Winsɔsʋg kanɛ bɔɔd sa'alʋg nɛ gurim
25
1 M Zugsɔba, fʋ nu'usin ka m nɔki m mɛŋi niŋ;2 fʋn ka m tis sida ka ti'e, m Wina'am.
Da kɛ ka m di nyannɛ,
bɛɛ m dataas tʋ'ʋdimi m liig zugɔ!
3 Nimbanɛ nɔki ba ti'iri niŋi fʋ san'an la
kʋ di nyan baa bi'elaa,
amaa ba na diis banɛ zan'asidi fʋ nɔɔr
ka li pʋ mɔr gbin la nyan!
4 Zugsɔba, pa'alimi fʋ suoya la,
kɛl ka m baŋi fʋ suobibis la.
5 Nɔkimi dɔlisi fʋ sida suoya la ka pa'alim.
Fʋnɛ aan m Wina'am nɛ m Faangid,
fʋ san'an ka m ti'ir bɛ saŋa wʋsa.
6 Zugsɔba, tɛnri fʋ nimbaanlzɔɔr nɛ fʋ nɔŋilim la,
bɔzugɔ li anɛ linɛ da bɛ kʋdimin sa.
7 Da tɛn'ɛsidi m biilimin tʋʋmbɛ'ɛd yɛla
nɛ man da zan'asidi fʋ nɔɔr si'em laa;
fʋ nɔŋir la zugɔ tɛnri m yɛla,
Naa m Zugsɔba, fʋnɛ an sʋm.
8 Zugsɔb la an sʋm ka o si'el wʋsa dɔl suor;
alazug o pa'an tʋʋmbɛ'ɛd dim, ye ba siak o suoya la.
9 Banɛ siedi ba mɛŋ la ka o kɛt ka ba dɔl linɛ an sʋm
ka pa'annɛ ba o suoya sʋ'ʋŋa.
10 Zugsɔb la suoya wʋsa anɛ nɔŋilim nɛ linɛ an sida
tisid banɛ dɔl o nɔnaar la bɔɔd si'em la.
11 Fʋ yʋ'ʋr zug, Naa Zugsɔba,
kɛlli m taali bas, la'am nɛ lin zu'oe la.
12 Anɔ'ɔnɛ zɔt Zugsɔb la?
Zugsɔb na nɔk suokanɛ ka o gaŋ la pa'al o.
13 O sɔb bɛllim wʋsa ni, si'el kʋ pɔ'ɔg oo,
ka o yaas na sʋ'ʋg teŋ la.
14 Zugsɔb la zuanamɛ an banɛ zɔt o la;
o kɛt ka ba baŋid o nɔnaar la.
15 Zugsɔb la ka m gɔsid saŋa wʋsa,
on ma'aa na yisi m nɔba baans banɛ ka ba bɛnd la ni.
16 Fɛndigimi m san'an na ka zɔɔ m nimbaanlig,
ka m anɛ m kɔn'ɔkɔn' ka pʋ mɔr paŋa.
17 Yɛla banɛ bɛɛ m zugin la maligim paasid nɛ;
Faanmimɛ yis sʋnsa'aŋ pʋʋgin.
18 Gɔsimi m namisʋg nɛ m sʋnsa'aŋ
ka yisi m tʋʋmbɛ'ɛd la wʋsa.
19 Gɔsimi m bi'emnamɛ yʋ'ʋn zu'oe si'em
ka gɔs ban kisim si'em!
20 Gurim ka faanm;
da kɛ ka m di nyannɛ,
ka fʋ san'an ka m su'ad.
21 M sʋm nɛ m sida la na faanm,
bɔzugɔ m ti'ir bɛ nɛ fʋ ni.
22 Naa Wina'am, faanmi fʋ nidib Israel dim
yisimi ba yɛla la wʋsa pʋʋgin!