Ahab faaɛn Nabof pɔɔg
21
1 Li nya'aŋ ka Nabof onɛ an Jezireel nid la mɔri o vain tiis pɔɔg ka li bɛ Samaria Na'ab Ahab yir baba. 2 Ahab da yɛl Nabof ye, “Fʋn vain tiis pɔɔg la sadigim kpi'e nɛ m yin la, kɛl ka m di'e li maali m zɛnma'asa bɔn'ɔg. M na tisif vain tiis pɔɔg kanɛ an sʋ'ʋŋa gaad ala, bɛɛ fʋ ya'a lɛm bɔɔd, m na yɔɔf ka li sia'al fʋn naan kuosin ka li ligidi an si'em.”3 Amaa Nabof da lɛbis ye, “Wina'am da kɛ ka m nɔki m yaanam faari tisi fɔ!”
4 Ahab da kul o yin nɛ ɛndʋg nɛ sʋnpɛɛn, bɔzugɔ Nabof onɛ an Jezireel nid la yɛl ye o kʋ nɔki m yaanam faari tis o la zug. O da paae yinne dig gadʋg zugʋ nɔk o nindaa kpa' dɔkpin ka zan'as diib.
Jezebɛl ninkʋʋr la yɛla
5 O pu'a Jezebɛl da kpɛn' na bu'os o ye, “Bɔ ka fʋ sʋnf san'am ka fʋ zan'as diibɔ?”
6 Ka o lɛbis ye, “M yɛl nɛ Nabof onɛ an Jezireel nid la ye o kuos o vain tiis pɔɔg la tisim, bɛɛ o ya'a bɔɔd m na tiaki m vain tiis pɔɔgʋ tis o, ka o zan'as, ka yɛl ye, ‘M kʋ tisi fʋ m pɔɔg la.’ ”
7 Ka o pu'a Jezebɛl yɛl o ye, “Israel Na'abi niŋid si'em nwaa? Duom di, ka maal sumalisim, ka man na di'e Nabof onɛ an Jezireel nid la pɔɔg la tisif.”
8 Ka sɔb gbauŋ nɛ Ahab yʋ'ʋr ka tik o nu'ug wʋʋ Ahab nɛ, ka nɔki li tis tempʋkanɛ ka Nabof bɛ la kpɛɛmnam nɛ ba tuongatib. 9 O da sɔb gbauŋʋn la ye,
“Zi'elimi nɔlɔɔr dabisir, ka kɛ ka Nabof zin'in kpɛɛmnam zin'isirin nidib la sʋʋgin. 10 Ka zin'il nidib ayi' banɛ an biriku'an dimi o tuon ka ba di kasɛt ye, o tʋ'ʋnɛ Na'ab la la'am nɛ Wina'am. Ka mɔr o yi yiŋi lɔb o nɛ kuga kʋ.”
11 Ka kpɛɛmnam nɛ tuongatib banɛ bɛ tempʋkanɛ ka Nabof bɛ la sid tʋm wʋʋ Jezebɛl sɔb gbauŋʋ yɛli ba ye ba niŋ si'em la. 12 Ka ba mɔɔl nɔlɔɔr ka zin'il Nabof kpɛɛmnam zin'isirin nidib la sʋʋgin. 13 Ka biriku'an dima ayi' kena zin'inɛ o tuon, ka ma'aa tis Nabof nidib la tuon ye, “Nabof pian' pɔ'ɔg Wina'am nɛ Na'ab la.” Ka ba duoe mɔr Nabof n yi yiŋi lɔb o nɛ kuga kʋ. 14 Ba da tʋm yɛl Jezebɛl ye, “Ba lɔb Nabof nɛ kuga ka o kpi.”
15 Jezebɛl n kpɛn wʋm ye, ba lɔb Nabof nɛ kuga kʋ la, ka yɛl Ahab ye, “Duom keŋ sʋ'ʋg Nabof onɛ an Jezireel nid la pɔkanɛ ka o daa zan'as ye o kʋ kuosi tisif la! O kpiya.” 16 Ahab n da wʋm ye Nabof kpiya la, o da duoe keŋ sʋ'ʋg Nabof vain tiis pʋʋg la.
Elaja zɛrig Ahab nɛ Jezebɛl
17 Zugsɔb labaar da kɛn Elaja onɛ an Tisibi nid la san'an na yɛl o ye, 18 “Duom sigi tʋ'ʋs Israel Na'ab Ahab onɛ sʋ'oe Samaria la. Nannanna o bɛ Nabof vain tiis pɔɔgin la. O keŋnɛ ye o sʋ'ʋgi li. 19 Yɛlim o ye, ‘Zugsɔb la yɛl si'eli nwa: Fʋ pʋ kʋ nɛ dau sɔ' ka faaɛn o faarɛ?’ ” Yɛlim o ye, “Zugsɔb la yɛl si'el nwa: ‘Zin'ikanɛ ka baas liel Nabof ziim la, ani ka baas mɛ na lieli fʋ ziim; ɛɛn fʋ mɛŋ ziim!’ ”
20 Ahab n da nyɛ Elaja la, o da bu'os o ye, “Fʋ nyɛɛ maa, m dataa?” Ka o lɛbis ye, “Ɛɛn, m nyɛɛf! Fʋn gban'e fʋ sʋʋnrin ye fʋ tʋm tʋʋmbɛ'ɛd Zugsɔb tuon la zug ka m nyɛɛf la. 21 ‘M na kɛ ka tɔɔg luu fʋ zugin na. M na kanbisi fʋ yaas ka nwaae biribiŋ kpaanr wʋsa banɛ bɛ Ahab yin; banɛ an yammis nɛ banɛ ka' yammis wʋsa Israel teŋin. 22 M na maali fʋ yir wʋʋ Nebat biig Jeroboam nɛ Ahija biig Baasa ya' la an si'em la, bɔzugɔ fʋ kɛya ka m sʋnf pɛlig ka mɛ kɛ ka Israel tʋm tʋʋmbɛ'ɛd.’
23 “Zugsɔb la mɛ yɛl Jezebɛl yɛla ye, ‘Baas na ɔnb Jezebɛl Jezireel teŋ zaŋguomin la.
24 “ ‘Baas na ɔnb Ahab nimbanɛ kpi tempʋʋgin la ka niis di banɛ kpi tempʋʋg la yiŋ la.’ ”
25 (Dau nan zi' pɛsigi o mɛŋi tʋm tʋʋmbɛ'ɛd Zugsɔb la tuon wʋʋ Ahab, ka o pu'a Jezebɛl da kɛt ka o tʋm tʋʋmbɛ'ɛd si'em la. 26 O da tʋm bɛ'ɛd hali ka kpɛn' teŋgbana maalʋg nwɛnɛ Amor dim banɛ ka Zugsɔb la da kadi ba yis Israel dim nifin la.)
27 Ahab n wʋm nɛ'ɛŋa la, o da sie o mɛŋ ka aaɛn o fuud, ka yɛ bɔto fuud saŋa wʋsa ka lɔ nɔɔr ka ken baanlimm-baanlimm, sʋnsa'aŋ zug.