8
1 Nidib la wʋsa da la'as nɛ Ku'om Za'anɔɔr la tuon, ka yɛl Ezra onɛ pa'an wada la ye o nɔkim Moses wada gbauŋ kanɛ ka Zugsɔb da zi'el nɔɔri tis Israel dim la na.2 Li da anɛ nwadis ayɔpɔi la dabisir yinne daar ka Ezra onɛ an maanmaan la mɔr wada la nidib la tuon na. Banɛ da bɛɛ ani da anɛ dap nɛ pu'ab nɛ banɛ wʋsa na nyaŋi gban'e pian'ad gbin. 3 O da zi'enɛ ka o nindaa kpa' Ku'om Za'anɔɔr paalʋ zin'ig la, ka o karim gbauŋ la nidib la wʋsa tuon, lin pin'il bɛkɛung asuba hali ti paae nintaŋ. Ka nidib la kɛlisid wada gbauŋ la ka o karim la sʋ'ʋŋa.
4 Ba da maalnɛ daadi kpa' ka li dʋ ka Ezra dʋʋ zi'enɛ li zug, ba da maali li nɛ dabiskan la yɛla. Matitia nɛ Sema nɛ Anaya nɛ Uria nɛ Hilkia nɛ Maaseya da zi'enɛ o datiuŋ, ka banɛ da zi'e o dagɔbʋg la da anɛ Pedaya nɛ Misael nɛ Malkija nɛ Hasuem nɛ Hasiabadana nɛ Zakaria nɛ Mesulam.
5 Ezra da lak gbauŋ la ka nidib la wʋsa nyɛt o bɔzugɔ, on da zi'e si'el la ba da maali li ka li dʋʋ gaad nidib la zi'e si'el la. 6 Ezra da zun'e Zugsɔb onɛ an Wina'am tita'ar la ka nidib la wʋsa ʋki ba nu'us ka siak ye, “Ami! Ami!” Ka igin teŋinɛ zun'e Zugsɔb la ka ba nindaas kpa' teŋin.
7 Ka Levi dim la da tu'asid nidib la wada la gbin ka nidib la wʋsa zi'e. Levi dim la yʋda da anɛ Jesua nɛ Bani nɛ Sieribaya nɛ Akub nɛ Siabetaae nɛ Hodaya nɛ Maaseya nɛ Kɛlita nɛ Azaria nɛ Jozabad nɛ Pelaya. 8 Ba da karim Wina'am wada gbauŋ la, nie li pa'al nyain ka pa'ali li gbin ye nidib la gban'e ban karim si'el la gbin.
9 Nehemaya onɛ an gɔmena la nɛ Ezra onɛ an maanmaan ka an onɛ pa'an wada la nɛ Levi dim banɛ da pa'annɛ ba ka ba gban'adi li gbin la, yʋ'ʋn daa yɛli ba ye, “Dabiskaŋa anɛ ti Zugsɔb Wina'am la mɛŋ dabisir linɛ an kasi, dinzug, da kummi bɛɛ kaasida.” Bɔzugɔ nidib la wʋsa da wʋm ka ba karim wada la, ba da kaasidnɛ.
10 Nehemaya da yɛl ye, “Kem maali sumalisim, dimi disʋma ka nuue bʋmmalisa ka tis banɛ pʋ mɔr la. Dabiskaŋa anɛ Zugsɔb la din, da maannɛ sʋnsa'aŋa bɔzugɔ, Zugsɔb la sumalisim aan ya paŋ.”
11 Levi dim la da giligidi bɛlisid nidib la ka yɛti ba ye, “Aaɛn baanlimm ka zina anɛ kasi dabisiri tis Zugsɔb la, da maannɛ sʋnsa'aŋa.”
12 Ka nidib la keŋ di ka nu, ka tisid banɛ pʋ mɔr diibi na di la, ka maal sumalisim bɔzugɔ ba yʋ'ʋn da gban'e pian'ad linɛ ka ba pa'ali ba la gbin.
13 Dabiskanɛ paas ayi' la, yir kpɛɛmnam nɛ maanmaannib nɛ Levi dim da la'as Ezra onɛ pa'an wada la san'an na ye ba kɛlis wada la.
14 Ba da nyɛ wada gbauŋ la pʋʋgin ka Wina'am zi'el wada tis Moses ye Israel dim la anɛ ba bɛ sʋga ni nwadis ayɔpɔi malʋŋ la saŋa. 15 Ka li lɛm pa'al ye, ba mɔɔlim labakaŋa ba tempʋʋs la wʋsa nɛ Jerusalem tempʋʋgin, ka ye, “Yim keŋ kʋkʋna teŋin nwaae olif tiis banɛ bɛ pɔɔdin nɛ mɔɔgin la wila mɔri kena, ka bɔ tutuud nɛ kpʋkparis nɛ tiis banɛ mɔr ma'asim wila mɔri kena maal sʋga wʋʋ lin sɔb si'em la.”
16 Alazug ka nidib la da yii keŋ mɔr wila la lɛb na maal sʋga ba mɛŋ dɔɔd zugin nɛ ba za'asin nɛ Wina'am Pʋ'ʋsim Yir zakin la nɛ paalʋ zin'is linɛ bɛ Ku'om Za'anɔɔrin nɛ Efiram Za'anɔɔrin la. 17 Banɛ da yi Babilon n lɛb na la wʋsa da maali ba mɛŋ sʋga bɛɛ ani. Din yi Nun biig Josua saŋa ti paae daakan la, Israel dim nan zi' maal di'ema wʋʋ daakan la. Ba sumalisim la da zu'oe nɛ hali.
18 Dabisir wʋsa lin yi malʋŋ la pin'ilʋg daare ti paae li naar daar la, Ezra da karim Wina'am gbauŋ la. Ba da maal malʋŋ tiɛnr di'ema la nɛ daba ayɔpɔi, ka daba anii la daar ka ba wʋsa la'as zin'ig yinne nwɛnɛ wada la da zi'el si'em la.