Na'ab pu'adiir malʋŋ yʋʋm
45
1 Pian'asʋma ma'aa kʋdim pɛ'ɛli m sʋʋnr,saŋa kan ka m pin'il ye m yʋ'ʋm yʋʋm bama tis na'ab la;
li nwɛnɛ onɛ mi' sɔb sʋ'ʋŋa sɔbid si'em la,
ala ka m zilim la yʋ'ʋm yʋʋm malisiŋ.
2 Naa, fʋ vɛnli gat dap wʋsa.
Wina'am niŋif bareka linɛ pʋ mɔr bɛnnɛ,
ka pian'asʋma yiti fʋ nɔɔrin na.
3 Fʋn onɛ an zaba na'aba, piankimi fʋ zaba sʋ'ʋg la;
ka kɛ ka fʋ na'am nɛ fʋ girima la nie.
4 Fʋ na'am la paŋ pʋʋgin, kem tuon nɛ nyaŋir,
ka kɛ ka sida, nɛ a-sie-m-mɛŋ nɛ pʋpielim zi'en;
kɛl ka fʋ paŋ la tʋm tʋʋmnyalima.
5 Kɛl ka fʋ piema banɛ pʋlim la kʋnsi fʋ dataas la susʋnya;
kɛl ka buudi bɛdegʋ lii fʋ nɔba teŋir.
6 O Wina'am, fʋ na'am la na bɛ saŋa kanɛ ka' bɛnnɛ;
fʋ na'am dansaar la na sida dansaari fʋ sʋ'ʋlimin la.
7 Fʋ nɔŋ pʋpielim ka kis linɛ an bɛ'ɛd.
Wina'am, onɛ aan fʋ Wina'am la, dʋ'ʋsi fʋ gaadi fʋ taaba,
ka kpa'ae sumalisim kpaam niŋif wʋʋ tudaar nɛ.
8 Fʋ fuud la wʋsa nyuug anɛ tudaar
nɛ bʋnnyubisa nɛ kasiya nyuug ma'aa;
fʋ bɛ nɛ na'ayir linɛ ka ba nɔk wabʋg nyina maal ka li vɛnl la
ka bʋnnwɛ'ɛda nwɛ'ɛdi ma'adi fʋ sʋnf.
9 Na'anam pu'ayuos bɛɛ fʋ pu'ab la sʋʋgin;
ka na'apu'a zin' fʋ datiuŋʋ pid sanlima baans.
10 M pu'ayua, digilimi fʋ tʋbir ka kɛlis sʋ'ʋŋa:
tammi fʋ nidib nɛ fʋ saam yidim yɛla.
11 Fʋ vɛnlim la kɛ ka na'ab la bɔɔdif;
na'asim o ka o anɛ fʋ zugdaan.
12 Taya dim na mɔr piini na tisif,
kpan'am dim na bɔɔd ye fʋ sʋŋi ba.
13 Pu'apaal onɛ bɛ na'ayin la vɛnl hali;
sanlim ka ba nɔki ʋgi o fuug la.
14 O fukanɛ vɛnl hali la ka o yɛ
ka ba dɔl o keŋ na'ab la san'an.
O na'abitaaba la dɔl o
ka ba kɛɛn fʋ san'an na, Na'aba.
15 Ba dɔl o kena nɛ sumalisim;
ba kena kpɛn' na'ayin la.
16 Na'aba, fʋ biribis na di'e ba yaanam zin'ig;
fʋ na kɛ ka ba an kpɛɛmnam teŋ la wʋsa ni.
17 M na kɛ ka zʋmaaŋ wʋsa tɛnri fʋ yɛla;
dinzugɔ nidib wʋsa na dʋ'ʋsi fʋ yʋ'ʋr saŋa linɛ ka' bɛnnɛ.