Jonatan tʋ'ʋs Filistia dim la
14
1 Daar yinne Jonatan onɛ an Saul biig la da yɛl dasaŋ onɛ ziid o zaba la'ad la ye, “Kem na ka ti keŋ Filistia soogianam la bɛ si'ela sa!” Amaa o da pʋ yɛl o saama.2 Saul da yi Gibea teŋ kpikpɛŋ linɛ bɛ Migron la tisi'a gbinnin. Nimbanɛ da la'am bɛ nɛ o la kal da anɛ wʋʋ kɔbis ayuobʋ. 3 Ahija mɛ da paas ani ka yɛ maanmaan dansik. O saam da anɛ Ahitub ka on ba'abiig an Ikabod. Ahitub da anɛ Finehas biig ka an Eli onɛ da an Zugsɔb maanmaan Siilo la yaaŋ.
Sɔ' da pʋ baŋ ye Jonatan gaadyaa. 4 Tampiins ayi' da giŋ suosiank kanɛ ka Jonatan da tɛn'ɛsid ye o dɔlli keŋ zab nɛ Filistia soogianam la. Ayinne buon Bozis ka yinne buon Senɛɛ. 5 Tampiing yinne la da bɛnɛ ya-datiuŋʋ lɛbid Mikmas baba ka yinne bɛ ya-dagɔbʋgʋ lɛbid Geba baba.
6 Jonatan yɛl dasaŋ kanɛ ziid o zaba la'ad la ye, “Kem na ka ti keŋ yu'okɔn la san'an, ka daasi'erɛɛ Zugsɔb la na zabi tisi ti. Zugsɔb la ya'a gban'e ye o faaɛn o nidib la, si'el kae na geŋ o, baa ba an bɛdegʋ bɛɛ bi'ela.” 7 Ka o lɛbis ye, “Tʋmmi fʋ pʋtɛn'ɛre gban'e si'em wʋsa. Kem tuon ka m dɔl nɛ m sʋnf nɛ m paŋ wʋsa.” 8 Ka Jonatan lɛbis ye, “Alaa kem na ka ti lɔ'ɔŋi keŋ Filistia dap la san'an ka ba nyɛɛ ti. 9 Ba ya'a yɛli ti ye, ‘Zi'enimi yanamɛ bɛ si'el la ka ti kɛɛn ya san'an na,’ ti na zi'en ka kʋ keŋi ba san'anɛ. 10 Amaa ba ya'a yɛl ye, ‘Kemini ti san'an na,’ ti na keŋ, bɔzugɔ li anɛ zanbinnɛ pa'an ye Zugsɔb la nyaŋi baa tisi ti.” 11 Alazug babayi' la da nɛɛli ba mɛŋ ka Filistia soogianam la nyɛɛ ba. Ka Filistia soogianam la nyɛɛ ba la ka yɛl ye, “Gɔsimi! Hibiru dim la nwa yʋ'ʋn yit vɔnt banɛ ka ba daa su'a la ni na yʋ'ʋs.” 12 Ka ba tans Jonatan nɛ onɛ ziid o zaba la'ad la ye, “Kemi kpɛla na, ka ti pa'ali ya ya'am!” Jonatan da yɛl onɛ ziid o zaba la'ad la ye, “M ya'a dʋt, fʋn dɔllim; ka Zugsɔb la nyaŋi ba tis Israel.” 13 Ka Jonatan pin'ili dʋt zuokanɛ ka ba bɛɛ li zug la, igin nɛ nu'ug nɛ nɔba, ka o zaba la'aziid la dɔl o. Ka Filistia soogianam la lut Jonatan tuon, ka o la'aziid la kʋʋdi dɔl. 14 Yiiga tʋ'ʋsʋgʋ nwa ka Jonatan nɛ onɛ ziid o zaba la da tʋ'ʋsi baa kʋ dap pisi, paalʋ kanɛ yalʋŋʋ zem wʋʋ eka pʋsʋk nɛ.
Israel nyaŋ Filistia zabzabidib
15 Dabiem da kpɛn' soogia banɛ da bɛɛ ba la'asʋg zin'igin la nɛ banɛ bɛ yiŋ la nɛ banɛ gur la, hali nɛ banɛ yii keŋ ye ba zab la wʋsa. Ka teŋ la dam. Wina'am da kɛ ka dabiekaŋa kpɛn' ba. 16 Saul n da nan kpɛm bɛ Gibea Benjamin sʋ'ʋlimin la, ka daa pʋn kɛ ka ninsieba zi'e guri, ka ba gɔsi nyɛ ka soogianam la widigi zɔt yɔɔg-yɔɔg. 17 Ka Saul yɛl o nimbanɛ bɛɛ o san'an la ye, “Gi'elim gɔsi ye anɔ'ɔnɛ kae kpɛla.” Ba da gi'eli nyɛ ka Jonatan nɛ onɛ ziidi o zaba la'ad la kae. 18 Saul da yɛl Ahija ye, “Nɔkimi Zugsɔb Nɔnaar Daka la na.” (Saŋkan la daka la da bɛ Israel dim san'an.) 19 Saul n da nam bɛɛ ni pian'adi tisid maanmaan kpɛɛm la, ba da wʋm Filistia dim la dammir nɛ tʋkpiidʋg la maligim ɔnsigid. Ka Saul yɛl maanmaan kpɛɛm la ye, “Ayei, kʋdim kɛl sa!” 20 Saul da la'as dap la wʋsa ka ba keŋ zaba la. Ba da nyɛ ka Filistia dim la zunnim ka kʋʋd taaba nɛ ba sʋ'ʋs. 21 Hibiru dim banɛ da sʋŋid Filistia dim la da tiaki ba ya'am ka pin'ili zabidi sʋŋid Saul nɛ Jonatan. 22 Israel dim banɛ da su'a Efiram linɛ an kʋkʋna teŋ la da wʋm ye Filistia dim bɛnɛ zɔɔgin la, ba da yina la'as taaba ku'ugi kpɛn' zaba la ni tʋʋlig-tʋʋlig. 23 Zugsɔb la da faaɛn Israel daakan la ka zaba la zab hali ti keŋ gaad Bet-Aven.
Jonatan di siind
24 Li da wʋm Israel dim dap daakan hali, bɔzugɔ Saul da pɔnɛ, ye sɔ' da di si'ela. Ye nɔpɔɔr bɛ onɛ lɛm si'el ka winnig nyaan lu, asɛɛ ka on ti nyaŋi o dataas la. Dinzug soogia sɔ' da pʋ lɛm si'ela. 25 Soogianam la wʋsa da kpɛn' sian'arinɛ nyɛ ka siind dig teŋin. 26 Ban da tɔlis tuon la, ba nyɛ siindi yuodi yit tiyɔkin na, amaa ba sɔ' da pʋ tin'e niŋ o nɔɔrinɛ, Saul nɔpɔɔr la zugʋ kɛ ka ba zɔ dabiem. 27 Amaa Jonatan da pʋ wʋm ye o saam Saul pɔ ye sɔ' da lɛm si'ela, ka zaŋ balakanɛ ka o zanl la tʋm siindin la yisi niŋ o nɔɔrin ka o nini nie. 28 Ka soogianam la yinne yɛl o ye, “Fʋ saam pɔnɛ nɔɔrɛ zi'el ye, ‘Onɛ wʋsa di si'el zina, nɔpɔɔr bɛɛ o zug.’ Linɛ kɛ ka li wʋm nidib la ka ba tadig hali la.” 29 Ka Jonatan lɛbis ye, “M saam bɔ yɛlli tisi ti teŋgbauŋ la. Man lɛm siind la ka m nini yʋ'ʋn pilig nyain si'em la, 30 nidib la ya'a diin dibanɛ ka ba dataas zɔ ka bas la, li naan aan wala? Wai! Ba naan kʋʋn Filistia dim la hali ka li gaad ala.”
31 Daakan la Israel dim la da kʋ Filistia dim la yi Mikmas hali ti paae Aijalon teŋin la, ba da gɛnnɛ. 32 Ba da faaɛn pɛ'ɛs nɛ niigi nɛ na'abibisi kʋʋ ba yɔɔg-yɔɔg n ɔnbid nɛ ziim la wʋsa. 33 Sɔ' da yʋ'ʋn yɛl Saul ye, “Gɔsima nidib la tʋm nɛ bɛ'ɛd Zugsɔb la tuon! Ba ɔnbidi ni'im kanɛ nam mɔr ziim.” Ka Saul yɛl ye, “Ya san'am zi'elʋg la! Biligim kugtita'ar tɔ'ɔtɔ digil kpɛla na.” 34 Ka ye, “Kem nidibin la yɛli ba ye, ‘Sɔ' wʋsa mɔr o naaf bɛɛ pɛ'og naa kʋ kpɛla ɔnb. Da ɔnbi ni'im linɛ ka li ziim nam pʋ yuoe, ka li kɛ ka ya tʋm bɛ'ɛd Zugsɔb la san'anɛ. Lin zugɔ sɔ' wʋsa da mɔr o bʋnkɔnbʋg yʋ'ʋŋ kanɛ keŋ kʋʋ ani.’ ” 35 Saul da mɛ' maan bimbimi tis Zugsɔb la anina. O da nan zi' mɛɛ li buudii, o yiiga bimbimi la.
36 Saul ye, “Kɛlli ka ti kadi Filistia dim la yʋ'ʋŋa kʋʋ ba wʋsa ka da bas baa nid yinne ka o tiligɛ.” Ka ba lɛbis o ye, “Maalim linɛ na an sʋm tisif.” Amaa maanmaan kpɛɛm da ye, “Kɛl ka ti bu'os Zugsɔb la kpɛla.” 37 Alazug Saul da bu'os Wina'am, ye, “M zɔm dɔl Filistia dim la gbine kʋʋ? Fʋ na sʋŋ ka ti nyaŋi baa?” Amaa Zugsɔb la da pʋ lɛbis si'el daakanɛ. 38 Saul da lɛn yɛl ye, “Yanam banɛ an kpɛɛmnam nɛ soogianam la wʋsa la'asimi na, ka ti gɔs ye tʋʋmbɛ'ɛd bɔ ka ti tʋm zina? 39 Zugsɔb onɛ vʋe ka faaɛn Israel dim la yʋ'ʋr zug, onɛ tʋm taal nwa, asɛɛ o kpi; baa li ya'a anɛ man biig Jonatan n tʋmi li.” Amaa nidib la sɔ' da pʋ ya'ae nɔɔrɛ. 40 Saul da yɛl Israel dim la wʋsa ye, “Yanam zi'enim kpɛ'ɛsa ka mam nɛ Jonatan mɛ zi'en kpɛla.” Ka nidib lɛbis ye, “Maalim linɛ na an sʋm tisif.” 41 Saul daa sɔs Zugsɔb onɛ an Israel Wina'am la, ye, “Gandigim tisim nyain!” Ka ba maal bʋgʋlʋm-bʋgʋlʋm ka li gaŋ Saul nɛ Jonatan ka kɛ nidib la. 42 Ka Saul yɛl ye, “Bʋgʋlimi mam nɛ Jonatan onɛ aan m biig la!” Ka li gaŋ Jonatan.
43 Ka Saul yɛl Jonatan ye, “Yɛlimim fʋn tʋm tʋʋmbɛ'ɛsi'a.” Ka Jonatan lɛbis o ye, “Man zaŋi m balaari tin'e siind bi'ela lɛm la siak man na kpii?” 44 Saul yɛl ye, “Zugsɔb la kɛl ka tɔɔg paae man bɛdegʋ, fʋn Jonatan ya'a pʋ kpii.” 45 Amaa nidib la yɛl Saul ye, “Jonatan ka' onɛ na kpii, ka' onɛ zi yɔlisim tita'ari kɛn Israel la naa? Ayei! Zugsɔb onɛ vʋe la yʋ'ʋr zugɔ, hali o zuobʋg baa yinne kʋ li teŋa, bɔzugɔ on tʋm si'el wʋsa zina la, li anɛ Wina'am sʋŋir.” Ka nidib la da faaɛn Jonatan ka o pʋ kpii. 46 Ka Saul bas ka pʋ lɛn kad Filistia dim la, ka ba wʋsa lɛbi ba teŋin.
47 Saul n da di Israel na'am naae la, o da zab nɛ o dataas lʋga wʋsa: Moab nɛ Ammon dim la nɛ Edom nɛ Zoba na'anam nɛ Filistia dim la. O ya'a da lɛb zin'isi'a wʋsa o tisidi ba nɛ tɔɔg. 48 O da zab nɛ hali nɛ kpi'euŋʋ nyaŋ Amalek dim la banɛ da wɛbigidi ba la, ka faaɛn Israel dim la ba nu'usin.
Saul yidim yɛla
49 Saul biribis da anɛ Jonatan, nɛ Isivi nɛ Malkisua. O bipuŋ kpɛɛm la yʋ'ʋri da buon Merab, ka o bipuŋ kpaanr la yʋ'ʋr buon Mikal. 50 O pu'a yʋ'ʋri da buon Ahinoam onɛ an Ahimaaz pu'ayua. Saul soogianam kpɛɛm la yʋ'ʋri da buon Abner onɛ saam yʋ'ʋri da buon Nier. Nier da anɛ Saul saambil. 51 Saul saam Kis nɛ Abner saam la da anɛ Abiel biis. 52 Saul na'am saŋa la wʋsa da anɛ zaba ban nɛ Filistia dim la. Ka Saul ya'a da baŋ ye sɔ' mɔr paŋ ka o sʋnf mɛ kpi'em, o zaŋid o nɛ ka o lieb zabzabid.