Banɛ mɛɛd zaŋguom la yɛla
3
1 Eliyaasib onɛ an maanmaan kpɛɛm la nɛ o maanmaan taaba la da keŋ tʋʋma la ni mɛ Pɛ'ɛs Za'anɔɔr la ka yɔ'ɔgi li ka maali li kʋlis la lɛbisi li zin'igin. Ka mɛ' zaŋguom la tɔ'ɔŋi paae zin'ikanɛ buon Kɔbiga Girimbisa la ka yɔ'ɔgi li, ka lɛm mɛɛ tɔ'ɔŋi paae Hananɛl Girimbisa la.2 Nidib banɛ bɛ Jeriko la da mɛɛ tɔlis ka Zakur onɛ an Imer biig la mɛɛ tɔlis.
3 Hasenaa biis la da mɛ' Zimi Za'anɔɔr la, ka da digil dabɛda la li zin'igin ka kpɛn'ɛs kʋlis la, ba mɛ da kpɛn'ɛs kʋntnam nɛ li daad banɛ ka ba kparid la.
4 Uria biig Meremof onɛ an Hakos yaaŋ la da mɛɛ tɔlis.
Onɛ da mɛɛ tɔ'ɔŋ ban tuon la da anɛ Berekaya biig Mesulam onɛ an Mesiezabɛl yaaŋ la.
Baana biig Zadok da mɛɛ tɔlis.
5 Linɛ kpɛlim la Tekoa dimi da mɛɛ tɔlis amaa ka ba tuongatib la zan'as ye ba kʋ tʋm nwɛnɛ banɛ gɔsid tʋʋma la yɛl ye ba mɛ' si'em la.
6 Pasia biig Joyada nɛ Besodeya biig Mesulam da mɛ' Jesiana Za'anɔɔr la. Ba da digil nɛ dabɛda ka kpɛn'ɛs kʋlis nɛ kʋntnam nɛ li daad.
7 Banɛ da mɛɛ tɔlis la anɛ nimbanɛ yi Gibeon nɛ Misipa na, ka ba anɛ Melataya onɛ yi Gibeon na nɛ Jadon onɛ yi Meronof na la. Efiritis Kɔldaug Lɔm sʋ'ʋlim Gɔmena la da sʋ'oe ba.
8 Uziel onɛ an Harhaya biig da mɛ' zin'ikan la tɔlis. O da anɛ banɛ kʋnt nɛ sanlima la yinne.
Ka Hanania onɛ maan bʋnnyubisa la da mɛ' zin'ikan la tɔlis. Ba da mɛɛ li paae Zaŋguom yalʋŋ la ni.
9 Rafaya onɛ an Hur biig ka sʋ'oe Jerusalem sʋ'ʋlim pʋsʋk la da mɛ' zaŋguom la zin'ikan la tɔlis.
10 Onɛ da mɛɛ tɔ'ɔŋ ani da anɛ Jedaya onɛ an Harumaf biig la, onɛ da mɛ' zin'ikanɛ tɔlis ka li kpi'e nɛ o yir la.
Hasiabineya biig Hatus da mɛɛ tɔlis on zugin la.
11 Harim biig Malkija nɛ Hasueb onɛ an Pahaf-Moab biig la da mɛ' zaŋguom la zin'ikan, nɛ Bodobodo Girimbisa la.
12 Halohes biig Salum onɛ da sʋ'oe Jerusalem sʋ'ʋlim pʋsʋk la da mɛɛ tɔ'ɔŋ ka o bipumis la sʋŋ o.
13 Hanun nɛ banɛ bɛ Zanoak teŋin la da mɛ' Bɔn'ɔg Za'anɔɔr la. Ba da mɛɛ li ka kpɛn'ɛs kʋlis nɛ kʋnt nɛ daad banɛ puug la li zin'igin. Ba mɛ da mɛ' zaŋguom la keŋ paae Na'ambin Za'anɔɔrin la, ka li wa'alim an nɔba makir tusir nɛ kɔbisnaasi nɛ pisnaasi la.
14 Rekab biig Malkija onɛ an Bet-Hakɛrem sʋ'ʋlim tuongat la da mɛ' Na'ambin Za'anɔɔr la. O da mɛɛ naae ka kpɛn'ɛs kʋntnam nɛ kʋlis nɛ li daad banɛ pʋʋg la lɛbisi li zin'igin.
15 Kol-Hose biig Salum onɛ sʋ'oe Misipa sʋ'ʋlim la da mɛ' Bulig Za'anɔɔr la. O da mɛɛ li ka pili li ka kpɛn'ɛs kʋlis nɛ kʋntnam nɛ daad banɛ puug la. O da lɛm mɛ' Siloam Bɛuŋ zaŋguom linɛ kpi'e Na'ab Lɔmbɔn'ɔg la mɔri paae dʋʋsa linɛ sigidi yit David Tempʋʋgin la.
16 On zugin la ka Azbuk biig Nehemaya onɛ an tuongat onɛ sʋ'oe Betzur teŋ sʋ'ʋlim pʋsʋk la da mɛɛ li. O da mɛɛ li lɛbisi keŋ paae David yaʋg baba mɔri paae bɛuŋ kanɛ ka ba gaae la nɛ zabzabidib la yir la.
17 On zugin la Levi dim da mɛɛ tɔlis. Bani biig Rehum da aan ba tuongat.
Ka on zugin la, Hasiabia onɛ an tuongat ka sʋ'oe Kiela teŋ sʋ'ʋlim pʋsʋk la da mɛɛ tis o sʋ'ʋlim dim la.
18 Henadad biig Binnu onɛ da sʋ'oe Kiela teŋ pʋsʋk la, da gaad tuon ka o teŋ dim mɛɛ tɔlis.
19 On zugin la Jesua biig Ezer onɛ an Misipa teŋin tuongat la da mɛɛ yi zin'ikan la dʋʋ paae zaba la'ad dɔɔg la keŋ paae zin'ikanɛ ka lɔdig bɛ la.
20 Zabai biig Baruk da kpɛ'ɛŋ o mɛŋi mɛɛ tɔlis. O da pin'il nɛ lɔdigin la mɛɛ keŋ paae maanmaan kpɛɛm Eliyaasib yir za'anɔɔrin la.
21 Uria biig Meremof onɛ an Hakos yaaŋ la da mɛ' Eliyaasib yir za'anɔɔrin la paae yir la bɛn.
22 Banɛ da mɛɛ tɔlis anɛ maanmaannib banɛ gilig Jerusalem baba la. Ba da mɛ' zin'ikan la tɔlis.
23 Banɛ da mɛɛ tɔlis ban zugin la anɛ Benjamin nɛ Hasueb. Ba da mɛnɛ ba mɛŋ ya' tuon la.
Maaseya biig Azaria onɛ an Ananaya yaaŋ la mɛ da mɛ' zin'ikanɛ kpi'e nɛ o mɛŋ yir la.
24 Henadad biig Binnu da lɛm mɛ' zin'ikan la tɔlis. O da mɛnɛ Azaria yin n keŋ paae lɔdig la nɛ gɔnligir la zin'igin.
25 Uzai biig Palal da mɛ' zin'ikanɛ kpa' lɔdig la nɛ Na'ayir linɛ bɛ Zugin la nɛ li girimbisa la, ka kpi'e teŋgu'udib zak la.
On zugin la, Paros biig Pedaya 26 nɛ Wina'am Pʋ'ʋsim Yir tʋmtʋmnib banɛ bɛ Ofel zuorin la da mɛ tɔlisi paae zin'ikanɛ kpa' Ku'om Za'anɔɔr la, lɛbis nya'aŋ, girimbisa la baba.
27 Tekoa dimi da lɛm mɛ' zin'isi'a pɛ'ɛs, ka tɔlisi li keŋ tʋn' girimbisa la ti paae Ofel zaŋguomin la.
28 Wief Za'anɔɔr zugin la, maanmaannib la da mɛ', sɔ' wʋsa o mɛŋ yituon.
29 Ban zugin la, Imer biig Zadok da mɛ' zin'ikanɛ kpa' o yituon la.
Onɛ da mɛɛ tɔlis anɛ Siekania biig Semaya onɛ gur Ya-nya'aŋ Za'anɔɔr la.
30 Ban zugin la Sielemaya biig Hanania nɛ Hanun onɛ an Zalaf biig kanɛ paas ayuobʋ la, da la'am mɛ' zin'ig yinne.
Ban zugin la, Berekaya biig Mesulam da mɛ' zin'ikanɛ kpa' nɛ o mɛŋ dɔɔg la.
31 On zugin la, Malkija onɛ kʋnt sanlima la da mɛɛ keŋ paae yir si'a ka Wina'am Pʋ'ʋsim Yir tʋmtʋmnib nɛ banɛ kpiisid la kpɛn'ɛd la, linɛ kpa' Viisʋg Za'anɔɔr la keŋ paae dɔkanɛ ka ba mɛɛ sʋn'ʋl lɔdig zaŋguom la zug.
32 Ka dɔkaŋa nɛ Pɛ'ɛs Za'anɔɔr la teŋsʋk la, banɛ kʋnt sanlima nɛ banɛ kpiisid la da mɛɛ li.