Nɔnaar daka la lɛb Israel teŋin
6
1 Zugsɔb Nɔnaar Daka la da bɛ Filistia sʋ'ʋlim nwadis ayɔpɔi la, 2 Filistia dim la da keŋ bu'osi ba teŋgban maannib nɛ ba'abʋgʋdib la ye, “Ti na niŋ Zugsɔb Nɔnaar Daka la wala? Yɛlimi ti tinamɛ na niŋ si'em lɛbisi li, li zin'igin.” 3 Ka ba lɛbis ye, “Ya ya'a ye ya lɛbis Israel dim teŋgban daka la, yanam on da lɛbisi li zaalim, amaa mɔɔmi ka bɔɔe la'abanɛ ka ba na maal taal malʋŋʋ paasi. Ala ka ya na paam laafi, ka mɛ baŋ linɛ zugʋ kɛ ka o sʋnf pɛlig nɛ ya la.” 4 Filistia dim la da bu'os ye, “Taal maan la'abɔ ka ti na paasi keŋ tis o?” Ka ba lɛbis ye, “Zaŋimi sanlima maal natiŋkpi'emis anu, ka mɛ maal dayuus anu nwɛnɛ Filistia teŋ sʋ'ʋdib la kalli an si'em la. Bɔzugɔ tɔɔg la daa pʋ pansig teŋ sʋ'ʋdib bɛɛ tadim wʋsa. 5 Maaliminɛ sanlima natiŋkpi'emis nɛ dayuus banɛ san'amidi ya teŋ la, ka nɔki li tis Israel dim teŋgban la, ka mɛ tis o girima, ka daasi'erɛɛ o na yis tɔɔg linɛ paadi ya nɛ ya bada nɛ ya teŋ la. 6 Bɔ ka ya digilimi ya sʋnya wʋʋ Egipt dim nɛ Faaro da niŋ si'em la? On da kɛ ka li wʋmi ba hali la, Faaro da pʋ bas suor ka ba yii?”7 “Alazug, bɔɔmi niigi tɛreko paal nɛ na'abanɛ du'a ka ba nam pʋ niŋi ba yuasin nɛ, ka lɔɔ ba ta'al nɛ tɛreko la ka nɔki ba na'abibis la kpɛn'ɛs garikini lɔ. 8 Ka nɔki Zugsɔb Nɔnaar Daka la pa'ali tɛreko la zug, ka lɛn nɔk daka yinne ka zaŋi ya taal malʋŋ la'ad la niŋi li pʋʋgin, ka nɔki pa'al tɛreko la pʋʋg ka kɛ ka li dɔlli li suor. 9 Amaa kpansimini li gɔsi; li ya'a kennɛ kpa'ad Israel teŋ linɛ ka ba buon Bet-Semes la, li pa'al ye li anɛ Zugsɔb la kɛ ka tɔɔg la paae ti. Amaa li ya'a pʋ niŋ ala, li pa'al ye ka' Zugsɔb la daa kɛ ka tɔɔg la kenaa, li yinɛ zin'isi'a kidig na.” 10 Ka ba sid nɔk na'abanɛ aan ala lɔɔ ba ta'al nɛ tɛreko la ka yɔɔ ba biis la. 11 Ka nɔk Zugsɔb Nɔnaar Daka la sʋn'ʋl tɛreko la zug nɛ sanlima banɛ ka ba zaŋi maal dayuus nɛ natiŋkpi'emis la. 12 Ka niigi la kpɛn kpa' keŋ Bet-Semes ka bʋʋn hali, ka pʋ bie lɛb suor la datiuŋ bɛɛ dagɔbʋgɔ. Ka Filistia teŋ sʋ'ʋdib la dɔl daka la nya'aŋ, hali ti paae Bet-Semes titɔndigin. 13 Saŋkaŋa Bet-Semes dim da bɛnɛ ba bɔn'ɔdin bʋn ki, ka ban ʋki ba nindaa nyɛ daka la ba da maan sumalisim. 14 Tɛreko la da kena paae Josua pɔɔg linɛ bɛ Bet-Semes la, zi'enɛ kpi'en nɛ tampintita'ar. Ka nidib kena fuos tɛreko la daad la, ka nɔk niigi la maal maan kanɛ ka ba nyu'od bugum tis Zugsɔb la. 15 Levi dim la da kena sigis Nɔnaar Daka la, nɛ daka linɛ ka sanlima la'ad la bɛ la, nɔki pa'al tampintita'ar la zug. Daakan la Bet-Semes dim la da maal maana tis Zugsɔb la la'am nɛ maan linɛ nyu'od bugum. 16 Filistia dim teŋ sʋ'ʋdiba anu la da bɛɛ ani ka nyɛ ban maal si'el la wʋsa ka nyaan lɛbi kul Ekron teŋin daakan nɔɔ.
17 Filistia dim banɛ da mɔr sanlima la kena maali ba taal malʋŋ la nwa: Asdod nɛ Gaza nɛ Askɛlon nɛ Gaf nɛ Ekron dim; ba da tis nɛ yinne-yinne. 18 Sanlim banɛ ka ba da maal wʋʋ dayuus la, ba da pʋdignɛ dɔlis Filistia dim teŋ nɛ li teŋ sʋ'ʋdibi an si'em teŋ bɛda la nɛ li tembibis la.
Tampintita'ar linɛ ka ba da zaŋ Zugsɔb Nɔnaar Daka la sʋn'ʋl la anɛ kasɛt hali ti paae zina. Li nan zi'e Josua pɔɔg la baba, Bet-Semes teŋin. 19 Amaa Bet-Semes nidib pisyɔpɔi da siki gɔs Nɔnaar Daka la pʋʋgin ka Zugsɔb la kʋʋ ba li zug. Nidib la da kaas nɛ hali, Zugsɔb la tɛɛgi ba tʋbir si'em la zug. 20 Ka Bet-Semes nidib la bu'os ye, “Anɔ'ɔnɛ na nyaŋi zi'en Zugsɔb Wina'am onɛ an kasi nwa tuonnɛ? Ka ti na mɔr Daka la yi kpɛla, keŋ tisi anɔ'ɔnɛ?” 21 Ka ba da tʋm nidib ka ba mɔr labaari keŋi tis Kiriaf Jiarim teŋ nidib la yɛli ba ye, “Filistia dim la lɛbis Zugsɔb Nɔnaar Daka la na. Kemi na nɔkini li keŋi ya zin'igin la.”