Samuel gaŋ Saul ye o an na'ab
10
1 Samuel da nɔk malʋŋ kpaam nɛ iili bu'oe niŋ Saul zugin ka pʋ'ʋs o sʋ'ʋŋa yɛt ye, “Zugsɔb la gaŋif ye fʋ guri o nimbanɛ aan o din la.” 2 Fʋ ya'a bas mam kpɛla zina, fʋ na sia'al nidiba ayi' Rakɛl yaʋg la baba, linɛ bɛ Zeliza kpi'e nɛ Benjamin titɔndig la. Ba na yɛlif ye ba nyɛ bʋmis banɛ ka ya daa ieed la. Nannanna bʋmis la yɛla pʋ lɛm paki fʋ saam ya'asɛ; yanam yɛla pak. O yʋ'ʋn bu'osid nɛ ye, “M na niŋ wala nɛ m biig nwa yɛla” 3 Fʋ na yii anina keŋ hali ti paae Tabo titita'arin la. Nidib atan' banɛ wa'ae Betel ye ba pʋ'ʋs Wina'am la na sia'alif ani. Yinne na tɛɛd bʋbibis atan', ka yinne mɛ mɔr bodobodo atan', ka onɛ kpɛlim la mɛ zanl daam nɛ gan'ar. 4 Ba na pʋ'ʋsif, ka tisif bodobodo ayi'. Da zan'asɛ, li sʋ'ʋm ye fʋ di'e lii ba san'an. 5 Fʋ ya'a di'e naae, fʋn on kem Gibea teŋ kanɛ ka ba buon ye, Wina'am din la, anina ka Filistia dim soogia sieba kena zin' gur la. Fʋ ya'a ti li'en tempʋʋg la, fʋ na sia'al nɔdi'esidib bɛdegʋ ka ba dɔl taaba naan malʋŋ zin'igin la yit na ka googinam nɛ siyada nɛ na'atana nɛ wiisi gaadi ba tuonnɛ nwɛ'ɛd ka ba di'esid Wina'am pian'adi tisid nidib. 6 Zugsɔb Siig la paŋ na sigi fʋ zugin na ka fʋn mɛ na la'as nɛ ba di'esid Wina'am pian'ad, ka mɛ na tiak ka lɛn ka' fʋn an sɔ' la ya'asɛ. 7 Nɛ'ɛnam wʋsa ya'a ti niŋ, fʋn tʋm fʋn gban'e si'el wʋsa, ka Wina'am la bɛ nɛf. 8 “Gaadimi m tuonnɛ keŋ Gilgal, ka m na kɛɛn fʋ san'an na maal nyu'or maan nɛ taaba la'asʋg maan. Amaa asɛɛ fʋ gur daba ayɔpɔi ka m nyaan kena ka yɛlif fʋn ye fʋ tʋm si'el.”Saul na'am diib yɛla
9 Saul da fɛndigi keŋ ka bas Samuel ka Wina'am da kɛɛn o san'an na tiak o sʋʋnr. Ka zanbin banɛ ka o yɛl ye li na niŋ la wʋsa niŋ daakan la. 10 Ban da paae Gibea la, nɔdi'esidib bɛdegʋ banɛ dɔl taaba da sia'al o; ka Wina'am Siig sigi o zugin na nɛ paŋ. Ka o pɛ'ɛsi ba di'esid Wina'am pian'adi tisid nidib. 11 Nimbanɛ wʋsa da pʋn mi' o ka yʋ'ʋn nyɛɛ o ka o la'as nɛ nɔdi'esidib la mɛ di'esid Wina'am pian'adi tisid nidib la, ba da pin'ili bu'osid taaba ye, “Bɔɔ nwa mɛ paae Kis biig la? Saul mɛ anɛ nɔdi'esidib la yinnee?” 12 Dau sɔ' da bɛɛ ani ka bu'os ye, “Ka anɔ'ɔnɛ aan ba saama?” Ka li da lieb siiliŋ ye, “Saul mɛ yʋ'ʋn anɛ nɔdi'esidib la yinnee?” 13 Saul n da gu'oe nɔdi'esʋg la, o da keŋ maan zin'igin la. 14 Ani la Saul saambil bu'os on nɛ o sankpan'as la ye, “Yaanɛ ka yanam keŋɛ?” Ka Saul lɛbis ye, “Ti keŋ nɛ bʋmis la ieeb, amaa tinamɛ daa nam pʋ nyɛɛ ba la, ti daa keŋ Samuel san'an.” 15 Saul saambil la da yɛl o ye, “Yɛlim mam Samuel n yɛli ya si'el.” 16 Ka Saul lɛbis o ye, “O yɛli ti ye ba nyɛ bʋmis la,” amaa o da pʋ yɛl o saambil la Samuel n yɛl o na'am la diib yɛla laa.
17 Samuel da la'as Israel dim la wʋsa Zugsɔb tuon Misipa 18 ka yɛli ba ye, “Israel dim Wina'am la yɛl ye, ‘Manɛ yis yanam Israel dim la Egipt teŋin na ka faaɛn ya yis Egipt dim paŋ la pʋʋgin nɛ sʋ'ʋlim banɛ wʋsa da namisidi ya la.’ 19 Amaa ya zan'asi ya Wina'am onɛ faaɛn ya yisi ya tɔɔg nɛ sʋnsa'aŋin la ka yɛl ye, ‘Ayei, bɔɔm na'abi tisi ti.’ Alazugɔ nannanna mɔri nɛ ya dɔɔd nɛ tuŋ kɔn'ɔb-kɔn'ɔb la kɛn Zugsɔb la tuon na.”
20 Samuel da buol dɔɔd la wʋsa yinne-yinne ye ba li'el na, Benjamin dɔɔg la ka ba da gaŋ. 21 Ka o yis Benjamin dɔɔg la tuon na, yis tuŋ-tuŋ: Matir tuŋ la ka ba da gaŋ. Li naar la wʋsa, Saul onɛ an Kis biig la ka ba da gaŋ. Amaa ban gɔs nidibin la, ba pʋ nyɛɛ o. 22 Ka ba lɛm bu'os Zugsɔb la ye, “Dau la on bɛ kpɛlaa?” Ka Zugsɔb la lɛbis ye, “Ɛɛn, o su'a o mɛŋ la'ad la teŋsʋk.” 23 Ba da keŋ yis o na zi'el nidibin la, ka o wa'alim gaadi ba wʋsa. 24 Ka Samuel yɛl nidib la wʋsa ye, “Ya nyɛ dau kanɛ ka Zugsɔb la gaŋ laa? O tiraan kae nimbama wʋsa nii.” Ka nidib tans nɛ kʋkɔtita'ar ye, “Na'aba! Wina'am na pɛligi fʋ zug!”
25 Samuel da tu'asi pa'ali ba na'am la suoya. O da sɔbi ba niŋ gbauŋʋn digil Zugsɔb la tuon, ka nyaan bas nidib la ka sɔ' wʋsa kul o yin.