Nehemaya sʋŋ nɔŋ dim
5
1 Dap nɛ pu'ab da fabinnɛ ba Jew taaba maannɛ ba si'em la yɛla. 2 Sieba yɛt ye, “Tinam nɛ ti biribis nɛ ti bipumis la zu'oya; ti ya'a pʋ nyɛ diibɔ ti kʋ tiligɛ.”3 Ka sieba mɛ yɛt ye, “Kɔ'ɔm saŋa la ti daa mɔri ti paalʋ nɛ vain tiis pɔɔd nɛ ya' tisid ka li an kasɛt ka ti di'esid diibi dit ka kɔ'ɔm da kʋʋ tii, ka ti ya'a ti nyaŋi yɔ tinam on di'e.”
4 Ka sieba mɛ yɛt ye, “Ti daa pɛ'ɛŋ nɛ ligidi yɔ Na'ab lampɔ ti vain tiis pɔɔd yɛla. 5 La'am nɛ tinam nɛ areza'as dim la an buudi yinne ka ti biribis an sʋ'ʋŋa wʋʋ ba biribisi an sʋ'ʋŋa si'em la, ti gʋ'ʋŋi kuosi ti biribis nɛ ti bipumisi tisi ba ka ba liebi ba yammis. Ti bipumis la sieba pʋn anɛ yammis ka ti pʋ mɔri li paŋa bɔzugɔ ti paalʋ nɛ ti tiis pɔɔd la pʋn bɛ nɛ sieba nu'usin sa.”
6 Man wʋmi ba kaasig nɛ yɛlbanɛ ka ba yɛlim la ka m sʋʋnr da pɛlig hali. 7 Ka m tɛn'ɛsi li yɛla m sʋʋnrin sa ka zɛrig tuongatib nɛ kpɛɛmnam la, ka yɛli ba ye, “Ya namisidi ya taaba banɛ an Jew dim la la'apɛ'ɛŋir yɛla.”
Ka m buol nidib la bɛdegʋ ye ba la'asim taaba maal yɛl la. 8 Ka m yɛl ye, “Tinam mɔɔd hali ye ti da' ti Jew taaba banɛ ka ba kuosi tis teŋ zʋŋ dim la. Amaa yanamɛ kuosidi ya ba'abiis la tisid yiŋ, ka ba lɛn kuosi ba tis tinam ya'as!” Ka ba sin bɔzugɔ ba zi' ban na yɛl si'ela.
9 M lɛn yɛli ba ye, “Yanamɛ niŋid si'el la pʋ dɔl suorɛ. Li pʋ sʋm ye ya bɛ bɛllim kanɛ pa'al ye ya zɔti ti Wina'am laa? Amaa li ya'a ka' ala ti na di nyannɛ ti dataas banɛ ka' Jew dim la tuon! 10 Man nɛ m ba'abiis nɛ m nidib la sieba mɛ pɛmisid ligidi nɛ diibi tisid, amaa basimi ligidi pɛ'ɛŋir ye ya na di'e nyɔɔd bɛdegʋ! 11 Nɔkimi ba tiis pɔɔd nɛ ba ya' la lɛbisi tisi ba nannanna, nɛ nyɔɔd linɛ ka ya pʋn di'esi ba san'an linɛ an ligidi nɛ olif tiis pɔɔd nɛ zʋʋd nɛ vain tiis pɔɔd nɛ kpaam la.”
12 Ka ba lɛbis ye, “Ti na lɛbisi tisi ba. Ti kʋ lɛn di'e si'eli ba san'an ya'asɛ. Ti na niŋ wʋʋ fʋn yɛli ti si'em la.” Ka m buol maanmaannib la ka kɛ ka tuongatib nɛ kpɛɛmnam la pɔɔ zi'el ye ba na tʋm wʋʋ ban yɛli zi'el si'em la. 13 Ka mam mɛ yisi m fuug sɛnbidiŋ linɛ lɔɔm fuug la vɛnsigi vɛnsig ka yɛl ye, “Onɛ pʋ dɔl kaanb kaŋa, Wina'am na yis o sɔba vɛnsigi yis o, o yir la ni nɛ on mɔr si'el wʋsa ka kɛɛ o zaalim.” Ani ka nidib la wʋsa lɛbis ye, “Ami! Zun'omi Zugsɔb la.” Ka nidib la daa sid tʋm wʋʋ ban yɛl si'em la.
14 Na'ab Atazeesis n da di na'am la li yʋma pisi saŋa, ka ba da gaŋim ye m an Juda gɔmena la, hali ti paae yʋma pistan' nɛ ayi' nwa saŋa, man bɛɛ m ba'abiis la pʋ di diib linɛ ka ba pʋdigidi tisid ye li anɛ gɔmena diib la. 15 Amaa gɔmenanam banɛ dɛŋ man tuon la da ziil nidib la zitɛbisa bɔzugɔ, ba da di'esid nɛ anzurifa ligidi pisnaasi daar wʋsa ka lɛn di'esid diib nɛ daam paasid. Ba nya'andɔlib la mɛ da mugusid nidib la. Amaa Wina'am zɔtim zug man pʋ niŋid alaa. 16 Man lɛɛ da pɛsig nɛ m mɛŋ ye m tʋm zaŋguom la tʋʋma. M nidib la wʋsa da la'as anina ye ba tʋm, ka da pʋ ieed paalʋ baa yinne ye ti sʋ'oe ya. 17 Linɛ lɛm paas, Jew dim kɔbiga nɛ pisnu da dit man yin, la'am nɛ banɛ yi tɛɛns banɛ kpi'e nɛ ti la ni kɛɛn ti san'an na la. 18 Dabisir wʋsa m kʋʋdi lɔlig yinne, nɛ pɛ'ɛs ayuobʋ nɛ nɔɔs bɛdegʋ. Dabpiiga wʋsa m di'esid daam buudi wʋsa bɛdegʋ tisidi m saam. La'am nɛ nɛ'ɛŋa wʋsa man pʋ di'esid si'el man an gɔmena la zugɔ, bɔzugɔ m mi' ye ziid kanɛ bɛɛ ba zugin la zu'oya.
19 M Wina'am, m sɔsidif ye fʋ tɛnri m yɛla, nɛ man tʋm si'eli tis nimbama nwa la.