Onɛ bɔɔd yɛlsida suor winsɔsʋg
10
1 Zugsɔba, bɔ ka fʋ zi'e lallisa?Bɔ ka fʋ su'adi fʋ mɛŋ, yɛla saŋa?
2 Bugusim sɔb la, tita'alim zug ka o namisid tadimnam;
o gban'e bɛ'ɛd la na tuligi gban'e o mɛŋ!
3 Ninvʋbɛ'ɛd nwɛ'ɛdnɛ nyɔ'ɔg nɛ on tʋm linɛ aan o sʋʋnr bɔɔdim la;
o kaanbid kaanb sʋŋi tisid dasʋŋ sɔb ka ki'isid Zugsɔb la.
4 Tʋʋmbɛ'ɛd sɔb la tita'alim zug, o pʋ ieed Wina'am zin'iga;
o tɛn'ɛsʋg wʋsa pʋʋgin, fal kae tis Wina'am.
5 O suoya wʋsa ken tuon la zug,
o mɔri nyɛɛsim ka fʋ wada lal nɛ o,
ka nɛ'ɛsid o dataas wʋsa.
6 O yɛt o sʋnfʋn ye, “Si'el kae na daam mam.
Saŋa wʋsa m na mɔr sumalisim
ka yɛlsi'a kʋ maligim paae ma.”
7 Linɛ yit o nɔɔrin na anɛ nɔpɔɔr nɛ ziri nɛ vɔlisʋg.
O zilim pɛ'ɛli nɛ yɛla nɛ bɛ'ɛd ma'aa.
8 O su'anɛ teŋkpɛmis la baba,
ye o kʋʋd banɛ ka' taal la,
ka su'a gu'ud banɛ dɔl anina gat la.
9 O dignɛ gur wʋʋ gbigim nɛ, ye o gban'e tadimnam.
O gban'adnɛ banɛ ka' kpi'euŋ la,
ka niŋidi ba o zulis la pʋʋgin mɔri ken.
10 O mugusidnɛ tadimnam ka ba lit teŋin,
o mɔr paŋi nyaŋidi ba.
11 O yɛt o sʋnfʋn ye, “Wina'am tam ya,
o ligil o nindaa ka pʋ lɛn nyɛt si'ela.”
12 Zugsɔba, duom zi'en!
Wina'am, ʋkimi fʋ nu'ug!
Da tam tadimnam la yɛlaa.
13 Bɔɔ kɛ ka nimbɛ'ɛd la ziemid Wina'am?
Bɔɔ kɛ ka o yɛt o sʋnfʋn ye,
“O kʋ gi'el man tʋm si'el la yɛllɛ.”
14 Amaa sida fʋ nyɛt yɛla nɛ sʋnsa'aŋ kan ka maan, O Wina'am:
fʋ gɔsidi li yɛla sʋ'ʋŋa.
Onɛ ka ba namisid la nɔk o mɛŋi niŋi fʋ ma'asimin,
ka fʋ sʋŋid banɛ an kpiibis la wʋsa.
15 Kɔ'ɔgim bugusim sɔb nɛ nimbɛ'ɛd kpʋkpauŋ,
kɛl ka ba paam namisʋgʋ ba tʋʋmbɛ'ɛd zug
la'am nɛ ban yɛl ye sɔ' kʋ nyɛ li la.
16 Zugsɔb la anɛ na'ab saŋa linɛ ka' bɛnnɛ,
teŋ zʋŋ nidib kʋ lɛm bɛɛ o teŋinɛ.
17 O Zugsɔba, fʋ wʋm banɛ namisid la bɔɔd si'el;
fʋ wʋmmi ba kukuma ka kpɛmisidi ba;
18 ka sʋŋid kpiibis nɛ banɛ bɛ namisʋgʋn;
linɛ na kɛ ka ninsaal na bɛ dunia ni
ka kʋ lɛn zɔ dabiem ya'asɛ.