Zugsɔb la aan m suak zin'ig
11
1 Zugsɔb la aan m suak zin'ig,dinzug bɔ ka ya yɛtim ye
m iankim wʋʋ niiŋe
zɔɔ keŋ zuoya ni?
2 Gɔsim nimbɛ'ɛdnam la gʋdi ba tiraad si'em!
Ba nɔk piema la niŋi ba tiraadin
ye ba su'a zibisimin tɔn
banɛ sʋnya an nyain nɛ Wina'am la.
3 Ɛɛnbir la ya'a luu widig
pʋpielim dim la ye ba niŋ wala?
4 Zugsɔb la bɛ nɛ o Pʋ'ʋsim Yir linɛ an kasi la ni,
Zugsɔb la bɛ nɛ o na'am gbauŋ zug arezana ni.
O kpansid ninsaalib,
ka o nini la gɔsid ban tʋm si'em.
5 Zugsɔb la kpansid pʋpielim dim,
amaa bugusim dim nɛ banɛ bɔɔd zaba la,
o kisi ba ka o ya'am pʋ bɔɔdi ba baa bi'elaa.
6 O na kpa'ae bugumsaana nɛ kidibiri
niŋ bugusim dim zug,
pɛbistʋʋlʋg na da'ae gɛɛli ba.
7 Bɔzugɔ Zugsɔb la anɛ pʋpielim sɔb ka nɔŋ pʋpielim tʋʋma;
sida dim nɛ banɛ tʋm sʋm na nyɛɛ o nindaa.