Ba dataasi mɔ ye ba gu'oe tʋʋma la si'em
4
1 Juda nɛ Benjamin dataas la da wʋm ye banɛ da an yammis ka lɛb na la mɛɛd Zugsɔb onɛ an Israel Wina'am Yir la, 2 ba da kɛn Zerubabɛl nɛ kpɛɛmnam la san'an na yɛli ba ye, “Kɛlli ka ti mɛɛ sʋŋi ya bɔzugɔ, tinam nɛ yanam anɛ yinne, ka ti pʋ'ʋsid Wina'am kanɛ ka ya pʋ'ʋsid la ka maan maana tisid o lin yi saŋkanɛ ka Asiria na'ab Esaraddon mɔri ti kɛn kpɛla na la.” 3 Amaa Zerubabɛl nɛ Jesua nɛ kpɛɛmnam banɛ bɛ Israel la wʋsa da lɛbisi ba ye, “Ya ba'a ka' ti san'an ka ya na sʋŋi mɛɛ ti Wina'am Yir la. Tinam ma'aa na mɛɛ ti Zugsɔb onɛ an Israel Wina'am la Yir, nwɛnɛ Pesia na'ab Sarus n tisi ti nɔɔr si'em la.” 4 Ka nimbanɛ giligi ba la wʋsa yina mɔɔd ye ba kpɛn'ɛs Juda dim la dabiem ka li kɛ ka ba tadig ka mɛɛb la da keŋ tuonnɛ. 5 Ka ba da' nidib ye ba kpɛ'ɛŋi san'ami ba gban'ar la Pesia na'ab Sarus na'am diib saŋa la wʋsa, keŋ paae Pesia na'ab Darius na'am diib saŋa.Na'ab Atazeesis tis nɔɔr ye ba basim Jerusalem mɛɛb
6 Li da anɛ ala ya'as saŋkanɛ ka Pesia na'ab Atazeesis da dii o na'am yʋʋm si'a la, ka ba da ma' ziri ziil Juda nɛ Jerusalem dim. 7 Bisilam nɛ Mitredaf nɛ Tabeel nɛ ba taaba la wʋsa la'asi sɔb gbauŋʋ tis Na'ab Atazeesis. Gbauŋ la da sɔbnɛ nɛ Aram buudi pian'ad.
8 Rehum onɛ an kpɛɛm la nɛ Simsaae onɛ an gbansɔbid la da sɔb gbauŋ Jerusalem dim yɛla bɛ'ɛdi tis Na'ab Atazeesis yɛt o ye;
9 “Rehum onɛ an kpɛɛm la, nɛ Simsaae onɛ an gbansɔbid la, nɛ ba taaba banɛ an sariakatib nɛ kpɛɛmnam banɛ sʋ'oe nimbanɛ yi Tripolis la, nɛ Pesia dim nɛ Erek nɛ Babilon dim, nɛ Elam dim banɛ yi Susa tempʋʋgin la, 10 nɛ nimbanɛ ka Na'ab Asubanipal onɛ da an nintita'ar ka an girima sɔb mɔri ba lɛbis na ka ba zin' Samaria tempʋʋgin nɛ banɛ bɛ Efiritis Kɔldaug Lɔm sʋ'ʋlimin la.”
11 Ban sɔb gbauŋ si'a tis o la yɛl si'em nwa:
“Na'ab Atazeesis,
Tinam banɛ aan fʋ yammis ka bɛ Efiritis Kɔldaug Lɔm sʋ'ʋlimin la sɔbidi tisidif ye, 12 Na'aba, baŋim ye Jew dim banɛ yii fʋ san'an kena la keŋ Jerusalem lɛm mɛɛd tempʋkanɛ an tembɛ'ɛd ka ki'isid na'anam nɔɔr la. Ba lɛb nɛ mɛɛd zaŋguoma la ka maannɛ li ɛɛnbir la sʋ'ʋŋa.
13 Na'aba, mɛ baŋim ya'as ye, ba ya'a mɛ' tempʋkaŋa nɛ li zaŋguoma la wʋsa lɛbisi zi'el, ba kʋ lɛn yɔ lampɔ nɛ ligidkanɛ nar ye ba yɔ wʋsa bɛɛ ba na'as fʋn na'ab la. Ba ya'a niŋ ala fʋ na'ayir ligidi la na sie. 14 Tinamɛ an banɛ bɔɔd na'ayir la yɛla hali la, li pʋ sʋm ka ti zin' gɔsid ka ba nɛ'ɛsid Na'ab la anwana. Linɛ kɛ ka ti tisid Na'ab la labakaŋa. 15 Ti sɔs nɔɔri yɛt ye, fʋ ieem yɛlkʋda bɛ zin'isi'a ka na'anam banɛ da dɛŋi gaad da sɔbi ba gbana digil la. Fʋ ya'a gɔs gbambama ni fʋ na nyɛ ka tempʋʋg kaŋa nidib anɛ banɛ zan'asid na'anam nɔɔr ka an banɛ ieed yɛla kʋdimin sa. Linɛ da kɛ ka ba san'am tempʋkaŋa la. 16 Ti yɛt na'ab la nɛ ye, ba ya'a mɛ' tempʋkaŋa nɛ li zaŋguoma la wʋsa lɛbisi zi'el, fʋ kʋ lɛn nyɛ si'el Efiritis Kɔldaug Lɔm la ya'asɛ.”
17 Na'ab la lɛbis si'eli nwa:
“Rehum onɛ an kpɛɛm nɛ Simsaae onɛ an gbansɔbid, nɛ ba taaba banɛ bɛ Samaria nɛ banɛ bɛ Efiritis Kɔldaug Lɔm sʋ'ʋlimin la, m pʋ'ʋsidi ya wʋsa.
18 Gbauŋ kanɛ ka ya sɔb la, ba karimi li ka tu'asi li gbinni m tuon. 19 M tis nɔɔr ka ba vɛɛnsi nyɛ ka tempʋʋg la mɔr pian'akʋda linɛ pa'al ye ba anɛ banɛ pʋ na'asid na'anama ka an banɛ duoe zi'e na'anam yɛla, ka ieed yɛla. 20 Jerusalem da mɔr na'anam banɛ mɔr kpi'euŋ, ka sʋ'oe Efiritis Kɔldaug Lɔm sʋ'ʋlim la wʋsa ka ba yɔɔd lampɔ nɛ ligidkanɛ nar ye ba yɔ wʋsa tisidi ba. 21 Nannanna, yɛlimi nidib la ka ba bas tempʋʋg la mɛɛbi ti paae saŋkanɛ ka m na bas suor ye ba mɛɛm. 22 Gɔsim maali yɛl la tɔ'ɔtɔ ka da kɛ ka li yuugɛ, ya'a ka' alaa ba na duoe tʋm linɛ na kɛ ka m na'am la nyɛ pɔ'ɔgir.”
23 Ban da karim Na'ab Atazeesis gbauŋ la tis Rehum nɛ Simsaae onɛ an gbansɔbid nɛ ba taaba la, ba duoe tɔ'ɔtɔ keŋ Jew dim la san'an Jerusalem teŋin yɛli ba ye ba da lɛm mɛ' tempʋʋg la ya'asɛ. Ka mugusi ba ka ba bas mɛɛb la.
24 Alazug ka Wina'am Pʋ'ʋsim Yir tʋʋma Jerusalem teŋin la da pʋ lɛn keŋ tuonnɛ ti paae Pesia na'ab Darius n da dii o na'am la yʋma ayi' saŋa la.