Na'ab Darius tis nɔɔr
6
1 Na'ab Darius tis nɔɔr ka ba ie gbana dɔɔg linɛ bɛ Babilon la pʋʋgin. 2 Ba da nyɛ gbansi'a ka li kpilim bɛ Egbatana Media teŋ sʋ'ʋlimin na'ayin, ka li pʋʋgin la sɔb ye,“Tiɛnr gbauŋ:
3 Sarus n da di na'am yʋʋm si'a la, o da tis nɔɔr Wina'am Pʋ'ʋsim Yir linɛ bɛ Jerusalem la yɛla ye,
‘Lɛbisim mɛɛi Wina'am Pʋ'ʋsim Yir la ka ba na maan maana anina. Ɛɛnbimi ɛɛnbir la, ka li wa'alim agɔla na an nɔba makir piswai ka li yalʋŋ an piswai. 4 Ka nɔki kugbɛda mɛɛ sʋn'ʋl nɔɔr atan', ka linɛ paas la na an daad. Na'ayir ligidi la ni ka ba na yɔɔ li sam. 5 Sanlima nɛ anzurifa la'abanɛ ka Na'ab Nebukadnɛza da yis Wina'am yin Jerusalem mɔri keŋ Babilon teŋin la, lɛbisimini ba, ba zin'igin Wina'am Pʋ'ʋsim Yin la.’ ”
6 Ka Na'ab Darius da sɔbi lɛbis ye,
“Dinzug fʋn Tatenaae onɛ an Efiritis Kɔldaug Lɔm Gɔmena la nɛ Siefa-Bozenaae nɛ yanam banɛ aan ba kpɛɛm taaba sʋ'ʋlim kan ni la, da li'elinɛ anii. 7 Da nɔki ya nu'ugʋ kpɛn'ɛs Wina'am Pʋ'ʋsim Yir tʋʋma la nii. Kɛlli ka Jew dim Gɔmena nɛ ba kpɛɛmnam la lɛbisi mɛ' Wina'am Pʋ'ʋsim Yir la li zin'igin.
8 Linɛ lɛm pɛ'ɛs la, m tis nɔɔr yanamɛ na maal si'eli tis Jew dim kpɛɛmnam la Wina'am pʋ'ʋsim yikaŋa mɛɛb yɛla:
Sam kanɛ ka nidib la kpɛn' wʋsa na'ayir la ligidi linɛ ka ba di'es Efiritis Kɔldaug Lɔm sʋ'ʋlimin la ka ba na yisi yɔ, ala ka tʋʋma la kʋ gu'oe. 9 Tisimi ba ban bɔɔd si'el wʋsa, li ya'a anɛ na'araad bɛɛ pɛraad, bɛɛ pɛribis ka ba bɔɔd ye ba maal maana tis Arezana Wina'am la, bɛɛ ba bɔɔdi ki bɛɛ yaarim bɛɛ daam bɛɛ kpaam. Maanmaannib banɛ bɛ Jerusalem la ya'a yɛli ya, yanam tisimi ba daar wʋsa 10 ka ba maal maana tis Arezana Wina'am la ka sɔs Wina'am tis Na'ab nɛ o biis la.
11 M lɛn tis nɔɔr ye, onɛ zan'as nɔzi'elkaŋa, ba na vuoɛn datita'ari o yin ka pʋlisi li nɔɔr yinne kʋns o niŋgbina tɔlig, ka kɛ ka o yir la lieb tampʋʋr. 12 Wina'am kanɛ kɛ ka o yʋ'ʋr bɛ anina la na kɛ ka na'ab bɛɛ ninkanɛ wʋsa duoe zi'en ye o tiak gban'akaŋa bɛɛ o san'am pʋ'ʋsim yikaŋa, o na'am la na li, ka gban'ar kan mɛ kʋ zi'enɛ.
Man Darius n tis nɔkaŋa. Kɛlli ka li tʋm wʋʋ man yɛl si'em la.”
Pʋ'ʋsim yir la mɛɛ naae ka ba yɔ'ɔgi li
13 Na'ab Darius n da tis nɔɔr la zug, Tatenaae onɛ an Efiritis Kɔldaug Lɔm sʋ'ʋlim Gɔmena la nɛ Siefa-Bozenaae nɛ ba taaba la da tʋmmi li sʋ'ʋŋa. 14 Ala ka Jew dim kpɛɛmnam la kpɛn ken tuon nɛ mɛɛb la, ka Wina'am nɔdi'esidib Hagai nɛ Zakaria onɛ an Iddo yaaŋ la da kpɛmisidi ba. Ba da mɛ' Pʋ'ʋsim Yir la naae wʋʋ Israel Wina'am yɛli ba si'em la. Ka mɛ dɔl wʋʋ Pesia na'anam Sarus nɛ Darius nɛ Atazeesis zi'el nɔɔr si'em la. 15 Pʋ'ʋsim Yir la mɛɛb da naae nɛ Ada nwadig la daba atan' daar, Na'ab Darius n da di na'am la li yʋma ayuobʋ saŋa.
16 Ka Israel nidib la nɛ maanmaannib nɛ Levi dim nɛ banɛ da an yammis ka lɛb na la da maal sumalisim bɛdegʋ ban yɔ'ɔgid Wina'am Yir la. 17 Wina'am Pʋ'ʋsim Yir yɔ'ɔgir la daar, ba da kʋnɛ na'araad kɔbiga maal maana, nɛ pɛraad kɔbisyi' nɛ pɛribis kɔbisnaasi, ka mɛ pɛ'ɛs bʋʋs pii nɛ ayi' ka li an tʋʋmbɛ'ɛd maan Israel dim dɔɔd pii nɛ ayi' la yɛla. 18 Ka ba kɛ ka maanmaannib la zin'ini ba zin'isa ni, ka Levi dim la zin' bɛn-bɛn ye ba tʋm Wina'am Pʋ'ʋsim Yir tʋʋma Jerusalem teŋin ka li dɔl wʋʋ Moses Gbauŋʋ sɔb si'em la.
19 Nwadig kanɛ an yiiga la dabpii nɛ naasi daar, banɛ da naan Babilon n kul na la da maal Kum Maliak Gaadʋg malʋŋ. 20 Maanmaannib nɛ Levi dim la wʋsa da dɛŋi pie ba mɛŋ ka maali ba mɛŋ nyain wʋʋ malima la sʋm ye ba maali ba mɛŋ nyain si'em la. Levi dim la da maal Kum Maliak Gaadʋg malʋŋ pɛribis la tis banɛ da lɛb na la nɛ ba ba'abiis nɛ maanmaannib la nɛ ba mɛŋ wʋsa. 21 Ka Israel dim banɛ da lɛbi kul na la dii li, nɛ banɛ maali ba mɛŋ nyain baki ba mɛŋ nɛ dian'ad tʋʋma linɛ ka ba kpi'es banɛ ka' Israel dim da tʋm la, ye ba nyaŋi li'el Zugsɔb onɛ an Israel Wina'am la. 22 Daba ayɔpɔi ka ba maal bodobodo linɛ pʋ gɛndig danbin la di'ema nɛ sumalisim bɔzugɔ, Zugsɔb la da kɛ ka ba sʋnf ma'ae nɛ on tiak Asiria Na'ab la pʋtɛn'ɛr ka o sʋŋi ba nɛ Israel Wina'am yir tʋʋma la.