Dataas nan kpɛn zi'e mɛɛb la yɛla
6
1 Labaar yʋ'ʋn da paae Sambalat onɛ an Horon nid la nɛ Tobaya nɛ Gesem onɛ an Arab buudi la nɛ banɛ wʋsa aan ti dataas la ye m mɛ' zaŋguom la ka wɛlʋg pʋ kpɛlim, hali saŋkan la ka m nam pʋ kpɛn'ɛs kʋlis za'anɔya la nii. 2 Sambalat nɛ Gesem da tisim tɔlʋŋ kaŋa ye, “Kem na ka ti sia'al taaba tembibis linɛ bɛ Ono paalʋ la yinne ni.” Amaa ba da dɔlisidim nɛ suobɛ'ɛd. 3 Ka m tɔlim lɛbisi ba ye, “M mɔri tʋʋm tita'ar hali ka kʋ nyaŋi kenaa, m na niŋ wala bas tʋʋma la ka kɛɛn ya san'an na?” 4 Nɔɔra anaasi ka ba tʋm na ka li anɛ labakan ma'aa, saŋkanɛ wʋsa ka ba tʋm na m ɛɛnti lɛbisi ba nɛ wʋʋ man da dɛŋin lɛbisi ba si'em la.5 Dinɛ paas anu la ka Sambalat lɛn tʋm o tʋmtʋm na nɛ labakan ya'as ka li sɔb gbauŋʋn, ka gbauŋ la nɔɔr pʋ tabili taasɛ, 6 ka gbauŋ la pʋʋgin sɔb ye,
“Tɛɛns banɛ giligi ti la dim nɛ Gesem mɛ yɛl ye li anɛ sida ye fʋn nɛ Jew dim gban'e nɛ pʋtɛn'ɛbɛ'ɛd, ye ya zan'as Na'ab la nɔɔr, linɛ kɛ ka ya mɛɛd zaŋguom la. Gbauŋ kaŋa pʋʋgin la lɛn sɔb ye, fʋ bɔɔd ye fʋ liebi ba na'ab, 7 hali ka gaans nɔdi'esidib ye ba mɔɔnnɛ fʋ yɛla Jerusalem ye; ‘Na'ab yʋ'ʋn bɛ Juda teŋin!’ Labakaŋa na paae Na'ab la dinzug, kem na ka ti pian' li yɛla.”
8 Ka m lɛbis o ye, “Fʋn pian'ad si'el la wʋsa ka' sidaa, li kʋdim anɛ fʋ mɛŋ pʋtɛn'ɛr ka fʋ pian'ad.”
9 Ba wʋsa da mɔɔdnɛ ye ba kpɛn'ɛsi ti dabiem ka tɛn'ɛsid ye li na kɛ ka ti bas ka tʋʋma la gʋ'ʋŋ naar. Ka m sɔs Wina'am ye, “Kpɛmisimim!”
10 Daar yinne ka m keŋ Delaya biig Semaya, onɛ yaabi an Mehetabɛl la yin ka o yɛl ye, “Kɛl ka ti keŋ kpɛn' Wina'am Pʋ'ʋsim Yir la Dɔɔg la pʋʋgin ka yɔ' Dɔɔg la za'anɔya bɔzugɔ, nidib kenna ye ba kʋʋf. Ba na kɛn yʋ'ʋŋa na kʋʋf.” 11 Amaa ka m lɛbis o ye, “Man na niŋ wala an dau ka zɔt dabiem? Bɛɛ man tiraan na kpɛn' Wina'am Pʋ'ʋsim Yin ye m faanm nyɔvʋrɛ? Ayei, m kʋ keŋɛ!” 12 M da baŋ ye li ka' Wina'am tʋm o naa, amaa li anɛ o mɛŋ pʋtɛn'ɛr ka o pian'adi m yɛla bɔzugɔ, Tobaya nɛ Sambalat da da' o. 13 Ba da' o nɛ ye o kpɛn'ɛs man dabiem ka m tʋm tʋʋmbɛ'ɛd ka ba tisim yʋ'ʋbɛ'ɛd ka faki m zug.
14 Ka m sɔs Wina'am ye, “M Wina'am, tɛnr Tobaya nɛ Sambalat yɛla, ban tʋm si'el la zug, ka mɛ tɛnr nɔdi'espu'ak Noadaya nɛ nɔdi'esidib banɛ bɔɔd ye ba kpɛn'ɛsim dabiem la.”
Tʋʋma la naar
15 Zaŋguom la mɛɛb da naae nɛ nwadig kanɛ yʋ'ʋri buon Elul la dabpii nɛ anu daar. Dabpisnu nɛ ayi' ka ti nɔki tʋm naae. 16 Ti dataas la wʋsa da wʋm la, dabiem da kpɛn' tembanɛ giligi ti la nidib, ka ba ti'ir wʋsa naae bɔzugɔ ba da baŋ ye ti Wina'am la sʋŋ ka tʋʋm kaŋa tʋm.
17 Dabisban la ni ya'as, Juda tuongatib da sɔbid gbana bɛdegʋ tisid Tobaya ka on mɛ sɔbidi tisidi ba. 18 Juda dim la da dɔl o nɛ yɛla ayi' yɛla, bɔzugɔ o diemi da an Arah biig Siekania, ka o biig Jehohanan mɛ di Berekaya biig Mesulam pu'ayua. 19 Nidib bɛdegʋ da kenna yɛt o tʋʋm sʋma yɛla ka m wʋm, ka lɛbidi yɛt o man yɛt si'el wʋsa. Ka Tobaya mɛ sɔbid gbana mɔɔd ye o kpɛn'ɛsim dabiem.