Pʋ'ʋsim Zugsɔb bareka o yɛlmɛŋir yɛla
9
1 Zugsɔba, m na zun'e fʋ yʋ'ʋr nɛ m sʋnf wʋsa,m na yɛl nidibi fʋ tʋʋmnyalima la yɛla.
2 M sʋnf na ma'ae ka m maal sumalisim fʋ tuon,
ka yʋʋm yʋ'ʋma zun'e fʋ yʋ'ʋr,
fʋnɛ Gaad Si'el wʋsa!
3 M dataasi zɔti lɛbid nya'aŋ la,
ba na tu'ugi luu kpii fʋ tuon.
4 Bɔzugɔ fʋ mi' m bʋʋd yɛla ka kpɛn'ɛdi m zug;
fʋ zin'inɛ fʋ na'am gbauŋ zug ka kat saria nɛ sida.
5 Fʋ sa'al tɛɛns la ka kʋ nimbɛ'ɛdnam:
fʋ kpiisi ba yʋda ka li kʋ lɛn maligim sɔbɛ.
6 San'auŋ linɛ ka' bɛn paae dataas la;
fʋ nwa'a ba teŋ la,
hali ka sɔ' pʋ lɛn tɛnri ba yɛlaa.
7 Zugsɔb la sʋ'oe na'am, saŋa linɛ ka' bɛnnɛ,
O zi'el o na'am ye o kad saria.
8 O na kad dunia nwa saria nɛ pʋpielim,
ka gur tɛɛns wʋsa nɛ sida.
9 Zugsɔb la anɛ suak zin'igi tis banɛ ka ba namisidi ba,
yɛla ya'a ti bɛ, o anɛ kpi'euŋ zin'igi tisi ba.
10 Banɛ mi' fʋ yʋ'ʋr la paŋi an si'em la na niŋif yadda
bɔzugɔ fʋn kanɛ an Zugsɔb la nan zi' kad banɛ ieedif la basɛ.
11 Yʋ'ʋmmi yʋʋma wɔ'ɔg Zugsɔb onɛ an Zion Na'ab la,
yɛlimi tɛɛns la wʋsa on maal si'el!
12 Bɔzugɔ o tɛnr banɛ namisid la yɛla.
O pʋ tammid banɛ kaasid la yɛlaa, ka yɔɔd banɛ namisidi ba la sam.
13 Naa, m Zugsɔba, gɔsimi m dataas la namisidim si'em.
Zɔmim nimbaanlig ka yisim kum pʋʋgin.
14 M na zun'e fʋ yʋ'ʋr Zion teŋ za'anɔɔrin
ka maal sumalisim fʋ faangir la yɛla.
15 Tɛɛns la nidib pʋn lu bʋmbu'abanɛ ka ba tu la pʋʋgin,
baans banɛ ka ba su'a bɛnd la lɛm gban'e ba mɛŋ nɔba.
16 Ba baŋid Zugsɔb la yɛla nɛ on an sida sɔb la zug;
nimbɛ'ɛdnam la tʋʋmbɛ'ɛdi gban'adi ba.
17 Nimbɛ'ɛdnam wʋsa lɛbidnɛ kpi'im teŋ,
nɛ buudbanɛ wʋsa tam Wina'am yɛla la.
18 Amaa o kʋ tam tadimnam yɛlaa,
bɛɛ kɛ ka banɛ bɛ namisʋgʋn la ti'ir gaadɛ.
19 Zugsɔba, duom zi'en ka da kɛ ka ninsaal di ya'annɛ;
kɛl ka ba kad buudi wʋsa saria fʋ tuon.
20 Zugsɔba, kɛl ka dabiem gban'e ba,
kɛl ka buudi la baŋ ye ba anɛ ninsaalib ma'aa.