Nehemaya keŋ Jerusalem
2
1 Na'ab Atazeesis n da dii o na'am la, li yʋma pisi saŋa, nwadkanɛ yʋ'ʋri buon Nisan la ni, ka ba mɔr o daam na, ka m nɔk daam la tis Na'ab la, ka man nan zi' kpɛn' o san'an nɛ sʋnsa'aŋ la zug 2 ka bu'osim ye, “Bɔ ka fʋ nindaa pʋ lɔdigɛ ka fʋ mɛ pʋ bɛn'ɛda? Nɛ'ɛŋa ka' si'ela amaa li anɛ sʋnsa'aŋ ma'aa.”Ka dabiem kpɛn'ɛm hali. 3 Amaa ka m yɛl Na'ab la ye, “Naa, Na'aba, Wina'am na tisif nyɔvʋwɔk! M sʋnf na niŋ wala da san'am, ban mumi m yaanam zin'isi'a la on san'am ka kpɛlim dabɔɔd, ka bugum dii li za'anɔya la?” 4 Ka Na'ab la bu'osim ye, “Fʋ bɔɔd ye m niŋ bɔ tisi fɔ?” Ka m sɔs Arezana Wina'am la, 5 ka lɛbis o ye, “Naa, Na'aba, m anɛ fʋ sankpan'as. Li ya'a na malisi fʋ sʋnf, ka m ya'a na nyɛ suor, fʋn kɛl ka m keŋ Juda ban mumi m yaanam tempʋsi'a la mɛɛ li ya'as.” 6 Na'ab la da zin'inɛ kpi'e nɛ o pu'a kpɛɛm, ka bu'osim ye, “Fʋ ken la na yuugi paae wala; ka fʋ na lɛb saŋkanɛ na?” Ka linɛ pa'al ye Na'ab la da siak ye m keŋ. Ka m gban'e saŋa ka yɛl o. 7 M da lɛn yɛl Na'ab la ye, “Li ya'a paae fʋ ya'am, fʋn tisimim gbana ka m tis gɔmenanam banɛ bɛ Efiritis Kɔldaug Lɔm sʋ'ʋlim la ka ba basim suor ka m gaadi keŋ Juda. 8 Ka tisim gbauŋ ka m tis Asaf onɛ gur Na'ab tiis la, ka o tisim daad ka m maal kʋlisi kpɛn'ɛs Pʋ'ʋsim Yir la kpi'euŋ zin'ig za'anɔya, ka mɛ maal tempʋʋg la zaŋguoma, ka mɛ' zin'ikanɛ ka mam mɛŋ na bɛ.” Ka Na'ab la siak bɔzugɔ, m Wina'am la paŋ daa bɛ nɛ m ka kɛ ka Na'ab la tisim man sɔs si'el la. 9 Ala ka m keŋ Gɔmenanam banɛ bɛ Efiritis Kɔldaug Lɔm sʋ'ʋlim la tisi ba Na'ab gbana la. Na'ab la mɛ da kɛ ka soogianam nɛ banɛ ban'ad widi la dɔllimi keŋ.
10 Amaa Sambalat onɛ an Horon nid la nɛ Tobaya onɛ an Ammon dim kpɛɛm yinne da wʋm nɛ'ɛŋa la, li da daami banɛ, nɛ ban wʋm ye sɔ' kena ye o sʋŋ Israel dim ka ba bɛllim an sʋ'ʋŋa la.
Nehemaya kaae Jerusalem zaŋguoma gɔs
11 M da keŋ Jerusalem, ka man da bɛɛ ani daba atan' nya'aŋ la 12 m da duoe yʋ'ʋŋ nɛ dap bi'ela, ka nam pʋ yɛl sɔ'ɔsɔ m Wina'am la nɔk si'eli niŋi m sʋnfʋn Jerusalem yɛla laa. Ti da pʋ mɔr baa bʋnkɔnbsi'a keŋɛ, asɛɛ bʋŋ kanɛ ka m ban'ad la ma'aa. 13 Yʋ'ʋŋʋ sɔb la, ka m yii dɔl Bɔn'ɔg Za'anɔɔr la, dɔlli keŋ yi suor kanɛ ken Wɛbaas Buligin la ka gaadi keŋ Na'ambin Za'anɔɔrin la gɔsid Jerusalem zaŋguoma banɛ li la, nɛ za'anɔya banɛ ka bugum san'ami ba la an si'em. 14 Ka naanɛ ani kpa' Bulig Za'anɔɔr la, nɛ Na'ab Bɛuŋ la baba, amaa ka paalʋ la pɔɔd ka m bʋŋ la pʋ nyaŋi gaadɛ. 15 Ala ka m lɛbi keŋ Kidron bɔn'ɔgin la yʋ'ʋn gɔsid zaŋguoma la. Man naae la ka dɔl Bɔn'ɔg Za'anɔɔr la lɛb. 16 Kpɛɛmnam la da pʋ baŋ man keŋ si'ela bɛɛ man tʋm si'ela, bɔzugɔ m pʋ yɛl Jew dim la bɛɛ maanmaannib la. Ka mɛ pʋ yɛl tuongatib la bɛɛ kpɛɛmnam la bɛɛ banɛ na tʋm tʋʋma la si'ela.
17 Ka m yɛli ba ye, “Ya nyɛ tinamɛ bɛ yɛlsi'a nii? Bugum di Jerusalem za'anɔya la ka li lieb dabɔɔd. Kɛlli ka ti lɛbisi mɛ' Jerusalem zaŋguoma la, ka nyan kʋ lɛm bɛɛ ti zugin ya'asɛ!” 18 M mɛ yɛli ba m Wina'am la paŋi pʋn bɛɛ m san'an si'em, nɛ Na'ab la yɛlim si'em. Ka ba lɛbis ye, “Kɛlli ka ti lɛbisi mɛ' zaŋguoma la!” Ala ka ba da pin'il tʋʋm sʋŋ kaŋa.
19 Amaa Sambalat onɛ an Horon nid la nɛ Tobaya onɛ an Ammon dim kpɛɛm la, nɛ Gesem onɛ an Arab buudi la da wʋmi li, ka pin'ili tʋ'ʋd ka la'ad ka yɛt ye, “Ya niŋid bɔɔ nwa? Ya duonɛ zi'en ye ya zan'as Na'ab la nɔɔrɛ?”
20 Ka m gandigi ba ye, “Arezana Wina'am la na sʋŋi ti ka ti nyaŋ. Tinam banɛ aan o sankpan'asnam la na mɛɛ li, amaa yanam banɛ bɛ la, ya pʋ mɔr pʋʋr bɛɛ faar Jerusalem bɛɛ ya yʋ'ʋr pʋdig anii.”