Zabzabidib la pʋdigir
27
1 Israel dim banɛ da an yir-yir tuongatibi nwa: yidaannam nɛ zabzabidib banɛ gat nidib tusir-tusir nɛ kɔbig-kɔbig tuon nɛ ba kpɛɛmnam banɛ tʋmmi tisid Na'ab la zaŋi ken nwɛnɛ ban bɛɛs zabzabidib la si'em la. Ba da tʋmmi nwadig-nwadig hali ti paae yʋʋm la bɛn. Ba da bɛɛsi ba nɛ dap zin'is tusa pisi nɛ anaasi (24,000).2 Onɛ da gɔt yiiga dim banɛ pin'il yiiga nwadig la da anɛ, Jasobeam onɛ an Zabdiel biig la. O nidib la da la'as nɛ tusa pisi nɛ anaasi (24,000). 3 O da anɛ Perez yaaŋ ka an zabzabidib kpɛɛmnam banɛ da tʋm yiiga nwadig la kpɛɛm.
4 Dodai onɛ an Ahoohi nid la da an banɛ tʋm nwadkanɛ paasid ayi' la tuongat. Mikilof da aan ba kpɛɛm. Ba da la'as nɛ dap tusa pisi nɛ anaasi (24,000).
5 Onɛ da an zabzabidib kpɛɛm nwadkanɛ paasida atan' la ni da anɛ Benaya, o da anɛ Jehoyada onɛ da an maanmaan la biig. Onɛ da an kpɛɛm gɔsid dap tusa pisi nɛ anaasi (24,000) la. 6 Benaya kaŋa da an ninkpi'euŋ nidib pistan' la sʋʋgin, ka aan ba tuongat. O biig Amizabad da aan o nidib la tuongat.
7 Nwadkanɛ paas anaasi la ni tuongat da anɛ Asahel onɛ da an Joab pitʋ la; o biig Zebadaya da di'e o zin'ig. Ban mɛ da la'as nɛ tusa pisi nɛ anaasi (24,000).
8 Banɛ paas anu nwadkanɛ paas anu la ni tuongat da anɛ Siamuf onɛ an Izra nid la. Ba da la'as nɛ dap tusa pisi nɛ anaasi (24,000).
9 Banɛ da paas ayuobʋ nwadkanɛ paas ayuobʋ la ni kpɛɛm da anɛ Ira on da anɛ Ikes biig ka an Tekoa teŋ nid. Ba da la'as nɛ dap tusa pisi nɛ anaasi (24,000).
10 Banɛ paas ayɔpɔi nwadkanɛ paas ayɔpɔi la ni la kpɛɛm da anɛ Helez, on da anɛ Pilon nid ka yi Efiram dɔɔg la ni. Ba da la'as nɛ dap tusa pisi nɛ anaasi (24,000).
11 Banɛ paas anii nwadkanɛ paas anii la ni kpɛɛm da anɛ Sibɛkai onɛ an Husea nid ka yi Zera tuŋʋn. Ba da la'as nɛ dap tusa pisi nɛ anaasi (24,000).
12 Banɛ paas awai nwadkanɛ paas awai la ni kpɛɛm da anɛ Abieza o da yinɛ Anatof teŋin ka an Benjamin dɔɔg nid. Ba da la'as nɛ dap tusa pisi nɛ anaasi (24,000).
13 Banɛ paas piiga nwadkanɛ paas piiga la ni kpɛɛm da anɛ Maharai o da yinɛ Netofa ka yi Zera tuŋʋn. Ba da la'as nɛ dap tusa pisi nɛ anaasi (24,000).
14 Banɛ paas pii nɛ yinne nwadkanɛ paas pii nɛ yinne la ni kpɛɛm da anɛ Benaya o da yinɛ Piraton teŋin, ka an Efiram dɔɔg la nid. Ba da la'as nɛ dap tusa pisi nɛ anaasi (24,000).
15 Banɛ paas pii nɛ ayi' nwadkanɛ paas pii nɛ ayi' la ni kpɛɛm da anɛ Heldai onɛ da an Netofa teŋ nid ka yi Ofniel tuŋʋn na la. Ba da la'as nɛ dap tusa pisi nɛ anaasi (24,000).
Israel dɔɔd la tuongatibi nwa
16 Kpɛɛmnam banɛ da bɛ Israel dɔɔd la ni la tuongatibi nwa: Reuben dɔɔg la, Elieza onɛ an Zikir tuŋ nid la da aan ba tuongat. Simeon dɔɔg la, Sefatia onɛ an Maaka biig la da aan ba tuongat. 17 Levi dɔɔg la ni, Hasiabiya onɛ an Kemuel biig la da aan ba tuongat ka Aaron tuŋ la tuongat da anɛ Zadok. 18 Juda dɔɔg la ni, Elihu onɛ da an Na'ab David bier la da aan ba tuongat. Isaka dɔɔg la ni, Omir onɛ an Maikel biig la da aan ba tuongat. 19 Zebulun dɔɔg la ni, Ismaya onɛ an Obadia biig la da aan ba tuongat. Naftali dɔɔg la ni, Jerimof onɛ an Aziriel biig la da aan ba tuongat. 20 Efiram dɔɔg la ni, Hosea onɛ an Azazaya biig la da aan ba tuongat. Manase dɔɔg pʋsʋk la, Joel onɛ an Pedaya biig la da aan ba tuongat. 21 Manase dɔɔg pʋsʋk banɛ bɛ Gilead teŋgbauŋʋn la, Iddo onɛ an Zakaria biig la da aan ba tuongat; Benjamin dɔɔg la ni, Jaasiel onɛ an Abner biig la da aan ba tuongat. 22 Dan dɔɔg la ni, Azarel onɛ an Jeroham biig la da aan ba tuongat. Bama da an kpɛɛmnam banɛ da gaad Israel dɔɔd la tuon.
23 Na'ab David da pʋ kaal dap banɛ an yʋma pisi bɛɛ pʋ paae ala la, bɔzugɔ Zugsɔb la da kaanb ye o na kɛ ka Israel dim zu'oe wʋʋ nwadbibis banɛ bɛ saŋgbauŋin la an si'em la. 24 Joab onɛ an Zeruyia biig la da pin'ili kaal dap la, amaa o da pʋ kaali naae. Yɛltɔɔg da kɛn Israel dim zugin na kaalʋg la zug, ka ba kal la pʋ sɔbi niŋ David na'am gbana la nii.
Na'ab la tʋmtʋmnib yɛla
25 Azmavef onɛ an Adiel biig la da gur na'ayir la'ad dɔɔg la.
Jonatan onɛ an Uzia biig la da gɔsid la'ad dɔɔd banɛ bɛ sʋ'ʋlim bibisin la nɛ tempʋʋsin la'am nɛ tembibisin nɛ zaŋguom banɛ ka ba dʋti gu'ud teŋ la.
26 Ezir onɛ an Kɛlub biig la da gɔsid tʋmtʋmnib banɛ tʋm pɔɔdin la.
27 Simie onɛ an Rama teŋ nid la da gɔsid tiwanna pɔɔd la.
Zabdi onɛ da an Siefam teŋ nid la da gɔsid tiwala linɛ ka ba mɔri maan daam la.
28 Baal-Hanan onɛ an Geder teŋ nid la da gɔsid olif tiis nɛ kekama banɛ bɛ Sefela teŋgbauŋʋn la.
Joas n da sʋ'oe olif tiis la pʋdigir.
29 Sitiraae onɛ an Saron teŋ nid la da gɔsid niigi yaama yɛla Saron teŋgbauŋʋn.
Safat onɛ an Adilai biig la da gɔsid niigi banɛ bɛ bɔn'ɔdin la.
30 Obil onɛ an Isimael buudi la da gɔsid yʋgʋma yɛla.
Jehideya onɛ an Meronof teŋ nid la da gɔsid bʋmis yɛla.
31 Jazis onɛ an Haga buudi la da sʋ'oe kɔnbid yɛla.
Bama wʋsa da anɛ kpɛɛm banɛ gɔsid Na'ab David arezak nɛ on mɔr si'el wʋsa la yɛla. 32 Jonatan onɛ an David saambil la da anɛ onɛ san'an nidib, ka an dau kanɛ mɔr ya'am, ka lɛn an pa'an. Jehel onɛ an Hakmon biig la da gɔsid Na'ab la biribis.
33 Ahitofel da anɛ Na'ab la sa'alsa'an. Husai onɛ da an Arik nid la da anɛ Na'ab Zua. 34 Banɛ da di'e Ahitofel zin'ig la da anɛ Jehoyada onɛ an Benaya biig la nɛ Abiata.
Joab n da an Na'ab zabzabidib la kpɛɛm.