Saalib bugusim yɛla
(Yʋm 53)
14
1 Zɔlʋg yɛt o pʋtɛn'ɛrin ye,“Wina'am kae!”
Ba san'am nɛ, ka ba suoya wʋsa an bɛ'ɛd;
sɔ' kae tʋm sʋm.
2 Zugsɔb la naan arezana gɔsid saalib
ye o na nyɛ ya'am daani ba sʋʋgin
nɛ onɛ ieed on Wina'am.
3 Ayei! Sɔ' wʋsa fɛndignɛ,
ba wʋsa yʋ'ʋn kilimnɛ zam dim;
sɔ' kae tʋm sʋm,
hali baa nid yinne mɛnɛ.
4 Tʋʋmbɛ'ɛd dim la kʋ zamis ya'am?
Ba vɔnnɛ m nidib la wʋʋ saalibi vɔn sa'ab si'em la;
ka mɛ pʋn pʋ sɔsid Zugsɔb la.
5 Banɛ bɛɛ anina ka dabietita'ar gban'e ba la,
Wina'am mɛ bɛ nɛ o nimbanɛ an pʋpielim dim la san'an.
6 Yanam bugusim dim la san'amid tadimnam yɛla
amaa Wina'am aan ba suak zin'ig.
7 M bɔɔd ye Israel faangir naan Zion teŋin na!
Zugsɔb la ya'a ti lɛbis o nidibi ba zin'igin,
Jakob nɛ Israel dim na mɔr sumalisim!