Wina'am nidib sɔsid Zugsɔb ye o guri ba
5
1 Zugsɔba, wʋmmi m sɔsʋg,kɛlisimi m fabʋlʋg ka zɔɔm nimbaanlig.
2 Wʋm man kaasidi bɔɔd sʋŋir la,
m Na'ab nɛ m Wina'am,
bɔzugɔ li anɛ fʋn ka m sɔsid.
3 Zugsɔba, fʋ wʋmmi m sɔsʋg bɛogʋn;
bɛogʋn ka m mɔri m winsɔsʋgʋ kɛɛn fʋ tuon na
ka gur nɛ ti'ir ye fʋ na maal.
4 Fʋ anɛ Wina'am kanɛ pʋ bɔɔd bɛ'ɛdɛ;
tʋʋmbɛ'ɛd dim kʋ nyaŋi zin'ini fʋ san'anɛ.
5 Tita'alnam kʋ nyaŋi kɛɛn fʋ san'an naa;
banɛ tʋm bɛ'ɛd wʋsa fʋ kisi ba nɛ.
6 Banɛ faad la fʋ san'amidi ba nɛ;
nimbanɛ bɔɔd kʋʋb ka an ziri dim la
Zugsɔb la kisi ba nɛ.
7 Amaa li ya'a an mam, fʋ nimbaanlzɔɔr la zug,
m tun'e kpɛn' fʋ Yin la
ka igini kpa' fʋ pʋ'ʋsim Dɔɔg linɛ an kasi la
ka tisif girima nɛ na'asi.
8 Zugsɔba, gaadimi m tuon nɛ fʋ pʋpielim la,
sʋŋimim, m dataas la zug.
Kɛl ka fʋ suor la an tituaa tisim ka m dɔl.
9 Pian'ʋk wʋsa linɛ yiti ba nɔɔrin na ka' sidaa.
Ba sʋnf gban'e nɛ san'auŋ ma'aa.
Ba pʋʋg pʋ paada;
ba pian'adnɛ ziri pian'ad ma'aa.
10 O Wina'am, kʋʋsimi ba bɛ'ɛd!
Kɛl ka ba mɛŋ gban'abɛ'ɛd la tuligi dii ba.
Kadimi ba yis, ba tʋʋmbɛ'ɛd la zug,
bɔzugɔ ba zan'asi fʋ nɔɔr.
11 Amaa kɛl ka banɛ wʋsa su'a fʋ san'an la paam sumalisim;
kɛl ka ba yʋ'ʋm nɛ sumalisim saŋa wʋsa.
Kɛl ka fʋ paŋ kanɛ guri ba la lusi ba,
ka banɛ nɔŋif la na mɔr sumalisim fʋ san'an.
12 O Zugsɔba, li anɛ sida ye fʋ niŋid pʋpielnam la zug bareka;
fʋ lusi ba nɛ wʋʋ gbanti'edʋg nɛ.