David n gban'e gban'ar Pʋ'ʋsim Yir la yɛla
28
1 David da buol Israel kpɛɛmnam la wʋsa ka ba la'as Jerusalem tempʋʋgin na. Ba da anɛ dɔɔd la kpɛɛmnam, nɛ kpɛɛm banɛ gɔsid banɛ tʋm Na'ab tʋʋma la, nɛ banɛ gat zabzabidib tusir-tusir bɛɛ kɔbig-kɔbig tuon la, nɛ kpɛɛm banɛ gɔsid Na'ab la nɛ biribis la la'ad nɛ ba bʋnkɔnbid la, la'am nɛ na'ayikpɛm, nɛ zaba tuongatib nɛ zabzabidib banɛ sʋnfʋ kpi'em la.2 Na'ab David da duoe zi'enɛ o nɔba zug ka yɛli ba ye, “Kɛlisimi, m ba'abiis nɛ m nidiba! M daa gban'e m sʋnfʋn ye m mɛ' yir ka li an vʋ'ʋsʋm zin'igi tis Zugsɔb nɔnaar Daka la, ka an Wina'am nɔba zi'elʋg zin'ig. M daa gban'e ye m mɛɛ li, 3 amaa Wina'am daa yɛlim ye, ‘Li ka' fʋnɛ na mɛ' yiri tis mam yʋ'ʋrɛ, bɔzugɔ fʋ anɛ zabzabid ka yis ziim bɛdegʋ.’
4 “La'am nɛ wala Zugsɔb onɛ an Israel Wina'am la gaŋ mam, m yidim la wʋsa sʋʋgin ye m an Israel na'ab yʋma linɛ ka' bɛnnɛ. O da gaŋ Juda ye o an tuongat, Juda dɔɔg la ni ka o gaŋ man zakin la, ka li niŋ o malisim ka o gaŋ mam m saam biisin la diis Israel wʋsa na'ab. 5 Zugsɔb la tisim biribis bɛdegʋ, ka ba wʋsa sʋʋgin o gaŋi m biig Solomon ye o zin'in na'am gbauŋ la zugʋ sʋ'oe Zugsɔb sʋ'ʋlim gɔsid Israel wʋsa. 6 O da yɛlim ye, ‘Solomon onɛ aan fʋ biig la na mɛɛ m yir la, bɔzugɔ manɛ gaŋ o ye o aan m biig ka man na aan o saam. 7 M na kɛ ka o sʋ'ʋlim la zi'en saŋa linɛ ka' bɛnnɛ, o ya'a kpɛn siakidi m nɔzi'elʋg nɛ wada la wʋʋ lin an si'em nannanna.’ ”
8 Na'ab David da lɛn yɛli ba ye, “Alazug m yɛli ya, Israel dim wʋsa nini ni, nɛ Zugsɔb nimbanɛ la'as la tuon, nɛ Wina'am mɛŋ tʋba ni: gu'usimi ka dɔl Zugsɔb onɛ aan ya Wina'am la, ka sʋ'ʋgi teŋ la hali ka ti basi tisi ya yaas ka li an faar saŋa linɛ ka' bɛnnɛ. 9 Ka fʋn onɛ aan m biig Solomon nɛ, baŋim Wina'am onɛ aan fʋ saam Wina'am la, ka dɔl o nɛ fʋ sʋnf wʋsa ka pɛsigi fʋ mɛŋi tis o, ka Zugsɔb la mi' sɔ' wʋsa sʋnf ka mi' sɔ' wʋsa pʋtɛn'ɛri tɛn'ɛsid si'el nɛ linɛ dɔlli li nya'aŋ. Fʋ ya'a ieed o, fʋ na nyɛɛ o; amaa fʋ ya'a ki'is o, o na zan'asif saŋa linɛ ka' bɛnnɛ. 10 Gu'usimi fʋ mɛŋ nannanna, ka Zugsɔb la gaŋif ye fʋ mɛ' yir ka li lieb o pʋ'ʋsim zin'ig. Kpɛ'ɛŋi fʋ mɛŋ ka tʋm tʋʋma la.”
11 David da pa'al o biig Solomon Yir la na mɛ' si'em. O da pa'al o za'ambɛŋ nɛ li la'ad su'ab dɔɔd, nɛ dɔɔd banɛ na bɛɛ agɔla, nɛ dɔɔd banɛ na bɛ teŋsʋk nɛ zin'ikanɛ na maal suguru sɔsʋg maan la. 12 O da pa'al o suobanɛ ka Siig la nɔki niŋ o pʋtɛn'ɛrin zaŋi ken Zugsɔb Pʋ'ʋsim Yir la za'as la, nɛ dɔbanɛ gilig la, nɛ Wina'am Pʋ'ʋsim Yir la'ad dɔɔd la nɛ dɔbanɛ ka ba na su'a la'abanɛ ka ba pɛsigi tis Zugsɔb la. 13 O da pa'al o on na pʋdig maanmaannib la nɛ Levi dim la si'em, nɛ ban na tʋm si'em Zugsɔb Pʋ'ʋsim Yin la, nɛ la'abanɛ wʋsa ka ba na nɔki tʋm Yin la. 14 O da pa'al o sanlima tɛbisim nar ye li zem si'em, zaŋi ken sanlima la'abanɛ nar ye ba nɔki tʋm la, nɛ anzurifa nar ye li tɛbis si'em zaŋi ken anzurifa la'abanɛ ka ba na nɔki tʋm tʋʋma la. 15 Sanlima fita nɛ li zi'esa la yinne-yinne sanlim tɛbisim nar ye li zem si'em, nɛ li wʋsa la'asi zem si'em, nɛ anzurifa fita nɛ li zi'esa nɛ li fita anzurifa tɛbisim nar ye li zem si'em, nɛ li tʋʋmmi an si'el wʋsa. 16 Ka pa'al o bodobodo teebul la sanlima la nar ye li tɛbisim zem si'em, nɛ anzurifa teebul la tɛbisim nar ye li zem si'em; 17 nɛ sanlim la nar ye li tɛbisim zem si'em ka ba nɔki maal la'abanɛ ka ba mɔri yaad ni'im la, nɛ laas banɛ ka ba mɔri misid la, nɛ sanlima laas nɛ anzurifa laas: 18 Sanlim sʋŋ kanɛ na maal bimbim kanɛ nyu'od bʋnyubisa la tɛbisim nar ye li tɛbis si'em. O mɛ da pa'al o on na maal tɛreko la si'em. Ka linɛ an sanlim kɛrubnam banɛ yadigi ba kpʋkpama ka li ma'asim ligil Zugsɔb nɔnaar Daka la maalʋg.
19 David da yɛl o ye, “Nɛ' wʋsa anɛ Zugsɔb la sɔbi tisim, ka kɛ ka m baŋ mɛɛb la na an si'em ka gban'e li gbin sʋ'ʋŋa.”
20 Na'ab David mɛ da lɛn yɛl o biig Solomon ye, “Kpɛ'ɛŋi fʋ sʋnf ka tʋm tʋʋma la nɛ kpi'euŋ, bɔzugɔ Zugsɔb Wina'am onɛ an man Wina'am la bɛ nɛf. O kʋ kɛ ka fʋ di nyan bɛɛ basi fɔ, hali ka tʋʋma la wʋsa linɛ an Zugsɔb Pʋ'ʋsim Yir la mɛɛb la ti naae. 21 Maanmaannib nɛ Levi dim la na pʋdig tʋʋma la tʋm Wina'am Yin la wʋʋ lin zi'el si'em, ka dau kanɛ wʋsa mi' tʋʋma na bɔɔd ye o sʋŋi fʋ tʋm tʋʋma la. Kpɛɛmnam la nɛ nidib la wʋsa na siak fʋn tis nɔsi'a wʋsa.”