye manɛ an Wina'am;
ba na dʋ'ʋsi m yʋ'ʋr buudi wʋsa ni,
ka dʋ'ʋsi m yʋ'ʋr dunia zug.”
11 Zugsɔb Onɛ an Paŋtita'ar Sɔb la bɛ nɛ ti;
Jakob Wina'am la aan ti suak zin'ig.