Ezra paae Jerusalem
7
1 Nɛ'ɛnam nya'aŋ li da yuugi ti paae Pesia na'ab Atazeesis n da di na'am saŋsi'a la, ka dau sɔ' da bɛ ka o yʋ'ʋr buon ye Ezra. O da anɛ Seraya biig ka o yaanam an Azaria nɛ Hilkia 2 nɛ Sallum nɛ Zadok nɛ Ahitub 3 nɛ Amaraya nɛ Azaria nɛ Merayof, 4 nɛ Zerahaya nɛ Uzi nɛ Buki 5 nɛ Abisua nɛ Finehas nɛ Eleazar nɛ Aaron onɛ da an maanmaan kpɛɛm la.6 Ezra kaŋa da yinɛ Babilon na. O da anɛ pa'an ka mi' Moses wada linɛ ka Zugsɔb onɛ an Israel Wina'am da tis la sʋ'ʋŋa. Na'ab la da tis o on sɔs si'el wʋsa, Zugsɔb onɛ aan o Wina'am la paŋi da bɛɛ o san'an la zug. 7 Israel dim la sieba mɛ da kɛn Jerusalem na, la'am nɛ maanmaannib nɛ Levi dim, nɛ yʋʋmyʋ'ʋmnib nɛ banɛ gur Pʋ'ʋsim Yir za'anɔya la nɛ Wina'am Pʋ'ʋsim Yir yammis la sieba, ka li da anɛ Na'ab Atazeesis na'am la yʋma ayɔpɔi saŋa.
8 Ezra da paae Jerusalem Na'ab la da di na'am la yʋma ayɔpɔi, nwadkanɛ pɛ'ɛs anu la ni. 9 O da duoe Babilon nwadkanɛ pin'il la ni li dabisir yinne daar, ka paae Jerusalem na nwadis anu la dabisir yinne daar. O da pʋ yuug suor zugɔ, o Wina'am onɛ an pʋpiel la paŋi da bɛɛ o san'an la zug. 10 Ezra da pɛsig o mɛŋ ye o zamis ka dɔlis Zugsɔb wada la, ka pa'annɛ li gban'ar nɛ wada la tis Israel dim la.
Na'ab Atazeesis sɔb gbauŋʋ tis Ezra
11 Na'ab Atazeesis da sɔb gbansi'a tis Ezra onɛ an maanmaan ka an pa'an la nwa: dau nwa zamis nɛ Zugsɔb zi'ela nɛ o gban'ar wʋsa tis Israel dim la:
12 Atazeesis onɛ an Na'anam Na'ab la sɔbidi tisid Ezra onɛ an maanmaan ka pa'an Arezana Wina'am wada la.
M pʋ'ʋsidif.
13 M zi'el nɔɔr ye, Israel ninkanɛ bɛɛ m sʋ'ʋlim nwa ni, la'am nɛ maanmaannib nɛ Levi dim la ya'a bɔɔd ye ba dɔlli fʋ keŋ Jerusalem ban dɔlli keŋ. 14 Na'ab la nɛ o nidib ayɔpɔi banɛ sa'an o la la'asi tʋmif ye fʋ keŋ Juda nɛ Jerusalem vɛɛnsi gɔs nidib la siakid Wina'am wada linɛ ka fʋ pa'an la si'em.
15 Dinɛ lɛm paas anɛ ye fʋ nɔk anzurifa nɛ sanlima linɛ ka Na'ab la nɛ o nidib tis Israel Wina'am onɛ ka o bɛllim zin'ig an Jerusalem la mɔri keŋ. 16 La'an di'e anzurifa nɛ sanlima Babilon sʋ'ʋlimin la wʋsa nɛ piini linɛ ka nidib nɛ maanmaannib la na tis nɛ ba ya'amlɛog, ka mɔri keŋ Wina'am Pʋ'ʋsim Yir linɛ bɛ Jerusalem la. 17 Kpɛmisimim ka nɔk ligidkaŋa da' na'araad nɛ pɛraad nɛ pɛribis nɛ zʋʋd nɛ bʋnnuuda keŋ Jerusalem teŋin maal maan Wina'am Pʋ'ʋsim Yir daka la zug.
18 Linɛ wʋsa ka fʋn nɛ fʋ nidib la gɔs ka li an sʋm ka ya na nɔk anzurifa nɛ sanlima linɛ kpɛlim la maal, yanam maalim, ka kɛ ka li dɔlli ya Wina'am la bɔɔdim an si'em. 19 Nɔkim la'abanɛ ka ba niŋi fʋ nu'ugin la tis Jerusalem Wina'am la ka ba na mɔri tʋmmi fʋ Wina'am Pʋ'ʋsim Yir tʋʋma. 20 Yanamɛ bɔɔd si'el wʋsa ya Wina'am Pʋ'ʋsim Yin la, fʋn yisim na'ayir ligidi la nii da'. 21 Mam Na'ab Atazeesis tis nɔɔr ye banɛ su'ad ligidi zin'ikanɛ lɔ'ɔŋ Efiritis Kɔldaug Lɔm sʋ'ʋlim la ye,
Ezra onɛ an maanmaan ka an onɛ pa'an Arezana Wina'am wada la ya'a bɔɔd si'eli ya san'an, yanam tisim o. 22 Tisimi ba anzurifa gbila bɔto kɔbisnu nɛ ki bielim bɔto kɔbisnu nɛ daam galam kɔbisyuobʋ nɛ olif kpaam galam kɔbisyuobʋ nɛ yaarim bɛdegʋ nwɛnɛ bam bɔɔd si'em la. 23 Arezana Wina'am la bɔɔd si'el yanam maalimi li sʋ'ʋŋa tis o Pʋ'ʋsim Yir la. Ya ya'a niŋ ala, bɔɔ na lɛn kɛ ka Zugsɔb la sʋnf pɛlig nɛ Na'ab la nɛ o biisɛ? 24 Baŋimi ye ya pʋ mɔr suori na mugus maanmaannib nɛ Levi dim nɛ yʋʋmyʋ'ʋmnib nɛ banɛ gur Pʋ'ʋsim Yir za'anɔya la nɛ Pʋ'ʋsim Yir tʋmtʋmnib bɛɛ banɛ sʋŋid nɛ Wina'am Pʋ'ʋsim Yir tʋʋma la ye ba yɔ lampɔɔ.
25 Ka fʋn Ezra na zaŋ ya'am kanɛ ka fʋ Wina'am tisif la gaans sariakatib ka ba gur nimbanɛ mi' fʋ Wina'am wada la wʋsa ka bɛ Efiritis Kɔldaug Lɔm sʋ'ʋlimin la nɛ sida. Ka mɛ pa'al banɛ zi' wada la ka ba baŋ. 26 Onɛ pʋ siaki fʋ Wina'am la wada bɛɛ Na'ab la wada ban namisim o. Li ya'a sʋm ye ba kʋʋ o bɛɛ ba kad o yis teŋin la, bɛɛ ba faaɛn o la'ad, bɛɛ ba kpɛn'ɛs o sanrega, ban niŋim ala.
Ezra pʋ'ʋs Wina'am bareka
27 M zun'od Zugsɔb onɛ aan ti yaanam Wina'am la, on kɛ ka Na'ab la tʋm linɛ mɔr na'asi ken Zugsɔb la Yin Jerusalem teŋin na la. 28 O mɛ pa'al on nɔŋim si'em Na'ab la nɛ o nidib nɛ o na'ayikpɛm banɛ mɔr paŋ hali la tuon. Zugsɔb onɛ aan m Wina'am la paŋi bɛɛ m san'an la zug ka m kpɛ'ɛŋi m mɛŋ ka la'as Israel tuongatib ka ba dɔllimi keŋ.