Nehemaya
Nehemaya sɔs Wina'am
1
1 Nehemaya onɛ an Hakalaya biig la pian'adi nwa:Atazeesis n da di na'am la li yʋma pisi saŋa, nwadig kanɛ yʋ'ʋri buon Kisilef la ni, ka m bɛ Suosa tempʋʋgin. 2 Ka Hanani onɛ aan m ba'abiis la yinne nɛ o taaba da yi Juda kɛɛn m san'an na, ka m bu'osi ba Jew dim yɛla, ye m baŋ banɛ da an yammis Babilon teŋin ka lɛb na la an si'em, nɛ Jerusalem yɛla. 3 Ka ba yɛlim ye, “Banɛ lɛb na la bɛ nɛ yɛla ni hali, ba bɛllim an si'em la mɔri nyan. Jerusalem zaŋguoma la li nɛ, ka bugum di kʋlis banɛ bɛ za'anɔya ni la.”
4 Man wʋm nɛ'ɛŋa la ka zin'in teŋin kum. Dabisa bɛdegʋ ka m maal sʋnsa'aŋ ka lɔ nɔɔri sɔs Arezana Wina'am la. 5 Ka yʋ'ʋn yɛl ye,
“Zugsɔb Wina'am onɛ bɛ arezana, Wina'am tita'ar onɛ an nyalima sɔba, fʋ dɔlli fʋ nɔŋilim nɔnaar nɛ banɛ nɔŋif ka siakidi fʋ nɔzi'ela la. 6 Yɔ'ɔgimi fʋ tʋba ka laki fʋ nini ka wʋmi m sɔsʋg kanɛ ka m sɔsid nintaŋ nɛ yʋ'ʋŋ wʋsa fʋ sankpan'asnam banɛ an Israel dim la zug. Man viigid tinam Israel dim tʋʋmbɛ'ɛd, la'am nɛ mam mɛŋ nɛ m saam yidimi tʋm tʋʋmbɛ'ɛd si'em pɔ'ɔgif la. 7 Ti sid tʋm bugusim tʋʋmbɛ'ɛdi pɔ'ɔgif. Ti pʋ siaki dɔlli fʋ nɔzi'ela nɛ gban'ar nɛ wada banɛ ka fʋ da tisi fʋ tʋmtʋm Moses la. 8 Tɛn'ɛsim fʋn da gban'e si'em tis Moses la: fʋ da yɛl ye, ‘Ya ya'a pʋ dɔllim nɛ sidaa, m na widigi ya kpɛn'ɛs buudbanɛ bɛ la ni. 9 Amaa ya ya'a fɛndigi lɛbi m san'an na ka siak man zi'eli ya nɔsieba la, hali ya nidib ya'a bɔɔd ban widigi paae dunia nwa wʋsa, m na lɛn la'asi ba mɔri ba keŋ zin'ikanɛ ka m gaŋ ye ba pʋ'ʋsim la na.’ 10 Ba anɛ fʋ tʋmtʋmnib, nɛ fʋ mɛŋ nidib, ka fʋ da faaɛn ba yis na nɛ fʋ nu'ukpi'euŋ nɛ fʋ paŋ tita'ar la. 11 M Zugsɔba, kɛl ka fʋ tʋbir kɛlisi m sɔsʋg nwa. M anɛ fʋ tʋmtʋm, ka man nɛ fʋ tʋmtʋmnib banɛ wɔ'ɔgidi fʋ yʋ'ʋr nɛ sumalisim la bɛ kpɛla kpɛn sɔsidif nɛ nimmua. Man ye m kpɛn' dau nwa san'an zina la, asɛɛ fʋ kɛ ka m yɛla la maal.”
M da sɔs ala bɔzugɔ m da anɛ onɛ kuobid daam tisid Na'ab la.