Zugsɔb maan daka maalʋg
3
1 Israel dimi zin'ini ba tempʋʋsin la yʋʋm si'a la, li nwadis ayɔpɔi la saŋa, nidib la da la'as nɛ nɔɔr yinne Jerusalem. 2 Ka Jesua onɛ an Jehozadak biig la nɛ o maanmaan taaba, nɛ Zerubabɛl onɛ an Sealtiel biig la nɛ o taaba, da pin'ili mɛɛd Israel Wina'am la maan bimbim ye ba maal nyu'or maana li zug, nwɛnɛ lin sɔb Moses onɛ da an Wina'am nid la wada gbauŋʋn si'em la. 3 La'am nɛ ban da zɔt nimbanɛ giligi ba la dabiem la, ba da mɛ' bimbim la li zin'igin ka maal maana li zugʋ tis Zugsɔb la. Ba da maannɛ bɛogʋn nɛ zaam maana la wʋsa. 4 Ba da maal Sʋga Gbɛɛnb Malʋŋ nwɛnɛ lin da sɔb si'em la, ka maal maana linɛ nar ye ba maal dabisa wʋsa si'em. 5 Lin nya'aŋ ka ba maal maana linɛ ka ba maan saŋa wʋsa la. Ba da maal nwadpaalig maana, nɛ dabisbanɛ ka ba maan maana tisid Zugsɔb la, ka la'am maan ya'amlɛog maana tisid o. 6 Nwadis ayɔpɔi la pin'ilʋg daar ka ba pin'ili maal nyu'or maana tis Zugsɔb la, la'am nɛ saŋkan la ka ba da nam pʋ ɛɛnb Zugsɔb Yir la.7 Ka ba nɔk ligidi tis tanmɛɛdib nɛ kampintanam. Ka tis Sidon nɛ Taya dim la diib nɛ bʋnnuuda nɛ kpaam ka kɛ ka ba mɔr na'aziinr daadi yi Lebanon n dɔlisi atɛuk la kɛn Joppa teŋin na wʋʋ Pesia na'ab Sarus tis nɔɔr si'em la.
Ban ɛɛnb Zugsɔb la Pʋ'ʋsim Yir nɛ sumalisim la yɛla
8 Ban da paae Wina'am Yin Jerusalem teŋin na la, li yʋma ayi' saŋa nwadig kanɛ pɛ'ɛs ayi' la, Zerubabɛl onɛ an Sealtiel biig la nɛ Jesua onɛ an Jozadak biig la nɛ ba ba'abiis la wʋsa (banɛ an maanmaannib nɛ Levi dim la nɛ banɛ da an yammis teŋ zʋna ni la lɛb Jerusalem na la wʋsa) da pin'il tʋʋma la. Ba da gaans Levi dim banɛ an yʋma pisi bɛɛ gaad ala ye ba an tʋʋma la kpɛɛmnam ka gɔs Zugsɔb Pʋ'ʋsim Yir la mɛɛb yɛla. 9 Jesua nɛ o biis nɛ o ba'abiis, nɛ Kadmiel nɛ o yaas (banɛ an Hodavia yaas la) nɛ Henadad biribis nɛ ba biis nɛ ba ba'abiis nɛ Levi dim la wʋsa da la'as nɛ sʋŋidi gɔsid banɛ tʋm Wina'am Pʋ'ʋsim Yir tʋʋma la. 10 Tanmɛɛdib la da ɛɛnb ɛɛnbiri naae la, maanmaannib la da yɛɛ ba fuud ka nɔki ba na'atana, ka Levi dim banɛ an Asaf tuŋ dim la da mɔri ba galana duoe zi'enɛ ba zi'esa ni ye ba zun'e Zugsɔb la wʋʋ Na'ab David n da zi'el si'em la. 11 Ba da yʋ'ʋmmi zun'od Zugsɔb la ka pʋ'ʋsid o bareka ye,
“Zugsɔb la an sʋm
o nɔŋilim la bɛnɛ saŋa linɛ ka' bɛnnɛ
tisid Israel dim la.”
Ka nidib la zun'od Zugsɔb la agɔla gɔla, ban ɛɛnb Zugsɔb Yir la zug. 12 Amaa maanmaan kʋda la bɛdegʋ nɛ Levi dim la nɛ yir kpɛɛmnam banɛ da mi' nyɛ Wina'am yikanɛ da dɛŋi bɛ la da kumnɛ agɔla gɔla ban nyɛ ka ba ɛɛnb ɛɛnbir la si'em la zug, amaa ka ninsieba mɛ maan sumalisim. 13 Sɔ' da kʋ nyaŋi bak sumalisim tʋkpiidʋg la nɛ banɛ kaasid la tʋkpiidʋgɔ bɔzugɔ, tʋkpiidʋg la da zu'oe nɛ galis. Banɛ wʋsa bɛ lalli la da wʋm tʋkpiidʋg la.