1 Samuel 11

Saul sʋŋ Jabis teŋ dim

1 Nahas onɛ an Ammon dim na'ab la da keŋ nɛ o zabzabidibi lɔbi gilig Jabis Gilead teŋ la. Jabis teŋ dim la da yɛl o ye, “Niŋim nɔɔr yinne nɛ ti, ka ti na siaki dɔllif.” 2 Amaa Nahas onɛ an Ammon dau la lɛbis ye, “M na niŋ nɔɔr yinne nɛ ya, ya ya'a na siak ye m kpigi ya wʋsa datiuŋ nini ka li lieb nyannɛ tis Israel dim wʋsa.” 3 Jabis kpɛɛmnam la da yɛl o ye, “Tisimi ti daba ayɔpɔi ka ti tʋm ka ba keŋ tis Israel dim labaar ka sɔ' ya'a pʋ kena faaɛn tii, ti na siaki dɔllif.” 4 Banɛ ka ba da tʋm la mɔr labaar la paae Saul teŋ kanɛ ka ba buon ye, Gibea la yɛl nidib la, ba da nwɛ'ɛnɛ kuŋi kaasid agɔla. 5 Saŋkan ka Saul yi pɔɔginɛ kunna nɛ o niigi, ka bu'os ye, “Bɔɔ maal nidib la ka ba kaasida?” Ka ba yɛl o Jabis dim la yɛl si'el la wʋsa. 6 Saul n da wʋm labaar la, Wina'am Siig da sigi o zugin na nɛ paŋ ka o sʋnf duoe. 7 O da nɔk lɔlis ayi' kʋʋ waansi ba ni'im la zɔra-zɔra tis ka ba giligi tis Israel dim wʋsa, ka yɛli ba ye, “Onɛ wʋsa pʋ yina dɔl Saul nɛ Samuel keŋ zaba la, anwa ka m ye m maal o sɔb niigi.” Dinzug da kɛ ka ba zɔ Zugsɔb la dabiem ka ba wʋsa niŋ nɔɔr yinne. 8 Saul n da la'asi ba Bezek la, Israel dim dap la kal da anɛ tusa kɔbistan' ka Juda dim la kal an tusa pistan'. 9 Ba da yɛlbanɛ mɔr labaar la na ye, “Yɛlimi Jabis Gilead dim ye, ‘Bɛog, winnigi saa ye li bul saŋsi'a la, ka ya pʋn yi mugusʋg pʋʋgin.’ ” Ban da lɛb nɛ labakaŋa yɛl Jabis dim dap la, ba da mɔr sumpielim, 10 ka yɛl Ammon dim la ye, “Bɛog ti na mɔri ti mɛŋ na tisi ya, ka ya maal yanamɛ bɔɔd si'el.” 11 Bɛogʋ da nie la, Saul da pʋdigi o nidib la zin'isa atan'. Bɛkɛung asuba, ka ba kɔɔ kpɛn' Ammon dim la teŋsʋk ba gbɛɛnb zin'igin la kɔti ba hali ka nintaŋ nyaan bul. Ban ka ba da pʋ paam la da widig nɛ, ka sɔ' pʋ lɛn nyaŋi dɔl o tiraana.

Ba siak ye Saul aan ba na'ab

12 Nidib la da yʋ'ʋn bu'os Samuel ye, “Anɔ'ɔnamɛ daa bu'os ye Saul na nyaŋi aan ti na'ab la? Ba bɛ yaanɛ? Mɔri ba dima na ka ti kʋʋ ba!” 13 Amaa ka Saul lɛbis ye, “Sɔ'ɔsɔ pʋ kpiid zinaa. Bɔzugɔ zina ka Zugsɔb la faaɛn Israel dim la.” 14 Samuel da yɛl nidib la ye, “Kemi na ka ti keŋi Gilgal n maligim diis na'am la anina.” 15 Nidib la wʋsa da sid keŋ Gilgal n diis Saul na'am la Zugsɔb la tuon. Anina ka ba da maal taaba la'asʋg maana Zugsɔb la tuon, ka Saul nɛ Israel dim la wʋsa la'asi maal sumalistita'ar.