Maanmaannib nɛ Levi dim
12
1 Bama an maanmaannib nɛ Levi dim banɛ da dɔl Sealtiel biig Zerubabɛl nɛ Jesua lɛb na la: Seraya nɛ Jeremia nɛ Ezra 2 nɛ Amaraya nɛ Maluk nɛ Hatus 3 nɛ Siekania nɛ Rehum nɛ Meremof nɛ 4 Iddo nɛ Ginɛton nɛ Abija 5 nɛ Mijamin nɛ Moadia nɛ Bilga 6 nɛ Semaya nɛ Joyaarib nɛ Jedaya 7 nɛ Salu nɛ Amok nɛ Hilkia nɛ Jedaya.Bama da an maanmaannib la tuongatib nɛ ba taaba Jesua saŋa la.
8 Levi dim la da anɛ: Jesua nɛ Binnu nɛ Kadmiel nɛ Sieribaya nɛ Juda nɛ Mattania, on nɛ o taaba da sʋ'oe bareka pʋ'ʋsim yʋʋma. 9 Ka Bakbukia nɛ Uni nɛ ba taaba da zi'e kpa' ba pʋ'ʋsim zin'igin la.
10 Josua tuŋ dimi nwa, Josua biig da anɛ Joyakim ka on biig da anɛ Eliyaasib; Eliyaasib mɛ biig da anɛ Joyada. 11 Joyada biig da anɛ Jonatan ka on biig mɛ da an Jadua.
12 Joyakim saŋa la, bama da an maanmaannib la yir kpɛɛmnam: Meraya da an Seraya yir kpɛɛm ka Hanania an Jeremia yir kpɛɛm 13 ka Mesulam an Ezra yir kpɛɛm ka Jehohanan an Amaraya yir kpɛɛm 14 ka Jonatan an Maluk yir kpɛɛm ka Josef an Siekania yir kpɛɛm 15 ka Adina an Harim yir kpɛɛm ka Helika an Meremof yir kpɛɛm 16 ka Zakaria an Iddo yir kpɛɛm ka Mesulam an Ginɛton yir kpɛɛm 17 ka Zikir an Abija yir kpɛɛm ka Piltai an Miniamin nɛ Moadia ya kpɛɛmnam; 18 ka Sammua da an Bilga yir kpɛɛm ka Semaya an Jehonatan yir kpɛɛm 19 ka Matena an Joyaarib yir kpɛɛm ka Uzi an Jedaya yir kpɛɛm 20 ka Kalla an Salu yir kpɛɛm ka Ebɛr an Amok yir kpɛɛm 21 ka Hasiabiya an Hilkia yir kpɛɛm ka Netanɛl an Jedaya yir kpɛɛm.
22 Pesia Na'ab Darius saŋa ka ba da sɔb Levi dim la kpɛɛmnam yʋda, banɛ da bɛ Eliyaasib nɛ Joyada nɛ Johanan nɛ Jadua saŋa la. 23 Levi dim la kpɛɛmnam la, lin pin'ili ba yaanam la ti paae Eliyaasib biig Johanan saŋa la, ba sɔbi ba yʋda kpɛn'ɛs yaanam gbana la ni. 24 Levi dim la tuongatib da anɛ Hasiabiya nɛ Sieribaya nɛ Kadmiel biig Jesua nɛ ba taaba banɛ zi'e kpa' ban dʋ'ʋsid Wina'am ka tisid o bareka di'esid taaba nwɛnɛ Na'ab David onɛ da an Wina'am nid la da zi'el si'em la.
25 Mattania nɛ Bakbukia nɛ Obadia nɛ Mesulam nɛ Talimon nɛ Akub da anɛ banɛ gur za'anɔya; ba da gur la'ad dɔɔd banɛ bɛ Pʋ'ʋsim Yir za'anɔya ni la. 26 Ba da tʋm nɛ saŋa kanɛ ka Joyakim onɛ saamme da an Jesua ka o yaab an Jozadak la, saŋkan ka Nehemaya onɛ an Gɔmena nɛ Ezra onɛ da an maanmaan nɛ gbauŋ sɔbid la da bɛ la.
Jerusalem zaŋguom yɔ'ɔgir
27 Ban da ye ba yɔ'ɔg Jerusalem zaŋguom saŋsi'a la, ba da buol Levi dim la ban bɛ zin'isi'a wʋsa la'asi ba Jerusalem na ka ba maal sumalisim ka yʋ'ʋm yʋʋma tis Wina'am bareka pʋ'ʋsim, ka nwɛ'ɛd bʋnnwɛ'ɛda di'em zaŋguom la yɔ'ɔgir zug. 28 Ba mɛ da mɔr yʋʋmyʋ'ʋmnib la yi tembibis banɛ kpi'e Jerusalem la, nɛ Netofa dim tɛɛnsin, 29 nɛ Bet Gilgal nɛ zin'ibanɛ bɛ Geba nɛ Azmavef la. Yʋʋmyʋ'ʋmnib la da mɛɛ ba mɛŋ temkpɛmisi gilig Jerusalem. 30 Maanmaannib nɛ Levi dim la maali ba mɛŋ kasi naae la, ba yʋ'ʋn maal nidib la nɛ za'anɔya nɛ tempʋʋg la zaŋguoma la kasi mɛn.
31 Man Nehemaya da kɛ ka Juda tuongatib la dʋ zaŋguom la zugin, ka m da la'as yʋʋmyʋ'ʋmnib la bɛdegʋ zin'is ayi' ye ba yʋ'ʋm pʋ'ʋs Wina'am bareka.
Ka banɛ yʋ'ʋm la, zin'ig yinne dʋ zaŋguom la zugin ye ba dɔl ya-dagɔbʋgʋ kpa'ad Na'ambin Za'anɔɔr la baba. 32 Banɛ da dɔlli ba da anɛ Hosaya nɛ Juda tuongatib la pʋsʋk, 33 nɛ Azaria nɛ Ezra nɛ Mesulam 34 nɛ Juda, Benjamin nɛ Semaya nɛ Jeremia, 35 la'am nɛ maanmaannib sieba nɛ banɛ piebid na'atana; nɛ Zakaria onɛ saamme an Jonatan ka on saam an Semaya ka on saam an Matanaya ka on saam an Mikaya ka on saam an Zakur ka on saam an Asaf, 36 nɛ o taaba Semaya nɛ Azarel nɛ Milala nɛ Gilala nɛ Maai nɛ Netanɛl nɛ Juda nɛ Hanani ka ba mɔr bʋnnwɛ'ɛda wʋʋ David onɛ an Wina'am nid la da pa'al si'em la. Ban da ken la Ezra onɛ an gbauŋmi'id la da anɛ ba tuongat. 37 Ka ba yi Bulig Za'anɔɔrin la, ka dɔlisi dʋʋ kpa' David tempʋʋgin la dʋt David yir zaŋguom la zugin gaadi paad Ku'om Za'anɔɔr linɛ bɛ ya-nya'aŋ la.
38 Yʋʋmyʋ'ʋmnib banɛ kpɛlim la mɛ da fɛndigi lɛbid ya-datiuŋ, ka mam mɛŋ mɔr nidib la pʋsʋkʋ dɔlli ba dʋ zaŋguom la zugin keŋ dɔl Seneb Girimbisa la ti paae Zaŋguom yalʋŋ la. 39 Ka ti yii ani keŋ tʋʋg Efiram Za'anɔɔr zugin, linɛ ka ba buon Jesiana Za'anɔɔr bɛɛ Za'anɔkʋdʋg la, nɛ Zimi Za'anɔɔr la, nɛ Hananɛl Girimbisa, nɛ Kɔbiga Girimbisa la ni, mɔri ala keŋ paae Pɛ'ɛs Za'anɔɔrin la, hali ti paae Teŋgu'udib Za'anɔɔrini zi'e ani. 40 Yʋʋmyʋ'ʋmnib zin'is ayi' banɛ yʋ'ʋm pʋ'ʋsid Wina'am bareka la yʋ'ʋn da paae Wina'am Pʋ'ʋsim Yin la ka keŋ zi'e ba zi'esa ni, ka mam nɛ kpɛɛmnam la pʋsʋk mɛ zi'e ti zi'esa ni, 41 tinam nɛ maanmaannib la Eliakim nɛ Maaseya nɛ Minyamin nɛ Mikaya nɛ Eloanai nɛ Zakaria nɛ Hanania nɛ ba na'atana. 42 Banɛ paas da anɛ; Maaseya nɛ Semaya nɛ Eleazar nɛ Uzi, Jehohanan nɛ Malkija nɛ Elam nɛ Ezer. Jezrahaya da gaad yʋʋmyʋ'ʋmnib la tuonnɛ pa'annɛ ba ka ba yʋ'ʋm agɔla gɔla. 43 Daakan la ka ba maal maana bɛdegʋ, ka maal sumalisim bɔzugɔ Wina'am tisi ba sumalistita'ar. Ka pu'ab nɛ biis mɛ maan sumalisim. Ka sumalisim tʋkpiidʋg kanɛ ka ba da maan Jerusalem tempʋʋgin la wʋm lallisa.
44 Saŋkan la ka ba gaans nimbanɛ na gur la'ad dɔɔd la. La'ad la anɛ zʋʋd linɛ ka ba bʋn yiiga la nɛ ba pʋʋr piiga la'asʋg. Pɔɔd banɛ giligi ba tempʋʋs la wʋsa anɛ ba mɔri ba la'adi kena wʋʋ wada la zi'el si'em ye ba tis maanmaannib nɛ Levi dim la bɔzugɔ, maanmaannib la nɛ Levi dim tʋʋma da paae Juda dim ya'am hali. 45 Ba da tʋmmi ba Wina'am la tʋʋma ka maannɛ ba mɛŋ ka an kasi nyain, ka yʋʋmyʋ'ʋmnib la nɛ banɛ gur za'anɔɔr la mɛ tʋm ala nwɛnɛ Na'ab David nɛ o biig Na'ab Solomon n da zi'el si'em la. 46 Yʋma banɛ da gaad la sa, Na'ab David nɛ Asaf saŋa la, ba da mɔr kpɛɛmnam banɛ sʋ'oe yʋʋmyʋ'ʋmnib la nɛ yʋʋma linɛ zun'od Wina'am, nɛ bareka pʋ'ʋsim. 47 Alazugɔ Zerubabɛl saŋa nɛ Nehemaya saŋa la, Israel dim da la'asid nɛ diib daar wʋsa tisid yʋʋmyʋ'ʋmnib nɛ banɛ an za'anɔgu'udib la. Ba mɛ da bɛŋ Levi dim banɛ kpɛlim la dinnɛ tisi ba, ka mɛ tis Levi dim banɛ an Aaron yaas la ba din.