Zugsɔb la zan'as Saul
15
1 Ka Samuel yɛl Saul ye, “Man ka Zugsɔb la daa tʋm ka m kena bu'oe malʋŋ kpaam niŋif ka fʋ lieb na'ab ka gaad o nidib Israel dim la tuon; dinzugɔ kɛlisim dinɛ yit Zugsɔb la san'an nannanna. 2 Zugsɔb Onɛ an Paŋ Sɔb la yɛl si'eli nwa, ‘M na tɛɛg Amalek dim la tʋbir ban da tʋm Israel dim tʋʋm si'a ka la'am gu' ba ban da yi Egipt teŋin na la. 3 Nannanna kem tʋ'ʋs Amalek dim la ka san'am bam mɔr la'asi'a wʋsa. Kʋʋm dap nɛ pu'ab nɛ biis nɛ bilies nɛ niigi nɛ pɛ'ɛs nɛ yʋgʋma nɛ bʋmis wʋsa.’ ”4 Alazug, Saul da buol dap la la'asi ba Telaim soogianam tusa kɔbisyi' nɛ soogianam tusa piiga banɛ yi Juda na. 5 Saul da keŋ paae Amalek teŋin kɛ ka ninsieba keŋ gilig teŋ la su'a bɔn'ɔgin sa. 6 Ka o da yɛl Keen dim la ye, “Yimi kpɛla; basimi Amalek dim la gʋllim ka m da ti kpanbi san'am yanam nɛ banɛ. Bɔzugɔ yanam da pʋ tʋm bɛ'ɛdi tis Israel dim la ban da yi Egipt teŋin na la.” Keen dim la sid da yi teŋin la ka bas Amalek dim la. 7 Ka Saul tʋ'ʋs Amalek dim la nɛ zaba lin pin'il Havila ken paae Sur lɛbisid ya-nya'aŋ Egipt baba. 8 O da gban'e Agag onɛ da an Amalek dim na'ab la ka o nan vʋe ka kʋʋ o nidib la wʋsa. 9 Amaa Saul nɛ o soogianam la da pʋ kʋ na'ab la nɛ bʋnkɔnbsʋma laa, ba mɛ da pʋ siak ye ba san'am linɛ an la'asʋma la wʋsaa. Amaa linɛ wʋsa da ka' sʋ'ʋm ka mɛ pʋ nie nif la ma'aa ka ba da san'am.
10 Zugsɔb la da pian' tis Samuel ye, 11 “M sʋnf san'am nɛ man kɛ ka Saul di na'am la, bɔzugɔ o tiaki tʋm nɛ on mi' si'el ka ka' mam Zugsɔb la pa'al o ye o niŋ si'em laa.” Li da daam Samuel, ka o kum yʋ'ʋŋ kan wʋsa. 12 Bɛkɛung asuba Samuel da isigi keŋ Saul san'an, amaa ba da yɛl o ye Saul keŋ Kaamel. Anina ka o kpi'e kugwɔkʋ zi'el ye li an yʋ'ʋri tis o, ka gaadi keŋ sig Gilgal. 13 Samuel n da keŋ paae nyɛ Saul la, ka Saul yɛl ye, “Zugsɔb la na niŋi fʋ zug bareka! M tʋm Zugsɔb la yɛl ye m tʋm si'el la wʋsa.” 14 Amaa Samuel lɛbis o ye, “Ka pɛbama yi yaanɛ kaasidi m tʋba ni? Bɛɛ bʋʋn nwɛnɛ niigi m tʋba ni?” 15 Ka Saul lɛbis ye, “Soogianam la gban'e ba yi Amalek dimin la na; bʋnkɔnbid banɛ ka ba gaans bʋnsʋma ye ba maal maannɛ tis Zugsɔb onɛ aan fʋ Wina'am la, amaa ti san'am banɛ kpɛlim la wʋsa.” 16 Ka Samuel lɛbis o ye, “Kɛl ala! Kɛl ka m yɛlif Zugsɔb la sa yɛlim si'el yʋ'ʋŋ.” Ka Saul lɛbis ye, “O sa yɛlif ye bɔ?” 17 Ka Samuel yɛl o ye, “Zugsɔb la da diisif Israel na'ab la'am nɛ fʋn da gɔsi fʋ mɛŋ ye fʋ ka' sɔ' la. Fʋ da pʋ lieb Israel buudi la wʋsa tuongataa? 18 Ka o tʋmif ye fʋ keŋ tʋm tʋʋm si'a ka yɛlif ye, ‘Kem san'am Amalek dim banɛ an tʋʋmbɛ'ɛd dim la wʋsa; zam nɛ ba hali nɛ fʋn na ti nyaŋi kʋʋ ba wʋsa.’ 19 Tɔ! Ka wala ka fʋ pʋ tʋm nwɛnɛ Zugsɔb la yɛlif si'em la? Wala ka fʋ zɔ tɔ'ɔtɔ faaɛn la'ad la ka tʋm linɛ ka' sʋ'ʋm Zugsɔb la tuonnɛ?” 20 Saul lɛbis ye, “Amaa man siak Zugsɔb la nɔɔr. M keŋ Zugsɔb la titʋmis la. M kʋ Amalek dim la ka gban'e ba na'ab Agag n mɔri kena. 21 Soogianam la nɔk pɛ'ɛs nɛ niigi banɛ ka ba faaɛn la, gaans bʋnsʋma la ye ba nɔki ba maal maannɛ tis Zugsɔb onɛ aan fʋ Wina'am la Gilgal teŋin.”
22 Amaa Samuel lɛbis o ye,
“Fʋ tɛn'ɛs ye Zugsɔb sʋnf malis nɛ nyu'or maana nɛ maan banɛ wʋsa bɛɛ
gaad fʋn na siak o nɔɔrɛɛ?
Siakir gat maan,
ka onɛ tʋbiri wʋm gat pɛrabanɛ mɔr kpaam.
23 Ki'isʋg anɛ bɛ'ɛd wʋʋ ba'ad bʋgʋb nɛ,
ka tita'alim an bɛ'ɛd wʋʋ teŋgbana maalʋg nɛ.
Ka fʋn zan'as Zugsɔb la pian'ad la zugɔɔ,
o mɛ zan'as ye fʋ kʋ lɛn an na'aba.”
24 Ka Saul yʋ'ʋn yɛl Samuel ye, “Alaa m tʋm taal, man ki'is Zugsɔb la zi'elʋg nɛ fʋ pa'ala la. M daa zɔti nidib la dabiem ka gʋ'ʋŋi siaki tisi ba. 25 Nannanna, m bɛlimnɛ, kɛlli m tʋʋmbɛ'ɛd taali bas ka dɔllim ka ti lɛbi dʋ'ʋs Zugsɔb la yʋ'ʋr.” 26 Amaa Samuel lɛbisi yɛl o ye, “Mam kʋ dɔlli fʋ lɛbɛ. Fʋ zan'as Zugsɔb la nɔɔr ka o mɛ zan'asif ye fʋ kʋ lɛn an Israel dim na'aba!” 27 Samuel n fɛndig ye o keŋ ka bas o la, ka Saul gban'e o fuug nɔɔr ka li aaɛn. 28 Samuel yɛl o ye, “Tɔ! Zugsɔb la aaɛn Israel sʋ'ʋlim la yii fʋ san'an zina zaŋi tisi fʋ tiraan onɛ an sʋm gatif. 29 Wina'am onɛ an Israel dim girima la pʋ ma'ad bɛɛ tiakid o pʋtɛn'ɛrɛ; bɔzugɔ o ka' ninsaal ka na tiak o pʋtɛn'ɛr.” 30 Ka Saul lɛbis ye, “M sid tʋm tʋʋmbɛ'ɛd. Amaa tisimim girima m nidib la kpɛɛmnam nɛ Israel dim la wʋsa tuon. Maalim suguru ka dɔllim ka ti lɛb ka m dʋ'ʋs Zugsɔb onɛ aan fʋ Wina'am la yʋ'ʋr.” 31 Samuel da dɔl Saul n lɛb ka o dʋ'ʋs Zugsɔb la yʋ'ʋr.
32 Ka Samuel yɛl ye, “Yisim Agag onɛ an Amalek dim na'ab la na!” Agag da yina nɛ sʋnkpi'euŋʋ, tɛn'ɛsid ye bi'esʋg kae, ba kʋ lɛn kʋʋ o ya'asɛ. 33 Amaa Samuel yɛl ye, “Fʋ zaba sʋ'ʋgʋ sadigim daa kɛ ka bimanam kpɛlim zaalim la, ala mɛn ka fʋ ma mɛ ye o kpɛlim zaalim o pu'a taaba sʋʋgin ka ka' biiga.” Ka Samuel kʋ Agag Zugsɔb la tuon Gilgal teŋin ka kie o zɔra-zɔra.