Piini linɛ ye li mɛ' Pʋ'ʋsim Yir la yɛla
29
1 Na'ab David da yɛl nidib la wʋsa ye, “M biig Solomon, onɛ ka Wina'am gaŋ la, nan anɛ dasaŋ ka o ya'am nam pʋ gandigi naae. Tʋʋm la anɛ tʋʋm tita'ar, bɔzugɔ mɛ' tita'akaŋa ka' ninsaal dinnɛ, amaa li anɛ Zugsɔb Wina'am la din. 2 Dinzug, m kpɛ'ɛŋi m mɛŋi bɔ la'abanɛ wʋsa ka ba na zaŋi mɛ' Zugsɔb Pʋ'ʋsim Yir la; m bɔ sanlima nɛ anzurifa nɛ kʋntzɛn'ug nɛ kuntmɛŋir nɛ daad ye ba tʋm tʋʋma la, ka lɛn tis kugvɛnla banɛ an bʋmpiela nɛ bʋnzɛn'is nɛ bʋnsabila kɔn'ɔb-kɔn'ɔb, m paas kugbanɛ an bʋlʋ la, nɛ kugsʋma banɛ na mɛ' zaŋguoma la, nɛ kuga banɛ pɛlig farr nɛ kugsʋma buudi wʋsa. Ba da la'as lina wʋsa digil ka li zu'oe. 3 La'am nɛ nɛ' wʋsa, mam pɛsigi m mɛŋ si'em tis Wina'am Yir la tʋʋma la, m nɔki m mɛŋ arezak linɛ an sanlima nɛ anzurifa tis ka ba mɛɛ m Wina'am Pʋ'ʋsim Yir la, nɛ' wʋsa ka man tis ye ba mɛ' Yir linɛ an kasi la. 4 Sanlima linɛ zu'oe, ka yi Ofir teŋin na la, sanlima linɛ vɛnl hali, nɛ anzurifa bɛdegʋ linɛ na taas dɔkpina la, 5 ba na nɔki li wʋsa tʋm sanlima nɛ anzurifa tʋʋma, nɛ nimbanɛ wʋsa mi' tʋʋma ka na tʋm la. Nannanna anɔ'ɔnɛ bɔɔd ye o pɛsigi o mɛŋ zina tis Zugsɔba?”6 Ka yir tuongatib nɛ dɔɔd kpɛɛmnam nɛ banɛ gat zabzabidib tusir-tusir nɛ kɔbig-kɔbig tuon la nɛ kpɛɛm banɛ gɔsid Na'ab tʋʋma la tis nɛ ba ya'amlɛog. 7 Ba da tis sanlima nɛ anzurifa nɛ kʋntzɛn'ug nɛ kuntmɛŋir ka li pʋ pɔɔda ye li sʋŋ Wina'am Pʋ'ʋsim Yir la mɛɛb. 8 Onɛ da mɔr kugsʋma wʋsa da nɔki tis la'ad suak zin'ig linɛ ka Jehel onɛ yi Gerson tuŋʋn la da gur la, ye li sʋŋ Zugsɔb Pʋ'ʋsim Yir la mɛɛb. 9 Nidib la da mɔr sumalisim ba kpɛɛmnam la da tis nɛ ba sʋʋnr wʋsa la zug, bɔzugɔ ba da nɔk la'ad la tis Zugsɔb la nɛ ba sʋʋnr wʋsa. Na'ab David sʋnf mɛ da ma'aya hali.
Na'ab David pʋ'ʋsʋg yɛla
10 David da wɔ'ɔg Zugsɔb la yʋ'ʋr nidib la wʋsa tuonnɛ yɛt ye,
“Wɔ'ɔgir anɛ fʋ din, o Zugsɔb Wina'am,
fʋn kanɛ an Israel ba', saŋa linɛ ka' bɛnnɛ la.
11 Zugsɔba, fʋnɛ sʋ'oe kpi'euŋ nɛ paŋ nɛ girima,
bɔzugɔ linɛ wʋsa bɛɛ agɔl nɛ teŋin anɛ fʋ din.
Zugsɔba, fʋnɛ sʋ'oe sʋ'ʋlim la:
Fʋ paamid girima
ka li pa'al ye fʋʋ an si'el wʋsa kpɛɛm.
12 Arezak nɛ na'asi yitnɛ fʋ san'an na;
fʋnɛ sʋ'oe si'el wʋsa.
Fʋ nu'usin ka paŋ nɛ kpi'euŋ bɛ,
fʋnɛ dʋ'ʋsid ka tisid sɔ' wʋsa na'asi nɛ paŋ.
13 Nannanna, ti Wina'am, ti pʋ'ʋsidif bareka
ka zun'odi fʋ yʋ'ʋtita'ar la.”
14 Na'ab David da lɛn yɛl ye, “Amaa man aan anɔ'ɔnɛ, ka m nidib la aan anɔ'ɔnam ka nyaŋi tis bɛdegʋ anwana? Si'el wʋsa yinɛ fʋ san'an na, tinam tis nɛ linɛ yii fʋ nu'ugin na ma'aa. 15 Ti anɛ buudzʋŋ nɛ saamme fʋ nini ni wʋʋ ti yaanam wʋsa da an si'em la. Ti bɛllim dunia nwa ni nwɛnɛ ma'asim nɛ ka pʋ ya'asid gaadigɔ, ka ti'ir kae. 16 O Zugsɔb onɛ aan ti Wina'am, ya'a kpɛlim tinamɛ tis si'el ye li sʋŋi mɛ' yiri tisi fʋ yʋ'ʋr linɛ an kasi la, li yinɛ fʋ nu'ugin na, li wʋsa anɛ fʋ din. 17 M Wina'am, mam mi' ye fʋ kpansid ninsaal sʋnf, ka sɔ' ya'a mɔr girima nɛ pʋtɛn'ɛsʋma li na malisif. M tis nɛ' wʋsa nɛ ya'amlɛog nɛ pʋʋg nyain. Ka nannanna m mɛ nyɛɛ fʋ nimbanɛ bɛ kpɛla la tisif nɛ sumalisim si'em nɛ pʋʋg nyain. 18 O Zugsɔb, Wina'am onɛ an Abraham nɛ Isaak nɛ Israel ba', kɛl ka fʋ nidib la kpɛm mɔr ya'amlɛog kaŋa ba sʋnfʋn saŋa linɛ ka' bɛnnɛ, ka kɛ ka ba pɛligi ba pʋʋgʋ tisif. 19 Ka tisim biig Solomon pʋtɛn'ɛr linɛ ka o na pɛsigi o mɛŋi dɔlli fʋ nɔzi'elʋg la, fʋn bɔɔd si'el nɛ fʋ gban'ar la, ka mɔɔ mɛ' yir tita'ar linɛ ka m la'asi li la'adi digil la.”
20 David da yɛl nidib la wʋsa ye, “Wɔ'ɔgimi Zugsɔb onɛ aan ya Wina'am la!” Ka ba wʋsa wɔ'ɔg Zugsɔb onɛ aan ba yaanam Wina'am la; ba wʋsa da vanbin Zugsɔb nɛ Na'ab la tuon.
Solomon n di na'am la yɛla
21 Bɛogʋ da nie la ba da maal maana tis Zugsɔb la ka lɛm maal nyu'or maannɛ tis o: na'araad tusir nɛ pɛ'ɛs tusir nɛ pɛribis tusir, la'am nɛ nuub maana nɛ maan sieba ka li pʋ pɔɔda, Israel dim wʋsa yɛla. 22 Ba da di ka nu nɛ sumalisim daakan la, Zugsɔb la tuon.
Ka lɛn siak ye Solomon onɛ an David biig la anɛ na'ab, ka bu'oe malʋŋ kpaam niŋ o zugin Zugsɔb la tuon ye o an tuongat, ka mɛ bu'oe malʋŋ kpaam niŋ Zadok zug ye o an maanmaan. 23 Alazug Solomon da zin'in na'am gbauŋ la zug Zugsɔb sʋ'ʋlimin la, lieb na'abi di'e o saam David zin'ig. Si'el wʋsa da keŋ sʋ'ʋŋa tis o, ka Israel dim siak o nɔɔr.
24 Kpɛɛmnam la wʋsa nɛ ninkpi'ema la nɛ Na'ab David biribis la wʋsa da siak ka zi'el nɔɔr ye ba na sie ba mɛŋi tis Na'ab Solomon. 25 Zugsɔb la da dʋ'ʋs Solomon ka Israel wʋsa nyɛ, ka kɛ ka o na'am la paam girima, linɛ ka na'asɔ' nan zi' paami li tiraan Israel teŋinɛ.
David kum yɛla
26 David onɛ an Jese biig la da an Israel wʋsa na'ab. 27 O da di na'am la nɛ yʋma ayɔpɔi Hebron teŋin, ka mɛ di yʋma pistan' nɛ atan' Jerusalem teŋin, ka li wʋsa la'as yʋma pisnaasi Israel teŋin. 28 O yʋma da yuug ya, ka o paam arezak nɛ girima, ka kʋdig sʋ'ʋŋa ka nyaan kpi; ka o biig Solomon da di'e na'am la di. 29 Ya'a kpɛlim Na'ab David na'am pin'ilʋgʋ keŋ paae li bɛn la, ba sɔbi li yɛla niŋ Samuel nɛ Natan nɛ Gad banɛ da an Wina'am nɔdi'esib la gbana ni, 30 la'am nɛ o na'am nɛ o paŋ yɛla, nɛ yɛlbanɛ wʋsa da tʋm o saŋa la, nɛ Israel la'am nɛ tembanɛ gilig la wʋsa.