Samuel sa'al Saul
13
1 Saul da anɛ yʋma pistan' ka di na'am la. O da an Israel na'ab yʋma pisnaasi nɛ ayi'. 2 Saul da gaŋ Israel dap tusa atan'; ban tusa ayi' da bɛnɛ o san'an Mikmas nɛ Betel linɛ an kʋkʋna teŋ la, ka tusir bɛɛ o biig Jonatan san'an Gibea Benjamin sʋ'ʋlimin la. Dap banɛ da kpɛlim la wʋsa o da kɛ ka sɔ' wʋsa kul o yin. 3 Jonatan da tʋ'ʋs Filistia dim soogianam banɛ bɛ Geba teŋin gur la, zab nɛ ba, ka Filistia dim la wʋmi li yɛla. Saul da kɛ ka ba pieb na'atane gilig teŋ la wʋsa yɛt ye, “Hibiru dima wʋmmi!” 4 Israel dim wʋsa daa sid wʋm labaar la ye, “Saul tʋ'ʋsi zab nɛ Filistia dim bi'ela banɛ gur Geba la, ka nannanna ba sʋnf yʋ'ʋn duonɛ nɛ Israel.” Ba da la'as nidib la ye ba keŋ Saul san'an Gilgal teŋin.5 Filistia dim da la'as ye ba zab nɛ Israel nɛ zaba tɛrekonam tusa atan' nɛ wiedban'adib tusa ayuobʋ. Soogianam la on da nwɛnɛ mu'ar nɔɔrin titanbin'isi nɛ. Ba da keŋ tiinsim nɛ zin' Mikmas linɛ bɛ Bet-Aven ya-nya'aŋ baba. 6 Israel dap la da nyɛ ka zaba la mu'oe ka ba piridi ba soogianam la, ba da su'a tampinlɛma nɛ tʋtʋga ni nɛ bʋmbu'adin nɛ bulis pʋʋgin. 7 Hibiru dim sieba da lɔ'ɔŋ Joodan keŋ Gad nɛ Gilead tɛɛnsin. Saul da kpɛlim Gilgal, ka zabzabidib banɛ kpɛlim nɛ o la wʋsa kirid nɛ dabiem.
8 O da kpɛlim ani daba ayɔpɔi, nwɛnɛ Samuel n zi'el si'em la, amaa Samuel da pʋ kɛn Gilgal na. Ka Saul nidib la yʋ'ʋn pin'ili widigid. 9 Ka o yɛl ye, “Mɔri nyu'or maana nɛ taaba la'asʋg maana la na.” Ka Saul da maal malʋŋ kanɛ nyu'od la. 10 On naae malʋŋ la ka Samuel mɛ paad, ka Saul yi ye o pʋ'ʋs o. 11 Ka Samuel bu'os o ye, “Fʋ bɔɔ wala?” Ka Saul lɛbis ye, “Nidib la pin'ili widigidnɛ ka fʋ mɛ nam pʋ paae na wʋʋ fʋn daa zi'el saŋa la si'em la, ka Filistia dim la pin'ili la'asid Mikmas, 12 ka mam zɔ ye Filistia dim la na paae na ka ti nam pʋ ie Zugsɔb la sʋŋirɛ. Linɛ kɛ ka li lieb tilasi tisim ye m maal maan la.” 13 Ka Samuel lɛbis o ye, “Fʋ tʋm nɛ nwɛnɛ zɔlʋg nɛ! Bɔzugɔ, fʋ pʋ dɔl zi'elkanɛ ka fʋ Zugsɔb Wina'am tisif la. Fʋ ya'a siakin zi'elʋg la fʋ naan sʋ'oe Israel yʋma dinɛ ka' bɛnnɛ, 14 amaa nannanna fʋ sʋ'ʋlim la kʋ maligim zi'enɛ; Zugsɔb la pʋn bɔ dau kanɛ ka o mɛŋ sʋnf bɔɔd ka gaŋ o ye o gaad o nidib la tuon, bɔzugɔ fʋ pʋ siaki dɔl Zugsɔb la zi'elʋgɔ.” 15 Samuel da bas Gilgal ka keŋ Gibea Benjamin sʋ'ʋlim la ni.
Israel zaba la'ad pansig ya
Ka Saul kaal dap banɛ bɛɛ o san'an la ka ba daa kpɛlim kɔbisyuobʋ. 16 Saul nɛ o biig Jonatan nɛ nimbanɛ da bɛɛ o san'an la wʋsa da zin'inɛ Geba linɛ kpi'e Gibea ka bɛ Benjamin sʋ'ʋlimin la, ka Filistia dim la la'as Mikmas. 17 Zabzabidib la pʋdig zin'isa atan' yi Filistia dim la teŋsʋk. Yiiga dim la da lɛbid nɛ Ofra lɛbisid Sual baba, 18 ka banɛ tia'al la lɛb Bet-Horon, ka banɛ paas atan' la lɛb teŋ la titɔndigin, Zeboim bɔn'ɔg la baba kpa' pipirig teŋ la. 19 Ba da pʋ nyɛ baa nid yinne Israel pʋʋgin onɛ mi' kʋdubɔ. Bɔzugɔ Filistia dim la yɛl ye, “Ya'a ka' ala Israel dim la na maal sʋ'ʋs nɛ kpana!” 20 Asɛɛ ka Israel dim la keŋ Filistia dim la san'an ye ba saasi ba niigi kunya, nɛ ba kunmɛŋa nɛ kʋsiis, nɛ ba liemis nɛ gɔn'ɔd. 21 Niigi kuunr nɛ kunmɛŋa saasʋg da anɛ wʋʋ fʋn na pʋdigi ba la'af zin'isa atan' ka yis zin'is ayi' la yɔ, ka zin'ig yinne mɛ saasid kpana nɛ liemis nɛ gɔn'ɔg. 22 Alazug zaba la daare da paae la, Saul nɛ Jonatan soogianam la wʋsa sɔ' da pʋ mɔr zaba lauk o nu'uginɛ. Saul nɛ o biig Jonatan ma'aa da mɔr. 23 Saŋkaŋa Filistia dim la sieba yina keŋ suor linɛ dʋt kʋkʋna la paae Mikmas baba la zin' gur.