<<    <     Nehemaya     13     >    >> 
Nehemaya yis teŋ zʋŋ nidib la
13
1  Daakan la ba da karim Moses wada gbauŋ la agɔla gɔla ka nidib la wʋsa wʋm. Ani ka ba nyɛ ka li sɔb ye, suor kae ka ba kɛ ka Ammon nid bɛɛ Moab nid kpɛn' Zugsɔb la nidib sʋʋginɛ, 2  bɔzugɔ ba da pʋ tʋ'ʋs Israel dim la tisi ba diib bɛɛ ku'om, amaa ka da' Balaam ka o kaanb kaanbbɛ'ɛdi tisi ba. (Nɛ wala wʋsa ti Wina'am la tiak kaanb bɛ'ɛd la ka li lieb albareka tisi ti.) 3 Nidib la wʋsa wʋm wada la, ba pʋ gɛlig banɛ yaanamɛ ka' Israel dim la paas Israel dim la nii.
4 Ba da pʋn gaŋ Eliyaasib onɛ an maanmaan la ye o gur Wina'am Pʋ'ʋsim Yir la'ad dɔɔg la, saŋkan la ka on nɛ Tobaya pʋn an nɔɔr yinne sa, 5 ka o nɔk dɔtita'are tis o, dɔkan la ka ba daa ɛɛnti su'ad zʋʋd nɛ bʋnnyubisa nɛ Wina'am Pʋ'ʋsim Yir la'ad la, la'am nɛ zʋʋd linɛ an pʋdigir piiga pʋʋgin vaar yinne dinɛ an zʋʋd nɛ daam nɛ kpaam linɛ ka ba tisid Levi dim la nɛ yʋʋmyʋ'ʋmnib nɛ za'anɔgu'udib la, la'am nɛ la'abanɛ ka ba la'asidi tisid maanmaannib la. 6 Amaa nɛ'ɛnamɛ da niŋid la ka mam ka' Jerusalem, saŋkan la da an Babilon Na'ab Atazeesis n da dii o na'am la li yʋma pistan' nɛ ayi' saŋa la, ka m lɛb Na'ab la san'an. Lin nya'aŋ ka m sɔs suor o san'an ka 7 lɛb Jerusalem na. Ani ka m wʋm Eliyaasibi tʋm bɛ'ɛd si'em nɔk dɔɔg Wina'am Pʋ'ʋsim Yin la tis Tobaya, 8 ka m sʋnf da pɛlig hali ka m vaae Tobaya la'ad linɛ bɛ dɔɔgin la wʋsa lɔbi bas yiŋ. 9 Ka tis nɔɔr ye ba maal malima pie dɔɔg la, ka kɛ ka m lɛbis Wina'am Pʋ'ʋsim Yir la'ad la kpɛn'ɛs, la'am nɛ zʋʋd piini la nɛ bʋnnyubisa la.
10  M mɛ lɛn wʋm ye ba pʋ nɔk la'ad linɛ an Levi dim din la tisi baa, ka Levi dim wʋsa nɛ yʋʋmyʋ'ʋmnib la lɛbi ba pɔɔdin. 11 Ka m sa'al kpɛɛmnam la ka bu'osi ba ye, “Bɔ ka ya tam Wina'am Pʋ'ʋsim Yir la yɛllɛ?” Ani ka m buol Levi dim la kɛ ka ba lɛbi ba tʋʋma ni na. 12  Ka Juda dim wʋsa yʋ'ʋn pin'ili mɔri ba pʋdigir piiga vaar yinne linɛ an zʋʋd nɛ daam nɛ kpaam kenna kpɛn'ɛsid la'ad dɔɔgin la. 13 Ka m kɛ ka Sielemaya onɛ an maanmaan la nɛ Zadok onɛ an gbauŋmi'id la nɛ Levi nid onɛ yʋ'ʋri buon Pedaya la gur la'ad dɔɔg la, ka kɛ ka Hanani onɛ an Zakur biig ka o yaab an Matanaya la sʋŋidi ba, bɔzugɔ, ba da yɛt nimbama yɛla ye ba anɛ sida dim. Ba da kɛ ka ban tʋʋm anɛ ba pʋdigid la'adi tisidi ba ba'abiis la.
14 Oo m Wina'am, tɛnri m yɛla ka da kɛ ka man maal si'eli tisi fʋ Pʋ'ʋsim Yir nɛ li tʋʋma la keŋ zaalim!
15  Dabisban la ni ka m nyɛ ka Juda dim da nwiakid daam ba daam nwia'asʋg zin'igin la Vʋ'ʋsʋm Daar, ka mɔr zʋʋdi kenna lɔɔdi pa'annɛ ba bʋmis la'am nɛ daam nɛ tiis wala nɛ la'ad buudi wʋsa. Ka ba mɔri li wʋsa kenna ye ba kuosi li Vʋ'ʋsʋm Daare tis Juda dim; hali nɛ Jerusalem tempʋʋgin mɛn! Dinzug ka m sa'ali ba ye ba da kuosid diib Vʋ'ʋsʋm Daarɛ. 16 Ninsieba banɛ yi Taya ka bɛ Jerusalem la mɛ da mɔr zimi nɛ la'ad buudi wʋsa ken Jerusalem na kuosidi tisid Juda nidib Vʋ'ʋsʋm Daar. 17 Ka m sa'al Juda tuongatib la ka yɛli ba ye, “Bɔ ka ya tʋm bɛ'ɛdi san'amid Vʋ'ʋsʋm Daar kisʋgɔ? 18 Ya yaanam da pʋ niŋnɛ ala ka ti Wina'am la mɔr yɛltɔɔd bama kɛn tinam nɛ tempʋʋg la wʋsa zugin na? Lin pʋ siakɛ ka ya yʋ'ʋn maligim san'amid Vʋ'ʋsʋm Daar la ye ya kɛ ka Wina'am sʋnpɛɛn lii ti zugɔɔ!”
19 Vʋ'ʋsʋm Daar ya'a na bɛ wʋʋ bɛog la, zaam ya'a ma'ae ka ma'asim tuligi paae Jerusalem za'anɔya la, m ɛɛn tis nɛ nɔɔr ka ba yɔ' za'anɔya la ka kʋ lɛn yɔ'ɔgɛ asɛɛ Vʋ'ʋsʋm Dabisir daar la ya'a ti gaad. M ɛɛn zi'el nɛ m mɛŋ nidib za'anɔya la ni ka sɔ' kʋ nyaŋi mɔr la'adi kpɛn' tempʋʋgin la Vʋ'ʋsʋm Daarɛ. 20 Nɔɔr yinne bɛɛ nɔɔra ayi' ka banɛ kpiisid la'ad nɛ li buudi la da gbɛn Jerusalem tempʋʋg la yiŋ. 21 Amaa m sa'ali ba ka yɛli ba ye, “Bɔ ka ya gbɛɛnd zaŋguom la yiŋ yʋ'ʋŋɔ? Ya ya'a lɛn niŋ ala ya'as ya na baŋ!” Lin yi saŋkan la ba pʋ lɛn lɛb Vʋ'ʋsʋm Daar na ya'asɛ. 22 Ani ka m tis Levi dim la nɔɔr ye ba maali ba mɛŋ nyain ka keŋ gur za'anɔya la, ka li kɛ ka Vʋ'ʋsʋm Daar la an kasi.
O m Wina'am, tɛnri m yɛla lina wʋsa zug ka zɔɔ m nimbaanlig fʋ nɔŋilim tita'ar la zug.
23  Dabisban la ni ya'as ka m nyɛ Juda dim banɛ di pu'ab Asdod nɛ Ammon nɛ Moab dimin la. 24 Ka ba biis la pʋsʋk pian'ad nɛ Asdod dim pian'ad bɛɛ buudbanɛ kpɛlim la pian'ad, ka kʋ nyaŋi pian' Juda dim pian'adɛ. 25 Ka m tansi ba ka pɔ nɔɔri tisi ba. Ka bʋ' sieba ka vɔɔn ba zuobid. Ka m kɛ ka ba pɔ nɔɔr ye ba kʋ lɛn nɔki ba pu'ayuosi tis buudzʋŋ bɛɛ ba kɛ ka ba biribis bɛɛ ba mɛŋ di buudzʋŋ ya'asɛ. 26  M da sa'ali ba ka bu'osi ba ye, “Ka' pu'adiir bama zugʋ da kɛ ka Israel na'ab Solomon da tʋm tʋʋmbɛ'ɛd laa? Buudi wʋsa ni, na'ab da kae nwɛnɛ oo. O Wina'am da nɔŋ o nɛ hali, ka kɛ ka o an Israel wʋsa na'ab, amaa la'am nɛ wala teŋ zʋŋ pu'ab yɛla da kɛ ka o tʋm tʋʋmbɛ'ɛd. 27 Li sʋm ye nannanna tinam wʋm ye yanam mɛ tʋm bɛ'ɛd kaŋa buudi ka pʋ dɔlli ti Wina'am la nɛ sidaa, ka dit teŋ zʋŋ pu'abaa?” 28  Joyada biig yinne onɛ yaabi an Eliyaasib onɛ an maanmaan kpɛɛm la diem dau da an Sambalat onɛ an Horon nid la, ka m da kad o yisi m san'an.
29 Tɛnri ba yɛla, O m Wina'am, ban san'am maanmaannib tʋʋma ka kɛ ka dian'ad bɛ li ni la, nɛ nɔnaar linɛ an maanmaannib nɛ Levi dim din la.
30 Ala ka m maal malima pie maanmaannib nɛ Levi dim la yis linɛ an teŋ zʋŋ la'ad wʋsa, ka lɛbisi ba, ba tʋʋma ni, ka kɛ ka sɔ' wʋsa mi' o tʋʋmmi an si'el. 31 Ka m mɛ lɛn zi'el saŋa kanɛ nar ye nidib la la'as daad na nɛ zʋʋd linɛ ka ba bʋn yiiga la.
Tɛnri m yɛla, O m Wina'am, ka kɛ ka m paae fʋ ya'am.