Israel dim bɔɔdi ba mɛŋ na'ab
8
1 Samuel n da kʋdig la o da gaansi o biis ka ba kat Israel dim saria. 2 O bikpɛŋ la yʋ'ʋri da buon Joel ka onɛ tia'al la yʋ'ʋr buon Abija. Ba da bɛnɛ Beerseba tʋm sariakadib tʋʋma ani. 3 Amaa o biis la da pʋ dɔl on tʋm si'em la. Ba da dɔlli zam suoya bɔɔd ye ba nyɛ kpan'am, ka basi ba mɛŋ ka ba da'adi ba ka ba pʋ lɛn tu'ad sidaa.4 Dinzug da kɛ ka Israel dim kpɛɛmnam la la'as taaba keŋ Samuel san'an Rama teŋin. 5 Ba da yɛl o ye, “Nannanna fʋ kʋdigya, ka fʋ biis la pʋ dɔl fʋn bɔɔd si'el la; alazugɔɔ gaŋim na'abi tisi ti ka o luu ti tuon, nwɛnɛ tembanɛ mɔr na'anam si'em la.” 6 Amaa ban da yɛl ye, “Gaŋim na'abi tisi ti ka o luu ti tuon la,” li da pʋ malis Samuel sʋʋnrɛ; alazug Samuel da bu'os Zugsɔb la. 7 Ka Zugsɔb la lɛbis o ye, “Siakim nidib la yɛlif si'el la wʋsa; li ka' fʋn ka ba zan'asɛ, amaa ba zan'as nɛ man kanɛ aan ba Na'ab la. 8 Ba da pʋn zan'asim daakanɛ ka ba pin'ili yi Egipt teŋin hali ti paae zina la. Ban kɛɛs mam bas ka dɔl ba'asieba la, ala nɔɔ ka ba maannif. 9 Siakim ban yɛtif si'el la; amaa sa'alimi ba sʋ'ʋŋa ka kɛ ka ba baŋ onɛ na aan ba na'ab la na tʋm si'em.”
10 Samuel da pian' tis nimbanɛ ye ba bɔɔdi ba mɛŋ na'ab la pa'ali ba Zugsɔb la yɛl o si'el la wʋsa. 11 O yɛli ba ye, “Onɛ ye o aan ya na'ab la na tʋm si'em nwa: O na nɔki ya biribis la ka ba gɔsid o widi nɛ ba tɛrekonam la, ka o ya'a ken zin'isi'a wʋsa, ba sieba na gat o mɛŋ widi tɛreko la tuon. 12 O na gaŋ sieba ka ba an zaba tuongatibi gat zabzabidib tusa tuon ka sieba gat pisnu tuon. Ka sieba kuod o pɔɔg ka bun o ki. Sieba mɛ na an banɛ maan zaba la'ad nɛ widi tɛrekonam la la'adi tisid o. 13 O na nɔki ya bipumis la ka ba sieba maan tudaar ka bam dʋgid bɛɛ sɛn'ɛd bodobodo. 14 O na di'e ya pɔsʋma la nɛ ya vain tiis pɔɔd linɛ maan bʋnnuuda nɛ olif tiis linɛ vɛnl wʋsa ka nɔki tis banɛ tʋmmi tisid o la. 15 O na kɛ ka ya pʋdigidi ya ki nɛ ya daam zin'is piiga ka o nɔk pʋdigir yinne tis o nayikpɛm nɛ banɛ tʋmmi tisid o la. 16 O na di'e ya sankpan'as dap nɛ pu'ab nɛ ya niigi nɛ bʋmis wʋsa mɔri maan o mɛŋi bɔɔd si'el. 17 O na di'e ya bʋnkɔnbid piiga pʋdigir yinne, hali ka ya mɛŋ lieb o yammis. 18 Dabiskan ya'a ti paae yanam mɛŋ na kaasidi bɔɔd yɔlisim yit na'akanɛ ka ya gaŋ la nu'usin, ka Zugsɔb la kʋ wʋm ka sʋŋi yaa.”
19 La'am nɛ wala, nidib la da zan'as Samuel pian'ad la, ka yɛl ye, “Ayei! Ti bɔɔdi na'ab ye o guri ti. 20 Li na kɛ ka ti mɛ nwɛnɛ tembanɛ kpi'enɛ ti mɔr na'anam ka ba luti ba tuon si'em la. Ka o na gati ti tuonnɛ zabidi ti zaba tisidi ti.” 21 Samuel da wʋm nidib la yɛl si'el wʋsa la, ka yɛl Zugsɔb ban yɛl si'el la nɔɔ. 22 Zugsɔb la da lɛbis ye, “Siakim tisi ba ka tisi ba na'ab.” Ka Samuel da yɛl Israel dim la ye ba wʋsa kulimi ba yaan.