5
1 Wina'am nɔdi'esidib Hagai nɛ Zakaria onɛ an Iddo yaaŋ la, da di'e Wina'am pian'adi tis Jew dim banɛ bɛ Juda nɛ Jerusalem. Ba da pian'adi tisidi ba nɛ Israel Wina'am onɛ sʋ'oe ba la yʋ'ʋr zug. 2 Sealtiel biig Zerubabɛl nɛ Jesua onɛ an Jozadak biig la da duoe zi'en ye ba mɛ' Wina'am Pʋ'ʋsim Yir la Jerusalem teŋin. Ka Wina'am nɔdi'esidib bɛɛ ani sʋŋidi ba.3 Saŋkan la Tatenaae onɛ an Efiritis Kɔldaug Lɔm Gɔmena la nɛ Siefa-Bozenaae nɛ ba taaba la keŋ bu'os ye, “Anɔ'ɔn tisi ya suor ye ya lɛbisi mɛ' Pʋ'ʋsim yir nwa?” 4 Ka lɛm bu'os ye, “Anɔ'ɔnama mɛɛd Zugsɔb Pʋ'ʋsim yir la?” 5 Amaa Wina'am nini da kpɛn kpa'anɛ gɔsid Jew dim kpɛɛmnam la ka ba da pʋ nyaŋi kɛ ka ba bas mɛɛb la ti paae saŋkanɛ ka labaar paae Na'ab Darius ka o sɔbi lɛbis na la.
6 Tatenaae, onɛ an Efiritis Kɔldaug Lɔm Gɔmena la nɛ Siefa-Bozenaae nɛ ba taaba nɛ Efiritis Kɔldaug Lɔm sʋ'ʋlim la kpɛɛmnam da sɔb gbauŋ ye ba keŋ tis Na'ab Darius. 7 Ban da sɔbi li si'em nwa:
Ti sɔbid nɛ tisid Na'ab Darius:
Naa, ti pʋ'ʋsidif sʋ'ʋŋa.
8 Naa, Na'aba, ti bɔɔd ye fʋ baŋ ye ti keŋ Juda teŋin Wina'am onɛ galis la Pʋ'ʋsim Yin. Nidib la mɛɛdi li nɛ kugtitada ka pa'an dabɛda zaŋguom la zug. Ba mɛɛdi li sʋ'ʋŋa ka tʋʋma la ken tituaa nwɛnɛ ban bɔɔd si'em. 9 Ka ti bu'os kpɛɛmnam la ye, “Anɔ'ɔn tisi ya suor ye ya lɛbisi mɛ' nɛ'ɛŋa zi'elɛ?” 10 Ti mɛ lɛm bu'os ye ti baŋi ba tuongatib la yʋda ka tisif labaar. 11 Ban lɛbisi ti si'em nwa: “Ti anɛ Arezana nɛ Dunia Wina'am la yammis, ka ti lɛbisidi mɛɛd o yir linɛ ka ba da mɛ' yʋma bɛdegʋ banɛ gaad la, yir kanɛ ka Israel na'atita'ar sɔ' da mɛɛ naae la. 12 Amaa ti yaanam da kɛ ka Arezana Wina'am la sʋnf pɛlig ka o kɛ ka Babilon na'ab Nebukadnɛza, onɛ da an Kaldea buudi na'am tuŋʋn nid la, zabi nyaŋ teŋ la ka san'am Wina'am pʋ'ʋsim yikaŋa ka gban'e nidib la mɔri keŋ Babilon teŋin. 13 Nɛ lin wʋsa, Babilon na'ab Sarus n da dii o na'am yʋʋm si'a la, o da tis nɔɔr ye ba lɛbisi mɛ' Wina'am Pʋ'ʋsim Yir la. 14 O da ie sanlima nɛ anzurifa la'abanɛ ka Nebukadnɛza da vaae Wina'am Pʋ'ʋsim Yin la su'a Babilon Na'ayir pʋʋgin ka nɔki li yis na lɛbisi tis dau onɛ yʋ'ʋri buon Siesibaza, ka Na'ab Sarus mɛŋ da nɔk o zi'el ye o an gɔmena la. 15 O da yɛl o ye o nɔkim la'abama mɔri keŋ Jerusalem digil Wina'am Pʋ'ʋsim Yin la, ka lɛbisi mɛ' Wina'am Pʋ'ʋsim Yir la li zin'igin.
16 Siesibaza sid da duoe kena ɛɛnb Wina'am Pʋ'ʋsim Yir la Jerusalem teŋin. Lin yi saŋkan la paae nannanna ba nan kpɛm bɛ nɛ yir la mɛɛbin, amaa li nam pʋ naae.
17 Naa, Na'aba, fʋ ya'a bɔɔd fʋn kɛ ka ba gɔs Babilon na'am gbana la ni vɛɛnsi gɔs ye, Na'ab Sarus sid da tis nɔɔr ye ba lɛbisi mɛ' Wina'am Pʋ'ʋsim Yir la Jerusalem teŋin, bɛɛ o da pʋ tisɛ? Ka yɛli ti fʋn gban'e si'em yɛl kaŋa pʋʋgin.”