Onɛ bɔɔd yɛlsida suor winsɔsʋg
7
1 M Zugsɔb Wina'am, fʋ ni ka m su'ad,faanmim ka yisim banɛ ieedim la nu'usin.
2 Ya'a ka' ala ba na aansim zɔra-zɔra wʋʋ gbigimi aansid si'el si'em la,
bɛɛ vɛ'ɛgimi keŋ, ka sɔ' kae na faaɛn ma.
3 M Zugsɔb Wina'am, m ya'a tʋm bɛ'ɛd
ka taal bɛ m zugin,
4 m ya'a tʋm bɛ'ɛdi tis onɛ mɔr sumbʋgʋsʋm nɛ m,
bɛɛ faanm dataa si'el zaalim-zaalim,
5 fʋn kɛl ka m dataas kadimi nyaŋim,
ka nwɛ'ɛmi digil teŋin,
ka yʋ'ʋn kʋʋmi pin' teŋin.
6 M Zugsɔba, vaam duoe nɛ sʋʋnr,
ka san'am ban gban'e si'el ba sʋnpɛɛn zug la,
duom zi'en, m Wina'am, ka kɛ ka sida la tʋm.
7 Kɛl ka dunia nidib kɛɛn fʋ san'an na;
zin'inimi fʋ na'am gbauŋ la zug agɔla ka sʋ'ʋgi ba.
8 Kɛl ka Zugsɔb kad nidib la saria.
M Zugsɔba, kadimi m saria
ka li dɔlli m pʋpielim zem si'em,
ka dɔlli m bʋʋdi zem si'em,
fʋnɛ Gaad Si'el wʋsa.
9 Wina'am Onɛ an Pʋpielim Sɔba,
fʋnɛ mi' ninsaal pʋtɛn'ɛr nɛ o sʋnfʋ gban'e si'em.
Kɛl ka nimbɛ'ɛdnam tʋʋmbɛ'ɛd la gu'oe,
ka kɛ ka pʋpielim dim nyɛɛ ba mɛŋ.
10 Wina'am Onɛ Gaad Si'el wʋsa la lusidim,
onɛ faand banɛ ka ba sʋnf an nyain la.
11 Wina'am kad saria nɛ pʋpielim,
O pa'annɛ o sʋnpɛɛn daar wʋsa.
12 Tʋʋmbɛ'ɛd sɔb ya'a pʋ tiakɛ
Wina'am na maligim saas o sʋ'ʋg la
ka gʋd o tiraug la sʋ'ʋŋa.
13 O maal o zaba la'abanɛ tun'e kʋʋd la
ka ti'eb nɛ o piema banɛ dit wʋʋ bugum la.
14 Onɛ wʋsa gban'e tʋʋmbɛ'ɛd nɛ
yɛla ma'aa pʋʋg, du'adnɛ dama'am.
15 Onɛ tu bʋmbɔk
o sɔb lutnɛ bʋmbɔkanɛ ka o tu la pʋʋgin.
16 Yɛlbanɛ ka o ieed la lɛbidnɛ o zugin na;
o daamʋg la wʋsa na lɛb o mɛŋ zugin.
17 M na pʋ'ʋs Zugsɔb la bareka o pʋpielim la zug,
ka yʋ'ʋm yʋʋma zun'e o yʋ'ʋr,
Zugsɔb la Gaad Si'el wʋsa.