Wina'am nidib sɔsid Zugsɔb ye o guri ba
44
1 Ti Wina'am, ti wʋmi li nɛ ti mɛŋ tʋba;ka ti yaanam mɛ yɛli ti
fʋn da tʋm si'em ba saŋa la
yʋma banɛ da gaad la sa.
2 Fʋ nɔki fʋ nu'ugʋ kad buudi bɛdegʋ yis
ka zin'ili ti yaanamɛ ba teŋin;
fʋ da namis nidib la pamm
ka lɛɛ kɛ ka ti yaanam zin'in nɛ sumalisim.
3 Li ka' ba mɛŋi da zabi faaɛn teŋ la,
bɛɛ ba zaba la'ad ka ba da nɔki nyaŋɛ;
li da anɛ fʋ nu'ukanɛ mɔr paŋ la,
nɛ nɛɛsim kanɛ bɛɛ fʋ nindaan la, fʋn nɔŋi ba la zug.
4 Fʋnɛ aan m na'ab nɛ m Wina'am,
onɛ pian' nyaŋir yɛla tis Jakob.
5 Li anɛ fʋ paŋ zug ka ti nyaŋi ti dataas;
fʋ yʋ'ʋr zug ka ti nɔɔdi ti bi'emnam nɛ nɔba.
6 Mam pʋ ti'e m tiraug la,
m zaba sʋ'ʋg la pʋ tisidim nyaŋirɛ;
7 amaa fʋnɛ tisi ti paŋ ka ti nyaŋi ti dataas,
fʋ diis banɛ nya'ad nɛ ti la nyan.
8 Wina'am la yɛla ka ti mɔri nwɛ'ɛd nyɔ'ɔg saŋa wʋsa,
ti nan kpɛn dʋ'ʋsidi fʋ yʋ'ʋr saŋa linɛ ka' bɛnnɛ.
9 Amaa nannanna fʋ zan'as ya ka sie ti;
fʋ pʋ lɛn yit nɛ ti zabzabidib la ya'asɛ.
10 Fʋ kɛ ka ti fɛndigi zɔ ka basi ti dataas,
ka ti bi'emnam la faaɛn ti la'ad.
11 Fʋ kɛya ka ba kɔti ti wʋʋ kɔnbid nɛ
ka widigi ti kpɛn'ɛs teŋ zʋna bɛdegʋ ni.
12 Fʋ kuosi fʋ nidib nɛ yɔn,
ka pʋ nyɛ nyɔɔdi fʋ kuosʋg la pʋʋginɛ.
13 Fʋ kɛya ka ti kpi'es nyɛ ti gbin,
ka banɛ kpi'e nɛ ti la nɛ'ɛsidi ti ka la'adi ti.
14 Fʋ kɛ ka ti lieb bʋnla'adir buudi bɛdegʋ sʋʋgin;
nidib la gɔsidi ti ka lɔbid zug.
15 Man diti nyan daar wʋsa,
ka pʋ lɛn nyaŋidi duodi m zugɔ
16 banɛ nɛ'ɛsidim ka tʋ'ʋdim la yɛla,
nɛ m dataas banɛ bɔɔd ye ba yɔ sam la zug.
17 Nɛ'ɛŋa wʋsa maali ti,
la'am nɛ tinamɛ pʋ tami fʋ yɛla la,
bɛɛ zan'asi fʋ nɔnaar la.
18 Ti pʋtɛn'ɛr pʋ yii fʋ san'anɛ;
ti nɔba pʋ yii fʋ suorin la.
19 Amaa fʋ nyɔrigi ti bas
ka ti bɛ nɛ mɔɔgin bʋnkɔnbid.
Fʋ kɛya ka lik ligili ti.
20 Ti ya'a tammin nɛ Wina'am la yʋ'ʋr
bɛɛ ti yadigi ti nu'usi pʋ'ʋsid win zʋna,
21 Wina'am naan kʋ baŋinɛɛ?
On mi' linɛ bɛ ninsaal pʋtɛn'ɛrin la!
22 La'am nɛ wala fʋn zug ka ba kʋʋdi ti saŋa wʋsa;
ka maannɛ ti nwɛnɛ pɛ'ɛs ka ba mɔri ken ye ba kɔdig nɛ.
23 Duom, O Zugsɔba! Bɔ ka fʋ gbisida?
Duomi fʋ mɛŋ! Da zan'asi ti baa bi'elaa.
24 Bɔ ka fʋ su'adi fʋ nindaa
ka tami ti namisʋg nɛ banɛ mugusidi ti la yɛla?
25 Ti yʋ'ʋn bɛ nɛ teŋin;
ka ti niŋgbina dig avanba.
26 Duom sʋŋi ti;
faanmi ti fʋ nɔŋir linɛ pʋ naad la zug!