7
1 Ka Kiriaf Jiarim teŋ dim la da kena zaŋ Zugsɔb Nɔnaar Daka la. Ba da mɔri li keŋi Abinadab yin linɛ bɛ kʋkʋna ni la, ka maal maan linɛ na kɛ ka o biig onɛ yʋ'ʋri da buon Eleazar gur Zugsɔb Nɔnaar Daka la.Samuel nyaŋ Filistia dim
2 Li da yuug nɛ hali paae yʋʋm pisi ka Nɔnaar Daka la nan kpɛm bɛ Kiriaf Jiarim teŋin. Ka Israel dim wʋsa sʋnf san'am ka ba kum, ka bɔɔd ye ba lɛb Zugsɔb la san'an na. 3 Samuel da yɛl Israel dim wʋsa ye, “Ya ya'a sid bɔɔd ye ya lɛb Zugsɔb la san'an nɛ ya sʋnf wʋsa, yanam on basimi ya teŋzʋŋ bada nɛ wina nɛ Asitoref bada la'ad la wʋsa, ka pɛsigi ya mɛŋ wʋsa tis Zugsɔb la, ka tʋm tis on ma'aa. Ya ya'a niŋ ala, o na faaɛn ya yisi ya dataas Filistia dim la nu'usin.” 4 Ka Israel dim la sid basi ba bada banɛ an Baal nɛ Asitoref la, ka ti'e Zugsɔb la ma'aa.
5 Ka Samuel yɛl ye, “La'asimi Israel dim wʋsa ka ba kɛn Misipa teŋin na, ka m nwɛ' Wina'am nu'ugʋ tisi ya.” 6 Ban da la'as Misipa na la ka wik ku'om bu'oe Zugsɔb la tuon. Daakan la ba da lɔ nɔɔr ka yɛl taal kanɛ ka ba tʋm ka li ka' sʋ'ʋm la wʋsa, ye, “Tinam tʋm tʋʋmbɛ'ɛd Zugsɔb la tuon.” Samuel n da aan ba tuongat Misipa teŋin. 7 Saŋkan ka Filistia dim la da wʋm ye Israel dim la'asi bɛ Misipa la, ba teŋ sʋ'ʋdib la da la'asi kena ye ba zab nɛ ba. Israel dim la da wʋm labaar la, dabiem da gban'e ba Filistia dim la yɛla. 8 Ka ba yɛl Samuel ye, “Da gu'oe fʋn sɔsid Zugsɔb Wina'am ti yɛla ye o faaɛn ti yis Filistia dim nu'usin la.” 9 Samuel da nɔk pɛbil kanɛ nam pʋ tuk bin'isim maal maan linɛ nyu'od bugum tis Zugsɔb la. Ka fabili tis Israel Zugsɔb la, zi'e ba nɔba zug. Ka Zugsɔb la siak o sɔsʋg. 10 Samuel n da nam bɛɛ ani maan maan la, Filistia dim da mirid na ye ba zab nɛ ba. Amaa daakan la Zugsɔb la da kɛ ka satansʋg tans nɛ paŋ Filistia dim la san'an, ka dabietita'ar kpɛn' ba ka ba zɔ ka bas Israel dim la. 11 Israel dim dap la da yi Misipa teŋin tabinɛ ba gbin tɔ'ɔtɔ hali kʋʋ ba yinne-yinne sigi tʋʋg Bet-Kaa teŋin sa. 12 Ka Samuel nɔk kugtitaari zi'el Misipa nɛ Seen teŋsʋk. O da pʋd zin'ikan yʋ'ʋr ye Ebɛnɛza,a ka li gbin an ye, “Zugsɔb la mɔri ti paae si'eli nwa.”
13 Ba da nyaŋ Filistia dim la ka ba pʋ lɛn nyaŋi kpɛn' Israel sʋ'ʋlim daami ba ya'asa. Samuel nyɔvʋr bɛllim saŋa la wʋsa Zugsɔb la da zabidi nɛ Filistia dim la. 14 Ekron ken paae Gaf linɛ ka Filistia dim la da faaɛn Israel dim la san'an la, ba da lɛn di'e ba bʋn. Israel dim da faaɛn tembanɛ kpi'e ba wʋsa ya'as Filistia dim la nu'usin. Sumbʋgʋsʋm yʋ'ʋn da bɛ Israel dim nɛ Amor dim la teŋsʋk. 15 Samuel da anɛ Israel dim sariakat o nyɔvʋr bɛn wʋsa. 16 Yʋʋm wʋsa, o da giligid nɛ, lin yi Betel keŋ paae Gilgal nɛ Misipa, kat Israel dim saria, zin'iban la wʋsa. 17 Amaa o da ɛɛn lɛbid Rama teŋin saŋa wʋsa, zin'ikanɛ ka o yir da bɛ la. Ani mɛn, o da kat Israel dim la saria. O da maal pʋ'ʋsim bimbim anii tis Zugsɔb la.