Dataas mɔ ye ba gu'oe zaŋguom la mɛɛb
4
1 Sambalat da wʋm ye ti lɛbi mɛɛd zaŋguom la, o sʋnf da pɛlig nɛ hali, ka o tʋ'ʋd Jew dim la ka la'adi ba. 2 O da zi'en o taaba nɛ Samaria soogianam la sʋʋgin ka yɛl ye, “Jew dim banɛ ka' kibar la maan bɔɔ la? Ba na nyaŋi mɛ' zaŋguom laa? Ba tɛn'ɛs ye ba ya'a maal maana ba na nyaŋi mɛɛ li daar yinne naae? Ba tɛn'ɛs ye ba na vaae kuga banɛ ka bugum di la yis sa'ad la ni na mɛ' ka li an sʋ'ʋŋa?” 3 Tobaya onɛ an Ammon nid la da zi'e kpi'e nɛ o ka yɛl ye, “Ban mɛɛd si'el la, hali baa piif ya'a ianki dʋʋ li zug ba kuga zaŋguom la na birig!”4 Ka m sɔs Wina'am ye, “Naa, ti Ba' Wina'am! Kɛlisim ban tʋ'ʋdi ti siem! Wʋmmi ti sɔsʋg, ka kɛ ka ba tʋ'ʋd la lɛbi ba zutin. Kɛl ka ba gban'e ba mɔri keŋ teŋ si'a ka ba an yammis. 5 Da yis nyannɛ ba zugin bɛɛ kɛɛ ba tʋʋmbɛ'ɛdi basɛ, bɔzugɔ ba tʋ'ʋdi fʋ nimbanɛ mɛɛd zaŋguom la.”
6 Ka ti lɛbisi mɛ' zaŋguom la paae li wa'alim la pʋsʋk bɔzugɔ nidib la da tʋmnɛ nɛ nimmua nɛ ba sʋnf wʋsa.
7 Amaa Sambalat nɛ Tobaya nɛ Arab dim nɛ Ammon dim nɛ Asdod dimi wʋm ye Jerusalem zaŋguom la mɛɛb ken tuon ka wɛn la wʋsa ɛnd la, ka ba sʋnf pɛlig hali. 8 Ka ba gban'e ye ba kena zab nɛ Jerusalem dim ka bɔ yɛla tisi ba. 9 Amaa ka ti sɔsi ti Wina'am la, ka zi'el nidib ye ba bɛ nintaŋ nɛ yʋ'ʋŋ wʋsa gu' banɛ bɔɔd ye ba zab nɛ ti la.
10 Juda dim mɛ da fabinnɛ yʋ'ʋm ye,
“Tʋmtʋmnib la gɛnnɛ,
tandia'ana mɛ zu'oe galis.
Ti kʋ nyaŋi mɛ' zaŋguom laa.”
11 Ka ti dataas la mɛ yɛl ye, “Ban ti ye ba baŋ bɛɛ nyɛɛ ti la, ka ti libigi ba kʋʋ ba ka ba tʋʋma la gu'oe.”
12 Ka Jew dim banɛ kpi'e nɛ ba la kena sa'ali ti nɔɔr piiga ye, “Baŋimi ka ba na nyaŋi dɔl zin'isi'a wʋsa kena libigi ya.”
13 Dinzug ka m zi'el ninsieba zaŋguom la zin'ibanɛ pʋ dʋ la ni, ka sieba zi'en yir-yir nɛ ba sʋ'ʋraad, nɛ kpana nɛ tiraad nɛ piema. 14 Man gɔs si'el wʋsa naae la, m yʋ'ʋn yɛl tuongatib la nɛ kpɛɛmnam nɛ nidib la wʋsa ye, “Da zɔti ya dataas la dabiem! Tɛn'ɛsimi ya Zugsɔb onɛ galis ka an bʋnzɔtir la yɛla, ka zabi faaɛn ya ba'abiis nɛ ya biribis nɛ ya bipumis nɛ ya pu'ab nɛ ya yidim wʋsa.” 15 Ti dataas la wʋm ye ti baŋi ba gban'ar la, ka Wina'am kɛnsi ba giinla, ka ti wʋsa lɛb zaŋguomin la ka sɔ' wʋsa lɛb o tʋʋma ni.
16 Lin yi daakan la, m nidib la pʋsʋk da bɛ nɛ tʋʋma la ni ka pʋsʋk mɛ zi'e nɛ kpana, nɛ gbanti'edis, nɛ tiraad nɛ piema. Zaba tuongatib la wʋsa da zi'en nɛ Juda nidib la wʋsa nya'aŋ, 17 saŋkanɛ ka ba mɛɛd zaŋguom la. Banɛ ziid mɛɛb la'ad la da tʋmnɛ nɛ nu'ug yinne ka zanl zaba la'ad nu'ug yinne. 18 Banɛ mɛɛd la mɛ da lɔnɛ ba zaba sʋ'ʋsi ba siɛn ka mɛɛd. Amaa ka onɛ piebid na'atan la kpɛm bɛ mam san'an. 19 Ka m yɛl tuongatib nɛ kpɛɛmnam nɛ nidib la wʋsa ye, “Tʋʋma la zu'oya ka ti mɛ lal nɛ taaba zaŋguomin la. 20 Ya ya'a ti wʋm na'atan la piebʋg zin'isi'a, yanam la'asimi anina ka ti Wina'am la na zabi tisi ti.”
21 Ka ti kpɛn tʋmmi ken tuon ka nidib la pʋsʋk zanl kpana, lin yi bɛogʋn ti paae yʋ'ʋŋ ka nwadbibis yina. 22 Saŋkan la ka m mɛ yɛl nidib la ye, “Kɛl ka dau wʋsa nɛ o tʋmtʋmnib gbɛɛnd Jerusalem tempʋʋgin. Ala ka ti na mɔr nidib ka ba gur yʋ'ʋŋ ka mɛ mɔr banɛ na tʋm nintaŋ.” 23 Mam bɛɛ m biis bɛɛ banɛ gur la pʋ yɛɛg fuugɔ. Sɔ' wʋsa da mɔr o zaba la'ad hali baa o ya'a keŋ ye o nu ku'om.