Ezra sɔs Wina'am pu'adiir yɛla
9
1 Nɛ'ɛŋanamɛ niŋ la nya'aŋ, ka tuongatib la kɛɛn m san'an na yɛl ye, “Israel nidib la la'am nɛ maanmaannib nɛ Levi dim la pʋ baki ba mɛŋ nɛ nimbanɛ aan ba kpi'es banɛ tʋm linɛ kis la. Ba tʋmnɛ nwɛnɛ Keenan dim nɛ Hitti dim nɛ Perizi dim, nɛ Jebus dim nɛ Amor dim nɛ Moab dim nɛ Egipt dim nɛ Ammon dim la wʋsa. 2 Ban nɛ ba biribis dit buudbama pu'ayuos, ka li kɛ ka ba gɛndig nɛ teŋ la nimbanɛ ka' kasi la. Hali tuongatib nɛ kpɛɛmnam la da gaad tuonnɛ kɛ ka ba kpɛn' mɔɔg.” 3 Man wʋm nɛ'ɛŋa la, ka m sʋnf san'am ka m tɛki m fuugʋ aaɛn ka tɛki m zuobid nɛ m tieŋi vɔn' ka zin'in teŋin nɛ pakir.4 Li saŋa ka banɛ wʋsa da wʋm Israel Wina'am pian'ad ka dabiem gban'e ba la da la'as na giligim ka li anɛ nimbanɛ lɛb na la pʋ dɔl o nɛ sida la zug. Ka m zin'in anina nɛ sʋnsa'aŋ hali ti paae zaam maan saŋa. 5 Ka zaam maan saŋa paae la, ka m duoe man digin nɛ sʋnsa'aŋ zin'isi'a nɛ m fu-aanlima la, igini m duma zug ka ʋki m nu'us agɔla tisim Zugsɔb Wina'am, 6 ka sɔs ye,
“O Wina'am, nyan mɔrim nɛ hali nɛ man na gɔdigi m nindaa kpa'af, m Wina'am, bɔzugɔ ti tʋʋmbɛ'ɛd la zu'oe nɛ hali limi ti zut ka ti nyan dʋʋ paae agɔla. 7 Lin yii ti yaanam saŋa paae zina ti tʋʋmbɛ'ɛd la zu'oe nɛ. Ti tʋʋmbɛ'ɛd la zug ka teŋ zʋŋ na'anam la kʋʋ ti nɛ ti na'anam nɛ ti maanmaannib ka faaɛn ti la'ad ka gban'e ti sieba maali ti yammis ka namisi ti sieba diisi ti nyan hali ti paae zina. 8 Amaa nannanna ti nyɛ vʋ'ʋsʋm bi'ela, ti Zugsɔb Wina'am la kɛya ka ti bi'ela kpɛlim. Ka o tisi ti paalʋ o mɛŋ zin'ikanɛ an kasi la ni. Ti Wina'am la nie ti nini ka tisi ti yɔlisim bi'ela. 9 La'am nɛ tinamɛ an yammis la, ti Wina'am la pʋ basi ti ka ti kpɛn an yammisɛ, amaa ka pa'ali ti o pʋpielim ka kɛ ka Pesia Na'ab la tisi ti suor. O tisi ti bɛllim paal ye ti lɛbisi mɛ' Wina'am Yir la ka maal zin'ibanɛ san'am la lɛbis. O mɛ' zaŋguom Juda nɛ Jerusalem gu' ti. 10 Amaa ti na lɛn yɛl ye bɔ? Hali la'am nɛ wala wʋsa, ti pʋ nyaŋi dɔlisi fʋ nɔzi'elʋg 11 linɛ ka fʋ da pian' tisi fʋ nɔdi'esidibi yɛt ye, ‘Teŋ kanɛ ka ya kpɛn'ɛd ye ya sʋ'ʋg la anɛ teŋ kanɛ ka nidib la an tʋʋmbɛ'ɛd dim ka mɔr bugusim. Ba maan linɛ an yɛlkisa ka ba dian'ad tʋʋma la pɛ'ɛl zin'ig la wʋsa. 12 Dinzug, da nɔki ya bipumisi tisi ba biribis bɛɛ ya nɔki ba bipumisi tisi ya biribisɛ. Da bɔɔd ye yanam nɛ ban mɔr zuod baa bi'ela, ala ka ya na mɔr paŋ ka di bʋnsʋma banɛ bɛ teŋin la ka basi tisi ya biis ka li an faar linɛ ka' bɛnnɛ tisi ba.’ 13 Bʋn linɛ maali ti la anɛ ti tʋʋmbɛ'ɛd nɛ ti nyan tʋʋma la yɛla. La'am nɛ ala, ti Wina'am, ti namisʋg la pʋ zu'oe paae tʋʋmbɛ'ɛd kanɛ ka ti tʋm la. Amaa fʋ kɛya ka ti sieba nan vʋe. 14 Ka ti ya'a lɛn san'ami fʋ nɔzi'ela la ka di nimbanɛ tʋm yɛlbɛ'ɛd bama nwa la pu'asada, fʋ sʋnf kʋ pɛlig hali ka fʋ kɛ ka ti wʋsa kpi ka nid baa yinne kʋ kpɛlim? 15 Zugsɔb onɛ an Israel Wina'am, fʋ anɛ sida sɔb ka kɛ ka ti sieba nan vʋe la. Tinamɛ nwa zi'e fʋ tuon nɛ nyannɛ ti taal zug, nɛ' zug ka ti nid baa yinne kʋ nyaŋi zi'enɛ fʋ tuonnɛ.”