Zun'or winsɔsʋg
27
1 Zugsɔb la aan m nɛɛsim nɛ m faangid;anɔ'ɔn ka m zɔta?
Zugsɔb la an onɛ gurimi m bɛllim pʋʋgin;
anɔ'ɔn ka m na zɔt dabiem?
2 Banɛ aan m dataas nɛ m bi'emnam la ya'a ti duoe ye ba zab nɛ mam
ba wʋsa na tu'usidi lit.
3 Hali dataas ya'a giligim,
m ya'am kʋ ian'adaa;
la'am nɛ zaba ya'a kɔ' ka ba zabid nɛ m,
li wʋsa ni m na paam sʋnkpi'euŋ.
4 Bʋn yinne ma'aa ka m sɔs Zugsɔb la;
man sɔs si'eli nwa:
m bɔɔd ye m bɛ Zugsɔb la yin
m nyɔvʋr bɛn wʋsa,
ka nyɛt Zugsɔb la vɛnlim
ka ieed o, o Pʋ'ʋsim Yir la pʋʋgin.
5 Yɛla ya'a ti bɛ, o na gurim on bɛ si'el la;
o na su'am o Fuug Sʋgʋrin la
ka dʋ'ʋsim tampintita'ar zug.
6 Ala ka m sʋʋnr na ma'ae
m dataas banɛ giligim la yɛla;
o Fuug Sʋgʋrin la ka m na maal maana
ka tansid agɔla nɛ sumalisim.
M na yʋ'ʋm tis Zugsɔb la.
7 M ya'a buol, fʋn wʋmi m, m Zugsɔba,
zɔmim nimbaanlig ka wʋmi m buolʋg.
8 M sʋʋnr yɛl mam ye, “Kem na iee o,”
ka m daa lɛbis ye, “M na kena, Zugsɔba,
9 da su'a fʋ nindaa nɛ sʋnpɛɛnnɛ,
da bidim kʋdugɔ, ka m anɛ fʋ tʋmtʋm.
Fʋnɛ aan m sʋŋid,
da zan'asim bɛɛ fʋ tami m yɛllɛ,
O m Wina'am nɛ m Faangida.”
10 Baa m saam nɛ m ma ya'a zan'asim
Zugsɔb la na di'em.
11 Pa'alimim fʋ suor la, o Zugsɔba,
ka mɔrimi dɔl suokanɛ kpa' sappi,
bɔzugɔ m dataas la zu'oe nɛ.
12 Da zaŋimi niŋi m dataas nu'usin ka ba tʋmim bam bɔɔd si'el la,
bɔzugɔ ziri kasɛtib duoe zi'enɛ m yɛla,
ka vʋ'ʋsidi kpɛn'ɛsidim dabiem.
13 M nan kpɛn mɔr nɛ' ti'ir:
m na nyɛ Zugsɔb la tʋʋm sʋma
man nam bɛ dunia nwa la.
14 Gu'usim Zugsɔb la,
zi'enim sʋ'ʋŋa ka kpɛ'ɛŋi fʋ sʋnf
ka gu'us Zugsɔb la.