1 Samuel 16

Samuel bu'oe malʋŋ kpaam niŋ David zug

1 Zugsɔb la da yɛl Samuel ye, “Fʋ ye fʋ nɔk saŋa wala kummi tisid Saul kanɛ ka mam pʋn zan'as ye o kʋ an Israel dim na'ab la? Liem kpaam pɛ'ɛli fʋ iil la ka duoe gban'e suor, ka m ye m tʋmif nɛ Jese onɛ bɛ Betilehem la yin. M gaŋ o biis la yinne ye o di na'am.” 2 Ka Samuel lɛbis ye, “M ye m niŋ wala keŋɛ? Saul ya'a wʋm ala, o na kʋʋm.” Ka Zugsɔb la ye, “Nɔkim na'asa'a keŋ ka yɛl ye, ‘M kennɛ na ye m maal maannɛ tis Zugsɔb la.’ 3 Buolim Jese ka o kɛn malʋŋ la ye di maal zin'isi'a la na, ka m na pa'alif fʋn na niŋ si'em. Fʋ na nɔk malʋŋ kpaam la bu'oe niŋ onɛ wʋsa ka m pa'alif la zug.” 4 Samuel da tʋm nwɛnɛ Zugsɔb la yɛl si'em la. On da paae Betilehem la, bʋnkʋt la da tʋ'ʋs o nɛ ka kirid. Ba da bu'os o ye, “Fʋ kɛn nɛ sumbʋgʋsʋm naa?” 5 Ka Samuel lɛbis ye, “Ɛɛn, li anɛ sumbʋgʋsʋm ken; m kennɛ na ye m maal maannɛ tis Zugsɔb la. Maalimi ya mɛŋ nyain ka kɛn maannin la na.” Ka o maal Jese nɛ o biis la nyain ka ba zemis nɛ ban na keŋ maannin la; ka yʋ'ʋn kaanbi ba. 6 Ban da paae la, Samuel da nyɛ Eliab ka tɛn'ɛs o sʋnfʋn ye, bi'esʋg kae, onɛ ka Zugsɔb la gaŋ la zi'e o tuon la. 7 Amaa Zugsɔb la yɛl Samuel ye, “Da gi'en o niŋgbiŋ nɛ o wa'alim laa, ka mam zan'as o nɛ. Zugsɔb la pʋ gɔt ninsaali gɔt si'el la. Ninsaal gɔtnɛ yiŋ vɛnlim, amaa Zugsɔb la gɔtnɛ sʋʋnr.” 8 Ka Jese buol Abinadab. Ka o kena gaad Samuel tuon, amaa ka Samuel yɛl ye, “Zugsɔb la mɛ pʋ gaŋ oŋa.” 9 Ka Jese lɛn kɛ ka Siama kena gaad Samuel tuon, amaa Samuel yɛl ye, “Zugsɔb la mɛ pʋ gaŋ oŋa.” 10 Jese da kɛ ka o biis ayɔpɔi kena gaad Samuel tuon. Amaa ka Samuel yɛl ye, “Zugsɔb la mɛ pʋ gaŋ bama.” 11 Ka o bu'os Jese ye, “Fʋ biis wʋsa nwaa?” Ka Jese lɛbis o ye, “Kpaanr la kpɛlim, amaa on kemnɛ kɔnbid.” Ka Samuel yɛl o ye o tʋm ka ba keŋ buol o na. Ka ye, “Ti kʋ zin'inɛ asɛɛ o ti paae na.” 12 Ka o sid tʋm ka ba keŋ buol o na. O da anɛ na'akimbil vɛnliŋ ka o nini an wisi, ka mɔr laafi sʋ'ʋŋa, ka o zi'esim mɛ an sʋ'ʋŋa. Ka Zugsɔb la ye, “Duom nɔk kpaam la bu'oe niŋ o zugin ka onɛ la.” 13 Ka Samuel nɔk iil la nɛ malʋŋ kpaam la bu'oe niŋ o zugin, o bieya la tuon. Ka lin da pin'il daakan la, Zugsɔb la Siig la da sigi o zugin na nɛ paŋ. Ka Samuel nyaan lɛb Rama.

David tʋmmi tisid Saul

14 Saŋkaŋa Zugsɔb la Siig la da yi ka bas Saul, ka sibɛ'ɛd yi Zugsɔb la san'an na daamid o. 15 Saul tʋmtʋmnib la da yɛl o ye, “Gɔsima sibɛ'ɛd yi Zugsɔb la ni na daamidif. 16 Ti zugsɔba, kɛl ka tinam banɛ aan fʋ yammis la ie onɛ na nyaŋi nwɛ' kɔn na. O na nwɛ' saŋkanɛ wʋsa ka sibɛ'ɛdnam la ti naam Zugsɔb la san'anɛ kena, ka li kɛ ka fʋ paam yɔlisim.” 17 Ka Saul da yɛli ba ye, ba ieem onɛ mi' nwɛ'ɛb sʋ'ʋŋa dɔl o na. 18 Yammis la yinne da lɛbis ye, “Mam mi' Jese onɛ yi Betilehem la biig onɛ mi' kɔn nwɛ'ɛb. O anɛ sʋnkpi'euŋ sɔb, ka mɛ lɛn an zabzabid. O mi' pian'ad sʋ'ʋŋa ka mɛ vɛnl, ka Zugsɔb la bɛɛ o ni.” 19 Saul da tʋm nidib Jese san'anɛ yɛl o ye, “Kɛl ka fʋ biig onɛ kem kɔnbid la kɛɛn m san'an na.” 20 Jese da nɔknɛ bʋŋ ka lɔ diib, nɛ daam nɛ gan'ar, ka gban'e bʋpɔli mɔri ba nɛ o biig David n keŋ Saul san'an. 21 David da kena paas banɛ tʋmmi tisid Saul la. Saul da nɔŋ o yɛla hali, ka David paas banɛ ziidi o zaba la'ad la nid yinne. 22 Ka Saul tʋm yɛl Jese ye, “Kɛl ka David kpɛlimi m yin kpɛla lɛbigi m tʋmtʋmnib la yinne, ka m sʋnf malis o yɛla.” 23 Saŋkanɛ wʋsa ka siig la yi Wina'am san'anɛ sig Saul ni na, David nɔkidnɛ kɔn la nwɛ', hali ka Saul ti nyɛɛ o mɛŋ ka paam laafi ka sibɛ'ɛd la yi ka bas o.