1 Samuel 9

Saul kɛn Samuel san'an na

1 Dau sɔ' da bɛɛ an Benjamin nid ka an ninvʋsʋŋ, ka o yʋ'ʋr buon Kis. O saam da anɛ Abiel ka on saam mɛ an Zero ka on saam mɛ an Bekoraf ka on saam mɛ an Afia onɛ an Benjamin nid. 2 O da mɔr biig ka o yʋ'ʋr buon Saul, ka sɔ' wʋsa nini da tig o ka o tiraan kae Israel nidibin la ya'asɛ, ka o wa'alim gaad sɔ' wʋsa.

3 Saŋkan la, Saul saam Kis bʋmis da bɔdig nɛ, ka o yɛl o biig Saul ye, “Dɔl yammis la yinne ka ya keŋ iee ba.” 4 Ka o yii dɔl Efiram linɛ an kʋkʋna teŋ la giligi keŋ Sialisa, amaa ba da pʋ nyɛɛ ba. Ba da keŋ hali ti kpɛn' Sia'alim sʋ'ʋlim, amaa bʋmis la da ka' anina. Ka ba gaadi keŋ yi Benjamin paalʋ titɔndigin, amaa ba da pʋ nyɛɛ ba.

5 Ban da paae Zuf sʋ'ʋlim la, ka Saul yɛl sankpan'as kanɛ dɔl o la ye, “Kɛl ka ti lɛb; ya'a ka' ala m saam na tam bʋmis la yɛla ka tinam yɛla yʋ'ʋn lɛbi pak o.” 6 Ka sankpan'as la lɛbis ye, “Gɔsima! Wina'am nɔdi'es bɛ tempʋʋg kaŋa ni, ka ba tisid o girima hali. O ya'a yɛl si'el li sid niŋid nɛ. Ti kem o san'an nannanna, ka daasi'erɛɛ o na pa'ali ti tinamɛ na dɔl si'el.” 7 Ka Saul bu'os sankpan'as la ye, “Ti ya'a keŋɛ, bɔ ka ti mɔri na tis o? Diib linɛ bɛɛ ti kɔlʋgin la naae ya. Ti pʋ mɔr piinsi'a na keŋ ka tis Wina'am nɔdi'es la.” 8 Ka sankpan'as la lɛn lɛbis ye, “Gɔsima! Mam mɔr anzurifa bi'ela kpɛla. M na nɔki tis Wina'am nɔdi'es la ka o pa'ali ti tinamɛ na dɔl si'el.” 9 (Saŋkan la sɔ' ya'a da ken ye o bu'os Wina'am nɔdi'esi baŋ linɛ bɛ, o na yɛl ye, “Kem na ka ti keŋ onɛ nyɛt la san'an.” Bɔzugɔ banɛ ka ti buon ye, Nɔdi'esidib zina la, ba da buonnɛ ba ye, Banɛ nyɛt). 10 Ka Saul yɛl sankpan'as la ye, “Fʋ mɔya! Kem na ka ti keŋ!” Ba da sid keŋ Wina'am nɔdi'es la da bɛ teŋ si'a la. 11 Ban da nan dʋt kʋkʋn la ye ba paae tempʋʋgin la, ba da sia'al pu'asada ka ba kenna ye ba wik ku'om, ka ba bu'osi ba ye, “Onɛ nyɛt la bɛ kpɛlaa?” 12 Ka ba ye, “Ɛɛn, o bɛ kpɛla! O bɛɛ ya tuon. Kemi tɔ'ɔtɔ ka o kennɛ ti teŋa zina na, bɔzugɔ nidib la mɔri ba maana bɛ maana zin'igin la. 13 Ya ya'a kpɛn' tempʋʋgin la tɔ'ɔtɔ, ya na nyɛɛ o ka o nyaan kpɛn' maan zin'igin di. Nidib la kʋ pin'il diibɔ asɛɛ ka o paae, bɔzugɔ onɛ ye o niŋ maan la zug bareka ka banɛ ka ba kaanb la nyaan di. Kemi nannanna ka ya na nyɛɛ o.” 14 Ba da keŋ tempʋʋgin la, ka ban da kpɛn'ɛd ani la, ba da nyɛ Samuel ka o dɔl ban bɛ zin'isi'a la ye o gaadi keŋ maan zin'igin la.

15 Ban saa na keŋ wʋʋ bɛog la, ka Zugsɔb la pʋn nie li yɛla pa'al Samuel ye, 16 “Bɛog anwa win la, mam na tʋm dau sɔ' ka o yi Benjamin teŋin kɛɛn fʋ san'an na. Nɔkim malʋŋ kpaam la bu'oe niŋ o zugin ka o lɛbigi m nimbanɛ an Israel dim la tuongat. O na faanm nidib la yi Filistia dim la nu'ugin, ka gɔsi m nidib la bɔzugɔ ba kaasig paae mam na.”

17 Samuel n da nyɛ Saul la, Zugsɔb la yɛl o ye, “Dau kaŋa ka m sa yɛtif o yɛla la. Onɛ ye o guri m nidib la.” 18 Saul n da keŋ paae Samuel san'an teŋ la za'anɔɔrin la, ka bu'os o ye, “M bɛlimnɛ, fʋ na pa'alim onɛ nyɛt la yinnee?” 19 Ka Samuel lɛbis ye, “Manɛ an onɛ nyɛt la. Gaadim tuonnɛ keŋ maan zin'igin la, bɔzugɔ zina fʋ ye fʋ dinɛ nɛ mam, ka gbɛn ka bɛog bɛkɛung ka m yɛl linɛ wʋsa bɛɛ fʋ sʋʋnrin. 20 Ya'a an bʋmis banɛ bɔdig daba atan' zina la, da kɛ ka ba yɛla paki yaa; ka ba nyɛɛ ba. Anɔ'ɔn ka Israel dim ya'am wʋsa kpɛn' ka li ya'a ka' fʋ nɛ fʋ saam yidim la ma'aanɛ?” 21 Saul lɛbis ye, “Mam ka'anɛ Benjamin nid ka yi dɔkanɛ pɔɔd Israel buudi wʋsa ni na laa? Ka' tinam tuŋ la pɔɔdi gat Benjamin dim la wʋsa? Bɔ ka fʋ yɛtim nwa'?”

22 Samuel da dɔl Saul nɛ sankpan'as la kpɛn' zɔŋŋin ka tisi ba zin'isʋma nimbɛda banɛ ka o kaanb la tuon. Nidib la kal da anɛ wʋʋ pistan'. 23 Ka Samuel yɛl onɛ maan diib la ye, “Nɔkim ni'im kanɛ ka m pa'a pa'alif ka ye fʋ nɔkim su'a la mɔr na.” 24 Ka o nɔk gbɛmum la mɔr na digil Saul tuon. Ka Samuel yɛl ye, “Ban digilif si'eli nwa. Ɔm ka fʋ zug ka ba yisi lii digili li kɔn' la'as kaŋa nwa yɛla ka m nyaan buol nidib la.” Ka Saul di nɛ Samuel daakan.

25 Ban da naan maan zin'igin lɛb tempʋʋgin na la, Samuel da dɔl Saul n dʋʋ o dɔɔg zug ka ba sɔns. 26 Ba da dɛŋ isigir ka bɛog bɔɔd nier, ka Samuel buol Saul dɔɔg la zugʋ yɛl o ye, “Ti'ebim ka m kɛɛsi ya ka ya kul.” Saul n da ti'ebi naae la, ka on nɛ Samuel dɔl taaba yi.

27 Ban da yit tempʋʋgin la, Samuel yɛl Saul ye, “Yɛlimi fʋ sankpan'as la ka o gaadi ti tuon.” Ka sankpan'as la sid niŋ ala. Ka o mɛ yɛl Saul ye, “Fʋn zi'enim kpɛla bi'ela, ka m tisif labaar linɛ yi Wina'am san'an na.”