Samuel kɛɛsʋg pian'ad
12
1 Samuel da yɛl Israel dim la ye, “Mam wʋmi ya pian'ad la wʋsa ka gaŋ Na'abi tisi ya. 2 Nannanna ya mɔr Na'ab onɛ aan ya tuongat. Ya'a kpɛlim mam, man anɛ bʋnkʋdʋg ka zug pɛlig, ka m biis la bɛ nɛ ya kpɛla. Mam daa anɛ ya tuongat m dasannimin sa kena paae zina. 3 Manɛ nwa zi'e ya tuon. Yɛlimi sida, m ya'a maal sɔ' linɛ ka' sʋ'ʋm, yanam yɛliminim Zugsɔb la nɛ onɛ ka o gaŋ ka m zaŋ malʋŋ kpaam bu'oe niŋ o zug la tuon. Anɔ'ɔn lɔlig ka m di'e? Anɔ'ɔn bʋŋ ka m di'e? Anɔ'ɔn ka m filim? Anɔ'ɔn ka m wɛbigɛ? Anɔ'ɔn mi' da'am nɛ si'el ka m umi m nini ka di'e? M ya'a nam mi' niŋ bʋn bama yinne, yanam on yɛlimim, ka m na yɔɔ lɛbis.” 4 Ka nidib la lɛbis ye, “Fʋ pʋ filim bɛɛ muki tii. Fʋ mɛ pʋ di'e si'eli yi sɔ' nu'uginɛɛ.” 5 Ka Samuel lɛbisi yɛli ba ye, “Zugsɔb la nɛ onɛ ka o gaŋ ye o an na'ab la di kasɛt zina, ye ya pʋ nyɛ man tʋm taal si'aa.” Ka nidib la lɛbis ye, “O sid di kasɛt.”6 Ka Samuel yʋ'ʋn yɛl nidib la ye, “Li anɛ Zugsɔb la da gaŋ Moses nɛ Aaron n yisi ya yaanam la Egipt teŋin. 7 Nannanna yʋ'ʋsɛɛ, zi'enimi kpɛla bɔzugɔ m bɔɔd ye m bu'osi ya nɛ Zugsɔb la tuon, zaŋi wa'ae tʋʋm sʋma banɛ ka o tʋm tisi ya yaanam la. 8 Jakob n da kpɛn' Egipt n naae la, ba da kaasi tis Zugsɔb la bɔɔd sʋŋir, ka Zugsɔb la tʋm Moses nɛ Aaron, banɛ da mɔri ya yaanam la yii paae kpɛla na ka ba zin'in la. 9 Amaa ba da tam Zugsɔb onɛ aan ba Wina'am la; ka o basi ba ka Sisera onɛ an Hazo zabzabidib tuongat la, nɛ Filistia dim nɛ Moab na'ab la wʋsa mɛ zab nɛ ba. 10 Ka ba kaasi tis Zugsɔb la, ka yɛl ye, ‘Ti tʋm tʋʋmbɛ'ɛd; ti zan'as Zugsɔb la ka dɔl Baal nɛ Asitoref banɛ an bada la. Amaa faanmi ti nannanna yii ti dataas la nu'usin ka ti na dɔllif.’ 11 Zugsɔb la da tʋm Jerubaal,a nɛ Barak, nɛ Jefita nɛ Samuel n faaɛn ya yii ya dataas banɛ giligi ya la wʋsa nu'usin, ka ya na zin' ka dabiem kae. 12 Amaa yanamɛ da nyɛ Nahas Ammon dim na'ab ka o bɔɔd ye o tʋ'ʋsi ya nɛ zaba la, ya da yɛlim ye, ‘Ayei, ti bɔɔdi sɔ' ye o aan ti na'ab,’ la'am nɛ Zugsɔb Wina'am da aan ya na'ab la. 13 Na'ab kanɛ ka ya gaŋ la nwa, onɛ ka yanam mɛŋ sɔs ye ya bɔɔd la, gɔsimi, Zugsɔb la sid gaŋ na'ab ye o guri ya. 14 Ya ya'a gi'igid Zugsɔb la, ka dɔl o, ka siakid o nɔɔr, ka pʋ ki'isid o zi'ela la; ka yanam nɛ ya na'ab la siaki dɔl Zugsɔb Wina'am, li na an sʋm tisi ya! 15 Amaa ya ya'a ki'isid o zi'ela la, o sʋnf na duoe nɛ ya wʋʋ ya yaanam la. 16 Nannanna aaɛn baanlimm, ka gɔsi Zugsɔb la ye o tʋm tʋʋm tita'asieba ka ya nini nyɛ! 17 Ka' ki bunib saŋa nwaa? M na sɔs Zugsɔb la ka o kɛ ka satansʋg nɛ saa kena. Ka ya baŋ lin an bɛ'ɛd si'em yanamɛ daa yɛl Zugsɔb la ye ya bɔɔd na'ab la.” 18 Ka Samuel sid da sɔs Zugsɔb la, ka daakan nɔɔ ka Zugsɔb la kɛ ka satansʋg nɛ saa kena. Ka nidib la wʋsa pin'ili zɔt Zugsɔb la nɛ Samuel dabiem. 19 Nidib la wʋsa da yɛl Samuel ye, “Sɔsim Zugsɔb Wina'am la tis tinam banɛ aan fʋ yammis la ka ti da kpii. Bɔzugɔ ti zaŋ tinamɛ bɔɔd na'ab ka li an bɛ'ɛd la pɛ'ɛs bɛ'ɛd kanɛ pʋn bɛɛ ti ni la.” 20 Samuel lɛbisi yɛli ba ye, “Da zɔti dabiem! Ya sid tʋm bɛ'ɛd kaŋa wʋsa; la'am nɛ wala da fɛndigi ka basi Zugsɔb la, amaa dɔlli nɛ o nɛ ya sʋnf wʋsa. 21 Da dɔlli bada banɛ ka' gbin la. Ba kʋ nyaŋi sʋŋi ya bɛɛ faaɛn ya, bɔzugɔ ba ka' gban'arɛ. 22 Zugsɔb la yʋ'ʋsʋŋ la zug, o kʋ kadi yaa basɛ, bɔzugɔ li malis o hali on kɛ ka ya lɛbig o mɛŋ nidib la. 23 Ya'a kpɛlim mam, win na yis, li na an yɛl kisʋg m ya'a zan'as ye m kʋ sɔs Zugsɔb la tisi ya. M mɛ na pa'ali ya linɛ an sʋm ka nar. 24 Amaa gu'usimi ka zɔɔe Zugsɔb la dabiem ka dɔlli nɛ o nɛ sida nɛ ya sʋnf wʋsa. Tɛn'ɛsimi tʋʋm sʋma banɛ ka o tʋm tisi ya la. 25 Ya ya'a zan'as ka nan tʋm linɛ ka' sʋ'ʋm, o na uus yanam nɛ ya na'ab la wʋsa lɔbi bas.”