Za'anɔgu'udib la
26
1 Ban daa pʋdig za'anɔgu'udib la si'em nwa: Kore da anɛ Asaf yaaŋ ka Meselemaya an Kore biig. 2 Meselemaya biribis da anɛ ayɔpɔi ka Zakaria da aan o bikpɛɛm ka Jediael tia'al ka Zebadaya paas atan' ka Jatniel paas anaasi 3 ka Elam da paas anu ka Jehohanan paas ayuobʋ ka Eliehona paas ayɔpɔi.4 Obɛd-Edom mɛ da mɔr biribis: Semaya da an bikpɛɛm ka Jehozabad tia'al ka Joa paas atan' ka Saka paas anaasi ka Netanɛl paas anu, 5 ka Ammiel da paas ayuobʋ ka Isaka paas ayɔpɔi ka Pueletai paas anii. (Wina'am da niŋ Obɛd-Edom zug bareka si'em la.)
6 O biig Semaya mɛ da mɔr biribis banɛ an yidaannam bɔzugɔ ba da anɛ dap banɛ nanɛ ba mɛŋ. 7 Semaya biribis da anɛ: Ofini nɛ Refael nɛ Obɛd nɛ Elzabad; o du'adib la sʋʋgin Elihu nɛ Semakaya mɛ da anɛ banɛ nanɛ ba mɛŋ. 8 Bama wʋsa da anɛ Obɛd-Edom yaas; ban nɛ ba biribis nɛ ba sizuop la wʋsa da anɛ banɛ nanɛ ba mɛŋ ka mɔr paŋ kanɛ na tʋm tʋʋma la. Obɛd-Edom yaas la wʋsa da la'as nɛ pisyuobʋ nɛ ayi' (62).
9 Meselemaya da mɔr biribis nɛ du'adib banɛ nanɛ ba mɛŋ. Ba wʋsa kal da la'as nɛ pii nɛ anii (18).
10 Hoosa onɛ yi Merari tuŋʋn la da mɔr biribis: Simir da an kpɛɛm (la'am nɛ on da ka' bikpɛɛm la, o saam da gaŋnɛ onɛ tis o kpɛuŋ.) 11 Hilkia da tia'al ka Tabalaya paas atan' ka Zakaria paas anaasi. Hoosa biribis nɛ o du'adib la da la'as nɛ pii nɛ atan' (13).
12 Ba da pʋdig za'anɔgu'udib la ka li dɔlli ba tuongatib la an si'em, ba tʋʋm da anɛ ba tʋm Zugsɔb Pʋ'ʋsim Yin la tʋʋma wʋʋ ban da gaŋi ba Levi taaba si'em la. 13 Za'anɔɔr wʋsa ba da maal nɛ bʋgʋlʋm-bʋgʋlʋm gaŋ banɛ na gur, ka li dɔl yir-yir, bʋnkʋt nɛ bibaanlʋg wʋsa.
14 Ya-nya'aŋ za'anɔɔr la bʋgʋlʋm-bʋgʋlʋm da linɛ Sielemaya zug. Ba da bʋgʋlʋm gaŋ o biig Zakaria, onɛ mɔr ya'am ka mi' sa'alʋg sʋ'ʋŋa la, ba da bʋgʋlʋm ka o di'e ya-datiuŋ za'anɔɔr la. 15 Ya-dagɔbʋg za'anɔɔr la, ba da bʋgʋlʋm gban'e nɛ Obɛd-Edom, ka bʋgʋlʋm la'ad dɔɔg la ka li lii o biribis la zug. 16 Ya-tuona za'anɔɔr la, nɛ Salekɛf za'anɔɔr linɛ bɛ suor kanɛ dʋt zugin la, bʋgʋlʋm-bʋgʋlʋm la da lu nɛ Seupim nɛ Hoosa zugin.
Banɛ gu'ud la da di'esid nɛ taaba. 17 Levi dim banɛ tʋm la, dabisir wʋsa pʋʋgin nidiba ayuobʋ da zi'e ya-nya'aŋ za'anɔɔrin la, gu'ud, ka anaasi zi'e ya-datiuŋ ka anaasi zi'e ya-dagɔbʋg la, ka ayi', yi' tʋm la'ad dɔɔdin la. 18 Ya'a kpɛlim za'ambɛŋ la lɛbisid ya-tuona la, nidiba anaasi da gu'ud ka bɛ suorin la, ka ayi' bɛ za'ambɛŋin la.
19 Ban da pʋdig za'anɔgu'udib la si'em la, banɛ da an Kore nɛ Merari yaas.
Banɛ gur ligidi la nɛ kpɛɛm sieba
20 Ba Levi taaba la da gɔsid Wina'am Pʋ'ʋsim Yin la la'ad ka sieba gɔsid la'abanɛ ka ba pɛsigi tis ka li an kasi la. 21 Ladan yaasi nwa: Ladan da yinɛ Gerson tuŋʋn na, ba da anɛ yidaannam, ba tuongat da anɛ Jehel, 22 Jehel biribis da anɛ Zetam nɛ o pitʋ Joel. Banɛ da gɔt Zugsɔb Pʋ'ʋsim Yir la la'ad.
23 Amram nɛ Izar nɛ Hebron nɛ Uziel yaasi nwa: 24 Subael onɛ da an Gersom onɛ an Moses biig la yaaŋ, onɛ da an kpɛɛm kanɛ gɔsid la'ad la yɛla. 25 O du'adib banɛ yi Elieza gbinnin la da anɛ: Rehabia nɛ Jesaya nɛ Joram nɛ Zikir nɛ Sielomif. 26 Sielomif nɛ o du'adib da sʋ'oe la'ad la wʋsa gɔsig, linɛ ka Na'ab David da pɛsigi tis ka li yi yir tuongatib banɛ da sʋ'oe nidib tusir-tusir nɛ kɔbig-kɔbig, nɛ zabzabidib tuongatib la. 27 Ba da nɔk la'abanɛ ka ba faaɛn zaba ni la sieba tis ye li sʋŋi mɛ' Zugsɔb Pʋ'ʋsim Yir la. 28 Linɛ wʋsa ka Samuel onɛ da an nɔdi'es la nɛ Saul onɛ an Kis biig la nɛ Abner onɛ an Nier biig la nɛ Joab onɛ an Zeruyia biig la da tis la, nɛ la'abanɛ ka ba da pɛsig la wʋsa, Sielomif nɛ o du'adib la da gɔsidi li yɛla.
29 Izar tuŋʋn la, Kanania nɛ o biribis la tʋʋma da pʋ bɛ Pʋ'ʋsim Yin la, ba da anɛ gbansɔbidib nɛ sariakatib Israel nidib la wʋsa ni. 30 Hebron tuŋʋn la, Hasiabiya nɛ o du'adib la, ban da la'as nɛ dap kɔbisyɔpɔi (700), ba tʋʋma da anɛ ye ba gɔsid Joodan kɔldaug baba lɛbisid ya-tuona la yɛla tisid Zugsɔb la ka tʋmi tisid Na'ab la. 31 Ya'a kpɛlim Hebron tuŋ la ni, Jeria da aan ba tuongat nwɛnɛ ban sɔbid yir-yir si'em la. Na'ab David n da dii o na'am la, li yʋma pisnaasi nya'aŋ, ba da ie gbana la nii nyɛ nimbanɛ nanɛ ba mɛŋ ka yi Hebron tuŋʋn la, ba da nyɛ ka ba yinɛ Jaza teŋin linɛ bɛ Gilead sʋ'ʋlimin la. 32 Jeria du'adib la da la'as nɛ tusa ayi' nɛ kɔbisyɔpɔi (2,700); ba da anɛ banɛ nanɛ ba mɛŋ ka lɛn an yir kpɛɛmnam, Na'ab David n da kɛ ka ba gɔsid Reuben nɛ Gad nɛ Manase dɔɔg pʋsʋk la, zaŋi ken linɛ wʋsa an Wina'am nɛ na'ab la yɛla ni.