Wina'am n gaŋ na'asɔ' la yɛla
2
1 Bɔɔ niŋ ka dunia buudi wʋsa su'a gban'ad gban'abɛ'ɛdɛ?Bɔ ka ba san'amid saŋa gban'ad gban'ayaalisɛ?
2 Dunia kaŋa na'anam duoe zi'e,
ka banɛ sʋ'oe tɛɛns la la'as taaba
zan'as Zugsɔb la
nɛ Onɛ ka o Gaŋ la.
3 Ba yɛt taaba ye, “Kɛlli ka ti faaɛn ti mɛŋ
ka ba da lɛn sʋ'oe ti ya'asɛ.”
4 Onɛ zin' na'am gbauŋ zug arezana ni la la'adi banɛ:
Zugsɔb la maannɛ banɛ siaa.
5 Ka o sʋnf duoe nɛ ba ka o tansi ba
ka vɔlisi ba o sʋnf duor la pʋʋgin ka ye,
6 “M diisi m Na'ab
Zion zuokanɛ an kasi la zug.”
7 M na yɛl Zugsɔb la zi'ela la yɛla:
O yɛlim ye, “Fʋ anɛ mam Biig;
zina ka m liebi fʋ Saam.
8 Sɔsim, ka m na kɛ ka fʋ sʋ'ʋg tɛɛns la
ka dunia bɛn wʋsa aan fʋ din.
9 Fʋ na nyaŋi ba nɛ kʋnt dansaar,
ka nwa'asi ba bugus wʋʋ tandʋk nɛ.”
10 Alazugɔ, na'anama, baŋimi ya'am!
Dunia tuongatiba, sa'alimi ya mɛŋ
11 ka dɔlli Zugsɔb la nya'aŋ nɛ na'asi
ka maal sumalisim nɛ kikirʋg.
12 Na'asimini o biig la, ya'a ka' ala o sʋnf na duoe
ka o san'ami ya, ya suobɛ'ɛd la pʋʋgin;
bɔzugɔ o sʋnf tun'e duoe vuguri.
Albareka bɛ nɛ banɛ wʋsa kɛɛn o san'an na su'a la.