Na'anam Na'ab la kpɛn' na
24
1 Teŋgbauŋ la anɛ Zugsɔb la din, nɛ linɛ bɛɛ li pʋʋgin wʋsa,dunia la, nɛ onɛ wʋsa bɛɛ li ni;
2 Onɛ da ɛɛnbi li atɛukʋn
ka kɛ ka li zi'e ku'omin la.
3 Anɔ'ɔn na dʋ Zugsɔb kʋkʋn la zugɔ,
ka anɔ'ɔn na zi'en Zugsɔb zin'ikanɛ an kasi la?
4 Li anɛ onɛ nu'usi an nyain ka an pʋʋg yinne sɔb la
onɛ pʋ maan bɛɛ na'asid badaa
bɛɛ pɔɔd linɛ an zirii.
5 On sɔb na di'e albareka Zugsɔb la san'an
ka Wina'am onɛ aan o faangid la na pa'al ye o anɛ sida sɔb
6 Ala ka li aan tis zʋmaaŋ kanɛ ieed o la,
ban banɛ ieed fʋn Jakob Wina'am la.
7 Duomini ya zut, yanam za'anɔya;
yɔ'ɔgimi yanam kʋlis banɛ da pʋn bɛ kʋdimin sa la,
ka na'anam Na'ab la kpɛn' na.
8 Anɔ'ɔnɛ an Na'akaŋa, ka o na'am mɔr pipilim la?
Li anɛ Zugsɔb kanɛ mɔr paŋ nɛ kpi'euŋ la
Zugsɔb kanɛ mɔr kpi'euŋ zaba ni la.
9 Duomini ya zut, yanam za'anɔya,
yɔ'ɔgimi, yanam kʋlis banɛ da pʋn bɛ kʋdimin sa la,
ka na'anam Na'ab la na bɛ anina.
10 Anɔ'ɔnɛ an Na'akaŋa ka o na'am mɔr pipilim la?
Zugsɔb onɛ an Paŋtita'ar Sɔb la,
onɛ an Na'akanɛ ka o na'am mɔr pipilim.