Israel dim viigi ba tʋʋmbɛ'ɛdi yɛl Wina'am
9
1 Nwadkan la dabpisi nɛ anaasi daar Israel dim da la'asi lɔ nɔɔr ka yɛ bɔto fuud ka bugi ba zut nɛ titan ka li anɛ sʋnsa'aŋ malʋŋ. 2 Israel dim banɛ da an Israel dim amɛŋa la da baki ba mɛŋ nɛ buudzʋna la. Ba da zi'enɛ ba zi'esa ni ka viigi ba mɛŋ nɛ ba yaanam tʋʋmbɛ'ɛdi yɛl Wina'am. 3 Ba da zi'en ban bɛ zin'isi'a la ka karimi ba Zugsɔb Wina'am wada gbauŋ la dabisir la pʋʋgin, ka viigi ba tʋʋmbɛ'ɛd ka wɔ'ɔgi ba Zugsɔb Wina'am la. 4 Levi dim banɛ da zi'e ba zin'igin bimbim la zug la da anɛ Jesua nɛ Bani nɛ Kadmiel nɛ Siebanaya nɛ Buni nɛ Sieribaya nɛ Bani nɛ Kenani, ka ba da buoli ba Zugsɔb Wina'am la yʋ'ʋr nɛ kʋkɔtita'ar. 5 Ka Jesua nɛ Kadmiel nɛ Bani nɛ Hasiabineya nɛ Sieribaya nɛ Hodaya nɛ Siebanaya nɛ Petahaya banɛ an Levi dim la da yɛl ye,“Zi'enimi ka wɔ'ɔgi Zugsɔb onɛ aan ya Wina'am
ka vʋe saŋa linɛ ka' bɛn la.”
Ka nidib la wʋsa da yʋʋm yɛt ye,
“Albareka bɛ nɛ fʋ yʋ'ʋtita'ar linɛ nar girima,
ka gaad zun'or nɛ na'asi linɛ bɛ wʋsa la!
6 Fʋn ma'aa an Zugsɔb,
fʋnɛ maal agɔl nɛ saŋgbauŋ nɛ nwadbibis banɛ bɛɛ li ni la,
ka maal teŋgbauŋ nɛ linɛ bɛɛ li ni wʋsa,
ka maal atɛuk nɛ linɛ bɛɛ li pʋʋgin wʋsa.
Fʋnɛ tisid si'el wʋsa nyɔvʋr,
ka bʋn linɛ bɛɛ agɔl la wʋsa zun'odif.
7 Fʋnɛ an Zugsɔb Wina'am kanɛ da gaŋ Abram
mɔr o yi Ur linɛ bɛ Kaldea teŋgbauŋʋn la na
ka pʋd o yʋ'ʋr ye Abraham.
8 On da pa'al ye o anɛ sida sɔb la,
fʋ da maal nɔnaar nɛ o.
Fʋ zi'el nɔɔr ye fʋ na nɔk Keenan dim teŋ la tis o yaas,
ka li anɛ Hitti dim nɛ Amor dim la din,
nɛ Perizi dim nɛ Jebus dim nɛ Girgas dim din la.
Fʋ pʋ tami fʋ kaanbʋg la, fʋ pʋpielim la zug.
9 Fʋn da nyɛɛ ti yaanam namisʋg Egipt teŋin la;
fʋ da wʋmi ba kaasig Atɛuk Zɛn'ugʋn la.
10 Fʋ da maal zanbina nɛ nyalima nɛ kilima pa'al Faaro
nɛ o na'ayikpɛm nɛ teŋ la nidib wʋsa,
bɔzugɔ fʋ mi' Egipt dim la da dʋ'ʋsi ba mɛŋ
ka namisidi fʋ nidib la si'em.
Fʋ maal yʋ'ʋri tisi fʋ mɛŋ
ka li kpɛm bɛ hali nɛ zina.
11 Fʋ buak atɛuk ku'om, ka ba dɔl teŋ kpi'emisi lɔ'ɔŋ,
amaa ka fʋ lɛbis ku'om la pil banɛ kati ba la,
ka ba sim wʋʋ kugir nɛ.
12 Fʋ gaadi ba tuonnɛ an saŋgbauŋ nintaŋ
ka lɛn an nɛɛsim yʋ'ʋŋʋ nie tisi ba
pa'annɛ ba ban na dɔl suosi'a la.
13 Fʋ sig Sinai Zuor zug na.
Fʋ naam arezana ni ka pian' tisi ba.
Fʋ tisi ba zi'ela nɛ wada ka li an sʋm tisi ba
ka li an linɛ nar ka dɔl suor.
14 Fʋ kɛya ka ba baŋi fʋ Vʋ'ʋsʋm Daar la yɛla,
ka tis Moses zi'ela nɛ wada nɛ fʋ gban'ar wʋsa ye o tisi ba.
15 Kɔ'ɔm da mɔri ba ka fʋ kɛ ka diib yi arezana ni na ka ba di.
Ku'onuud da mɔri ba ka fʋ kɛ ka ku'om yi tampiingin na ka ba nu.
Fʋ yɛli ba ye ba kem sʋ'ʋg
teŋ kanɛ ka fʋ da pɔɔ zi'el ye fʋ na tisi ba la.
16 Amaa ti yaanam la da mɔr nyɛɛsim ka maal zukpi'euŋ
ka pʋ siaki fʋ nɔɔr zi'elʋgɔ.
17 Ba da zan'as ya ka pʋ kɛlisɛ,
ka tam tʋʋmnyalima banɛ ka fʋ da maali ba san'an la.
Ba da maal zukpi'euŋʋ zan'as ka gaŋ tuongat
bɔɔd ye ba lɛbi an yammis Egipt teŋin.
Amaa fʋ anɛ Wina'am kanɛ kɛt taali basid,
fʋ mɔr nimbaanlzɔɔr ka zɔti fʋ nidib nyɔɔg,
fʋ sʋnf pʋ duod tɔ'ɔtɔɔ ka fʋ nɔŋilim zu'oe,
dinzug ka fʋ pʋ basi baa,
18 hali baa ban da maal na'abil ba'ari tisi ba mɛŋ
ka yɛl ye, ‘Ya teŋgban onɛ mɔri ya yi Egipt na la nwa la,’
bɛɛ ban da tʋm tʋʋmbɛ'ɛdi san'ami fʋ yʋ'ʋr la.
19 Fʋ nimbaanlzɔɔri zu'oe la zug, fʋ da pʋ basi ba sian'arin la.
Nintaŋ wʋsa saŋgbauŋ la pʋ bɔdigid ka basidi baa,
bɛɛ nɛɛsim kanɛ pa'annɛ ba suor yʋ'ʋŋ la bɔdig ka kɛɛ baa.
20 Fʋ da tisi fʋ Siig onɛ an sʋm la na ka o pa'annɛ ba ban na niŋ si'em.
Fʋ da pʋ mɔŋi ba fʋ diib linɛ yʋ'ʋri buon manna la,
ka ku'onuud ya'a mɔri ba saŋsi'a fʋ tisidi ba ku'om.
21 Yʋma pisnaasi ka fʋ guri ba mɔɔgin,
si'el da pʋ pɔ'ɔgi ba,
ba fuud pʋ kpii ka ba nɔba mɛ pʋ mɔdɛ.
22 Fʋ kɛya ka ba nyaŋ na'anam nɛ buudi bɛdegʋ,
fʋ tisi ba teŋ la bɛn wʋsa.
Ba da faaɛn Hesbon na'ab Sihon teŋ
nɛ Basan na'ab Og teŋgbauŋ.
23 Fʋ kɛya ka ba biribis zu'oe nwɛnɛ nwadbibis banɛ bɛ saŋgbauŋin la,
ka mɔri ba keŋ kpɛn' teŋ la ni,
teŋ kanɛ ka fʋ da pɔɔ zi'eli ba yaanam ye ba sʋ'oe la ni.
24 Ba biis la da kpɛn' sʋ'ʋg teŋ la.
Fʋ da nyaŋ Keenan dim banɛ da dɛŋi bɛ teŋin la,
ka nɔk Keenan dim nɛ ba na'anam wʋsa niŋi ba nu'usin
nɛ nimbanɛ bɛ teŋin la ka ba da maali ba ban bɔɔd si'em.
25 Ba da faaɛn tɛɛns banɛ mɔr kpi'euŋ
nɛ zin'ibanɛ ka teŋ la mɔr kʋ'ʋlʋm la.
Ba da faaɛn ya' banɛ ka la'asʋma pɛ'ɛl la sʋ'ʋgi li,
nɛ bulis banɛ dɛŋi bɛɛ ani la,
nɛ vain tiis pɔɔd nɛ olif tiis,
ka tiis banɛ da wan la da ka' bɛnnɛ.
Ba da dii tig ka maal sumalisim
ka li anɛ yɛlsʋm kanɛ ka fʋ maali tisi ba la zug.
26 Amaa ba da pʋ siakɛ, ka zan'asi fʋ nɔɔr.
Ba da zan'asi fʋ wada la,
ka kʋʋ fʋ nɔdi'esidib banɛ da san'anɛ ba
ye ba lɛmmi fʋ san'an na la,
ka san'ami fʋ yʋ'ʋr hali.
27 Ka fʋ nɔki ba niŋi ba bi'emnam nu'usin ka ba namisi ba.
Amaa ban da nyɛ namisʋg ka kaasi tisif la,
fʋ naam arezana ni wʋm.
Fʋ nimbaanlzɔɔri zu'oe hali la zug
fʋ da tʋm tuongatibi tisi ba na
ka ba faaɛn ba, ba bi'emnam la nu'usin.
28 Amaa ban da nyɛ yɔlisim la ba da lɛn tʋm tʋʋmbɛ'ɛdi fʋ tuon,
fʋ da basi ba tisi ba bi'emnam ka ba sʋ'oe ba.
Ban da lɛn kaasi tisif la ka fʋ bɛ arezana ni ka wʋm,
ka fʋn an nimbaanlzɔt la zug ka fʋ faandi ba saŋa wʋsa.
29 Fʋ sa'ali ba ye ba dɔlli fʋ wada la,
ka ba maal nyɛɛsim ka zan'asi fʋ nɔzi'ela.
Ba tʋm tʋʋmbɛ'ɛd ka zan'asi fʋ wada la
linɛ ka sɔ' ya'a siak ka li an vʋm tis o sɔb la.
Ba maal zukpi'euŋ ka bidif kʋdig,
ka pʋ kɛlisidif hali baa bi'elaa.
30 Yʋma bɛdegʋ ka fʋ mɔr sumbʋgʋsʋm nɛ ba.
Fʋ siig la ka fʋ nɔki dɔlisi fʋ nɔdi'esidib la ni sa'ali ba.
La'am nɛ wala ba pʋ kɛlisɛ,
ka fʋ nɔki ba niŋi ba kpi'es nu'usin.
31 Amaa fʋ nimbaanlzɔɔri zu'oe la zug
ka fʋ pʋ basi ba ka li naae
bɛɛ fʋ tami ba yɛla,
fʋn an pʋpiel nɛ nimbaanlzɔt Wina'am la zug.
32 Oo ti Wina'am, fʋ anɛ Wina'am tita'ar
ka mɔr kpi'euŋ ka an onɛ ka ba zɔt!
Fʋ dɔlli fʋ nɔŋilim nɔnaar la.
Da kɛ ka namisʋg linɛ kɛɛn ti zugin na la an zaalim tisi fɔ;
namisʋg linɛ paae tinam nɛ ti na'anam nɛ tuongatib,
nɛ ti maanmaannib nɛ nɔdi'esidib la wʋsa,
namisʋg kanɛ da paae ti yaanam nɛ fʋ nidib la,
lin yi Asiria na'anam saŋa ti paae zina.
33 Bʋn linɛ maali ti la wʋsa, fʋn nan kpɛn anɛ sida sɔb.
Fʋn tʋm si'em la da anɛ sida
ka tinam din lɛɛ pʋ dɔl suorɛ.
34 Ti na'anam nɛ ti tuongatib nɛ ti maanmaannib la
nɛ ti yaanam la wʋsa pʋ dɔlli fʋ wada la,
ba pʋ kɛlisi fʋ nɔzi'ela
bɛɛ nimmua sa'al kanɛ ka fʋ sa'ali ba la.
35 Hali la'am nɛ ban da sʋ'oe ba na'am la
ka dit yɛlsʋm kanɛ ka fʋ tisi ba la
ka bɛ teŋ kanɛ yalim ka mɔr kʋ'ʋlʋm la,
ba pʋ na'asif bɛɛ fɛndig ka basi ba tʋʋmbɛ'ɛd la.
36 Amaa gɔsima, ti anɛ yammis nannanna
bɛ teŋ kanɛ ka fʋ tisi ti yaanam
ye ba di teŋ la nyɔɔd nɛ bʋnsʋŋ kanɛ bɛ teŋin la wʋsa.
37 Ti tʋʋmbɛ'ɛd la zug ka fʋ kɛ ka Na'abama sʋ'oe tinam
nɛ ti bʋnkɔnbid,
ka maannɛ ti ban bɔɔd si'em,
ka ti yʋ'ʋn bɛ namisʋg pʋʋgin la.”
Nidib la maal nɔnaar ka sɔbi digil
38 Ka Israel dim la da lɛn yɛl ye, “Nɛ'ɛnam wʋsa zug, ti na maal nɔnaar, ka sɔbi li ka ti tuongatib nɛ Levi dim nɛ maanmaannib la tiki ba nu'us.”